iVaqa ni Veisiko, Feperueri 2013

Saumaki vua na Turaga

Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na marama oqo me yaco na iSoqosoqo ni Veivukei me dua na tiki bulabula ni nomu bula vakai iko. Me ikuri ni itukutuku, lako ki na reliefsociety.lds.org.

iVakatakilakila

Vauci ni iSoqosoqo ni Veivukei

Vakabauta, Matavuvale, Veivukei

O ira na marama vou ena Lotu—okati kina o ira na Gone Yalewa era sa lewe ni iSoqosoqo ni Veivukei, o ira na marama era sa lesu tiko mai ena itaviqaravi, kei ira na lewenilotu vou—era gadreva na veitokoni kei na veitokani vata kei ira na dauveisiko. “E bibi na vakaitavi ni lewenilotu ki na vakatudeitaki ni curuvou kei na nodra vakabulabulataki na lewenilotu era sa luluqa tu me ra lesu mai ka vakaitavi ena itaviqaravi,” kaya o Elder M. Russell Ballard ena Kuoramu ni Le Tinikarua na iApositolo. “Vesuka na raivotu ni iSoqosoqo ni Veivukei … ni rawa me yaco [me dua] na ivurevure ni veitokani kaukauwa duadua e tu vei keda ena Lotu. Sikovi ira yani vakatotolo o ira era sa vakavulici ka vakabulabulataki, ka lomani ira ena Lotu mai na nomu isoqosoqo.”¹

Me vaka ni da lewe ni iSoqosoqo ni Veivukei, e rawa me da vukei ira na lewenilotu vou me ra vulica na ivakarau yavutaki ena Lotu, me vaka:

Vakaitavi ena vosa.
Wasei ni iVakadinadina
Talairawarawa ki na lawa ni lolo.
Saumi ni ikatini kei na veisolisoli tale eso.
Vakaitavi ena volai ni kawa ni matavuvale.
Nodra papitaisotaki kei na veivakadeitaki me baleti ira na wekadra era sa vakacegu yani.

“E rawa vei ira na itokani dauveikauwaitaki me ra vakacegui ira na lewenilotu vou me ra vakila nodra kidavaki ena lotu,” kaya o Elder Ballard.² O ikeda kece sara, ia vakabibi o ira na dauveisiko, e tu na nodra itavi bibi me ra tauyavutaka na veitokani vata kei ira na lewenilotu vou me sa dua na sala ni nodra vukei me ra vakadeitaka na nodra “saumaki vua na Turaga” (Alama 23:6).

Mai na iVolanikalou

2 Nifai 31:19–20; Moronai 6:4

Mai na Keda iTukutuku Makawa

“Ena iwiliwili ni curuvou ka sa tubu cake tikoga e veigauna,” kaya o Peresitedi Gordon B. Hinckley (1910–2008), “e dodonu me da cakava e dua na sasaga vakaitamera ni nodra vukei ena nodra vakasaqara na nodra gaunisala. O ira vakayadua era gadreva e tolu na ka: dua na itokani, dua na itavi, ka vakavulici ena ‘ivakavuvuli ni Kalou’ (Moronai 6:4).”³

O ira na dauveisiko era sa tu ena dua na itutu me vukei kina o ira era dau sikova. Me na liu taumada na veitokani, me vaka a yaco vua e dua na marama gone ena iSoqosoqo ni Veivukei ka dauveisiko vua e dua na marama qase cake. Na tara cake ni nodrau veitokani a berabera sara me yacova ni rau a cakacaka vata ena dua na sasamaki. A yaco me rau veitokani, mai na nodrau veivosakitaka me baleta na iVaqa ni Veisiko, e rau sa vuli mai na “ivakavuvuli ni Kalou.”

O Peresitedi Joseph Fielding Smith (1876–1972) a kaya ni iSoqosoqo ni Veivukei “sa dua na tiki bibi ni matanitu ni Kalou e vuravura ka … vukei ira na lewena yalodina me ra rawata na bula tawamudu ena matanitu nei Tamada.”⁴

© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12. Vakadonui me vakadewa: 6/12. Vakadewa ni Visiting Teaching Lesson, February 2013. Fijian. 10662 858