iTabagone
Yalovinaka Vakaceguya Na Yaloqu
Ena yabaki dua ni nona mate na taciqu tagane, au raitayaloyalotaka noqu bula me tekivu mai ena nona mate. Noqu vakanananu e sega wale ga niu vakila na mosi vakaitamera ia na veivakalougatataki tale ga a solia vei au na Kalou.
Au sega vakadua ni kila me rawa vakacava vei ira na tamata nodra kaya ni nona mate e dua na daulomani e rawa me kauta mai na veivakalougatataki. Au sega ni kila me rawa vakacava niu marautaka ka vakavinavinakataka e dua na ka e mositi au sara vakatitobu. Ena dua na bogi, ia, a veisautaka sara ga vakatabakidua na noqu rai.
Au yadra cake ena bogilevu tutu vata kei na yalo bibi au sega ni se bau sotava. Sa vakatasogotaka noqu icegu na mosi. Au tekiduru sobu ka tagicaka noqu masu vua na Tamaqu Vakalomalagi. Ena noqu bula taucoko au a vakavulici me baleta na Veisorovaki kei na kaukauwa ni veivakabulai veivakurabuitaki nei Jisu Karisito. Sa mai vakatovolei oqo na noqu vakabauta. Au vakabauta dina li? Au kerea vua na Tamaqu mai Lomalagi me yalovinaka ka vakaceguya na yaloqu. Sa rui vakaitamera na mosi meu na walia ga vakataki au.
Au sa qai vakila na luvuci ni yagoqu taucoko ena vakacegu, veikaroni, kei na loloma. Au vakila ni Kalou e mokoti au wavoki ena Ligana ka taqomaki au mai na mosi vakaitamera au a vakila tu. Au se nanumi taciqu tagane tu ga, ia sa rawa me duatani tale na noqu raica. E levu sara ga na ka au a vulica mai na veika au sotava oqo.
Au kila ni tu vakarawarawa tu na loloma kei na vakacegu ni Turaga. E gadrevi wale ga vei keda meda vakayagataka.