Ang Akong Birthday Wish
Angelica Carbonell Digal, Philippines
Sa dihang gidawat nako ang ebanghelyo sa edad nga 18, giangkon nako nga akong natilawan ang pinakatam-is nga prutas sa tanan. Mibati ko og dakong kalipay, apan naghunahuna ko sa mga sakop sa akong pamilya, kinsa nangawala ug nahisalaag. Nagguol ko pag-ayo nga ako lang ang miyembro sa Simbahan sa akong pamilya, apan wala ko masayud kon unsaon nako sa pagbuka sa ilang mga mata ug dunggan sa kamatuoran.
Gisulayan nako ang daghang mga pamaagi sa pagkombinser sa akong pamilya sa pagpaminaw sa mga misyonaryo. Apan kon mas maningkamot ko, mas magduha-duha na hinoon sila.
Nawad-an ko sa kadasig, ug naghunahuna ko nga dili na mosimba. Apan samtang nag-ampo ko, nakahinumdom ko og usa ka kasulatan: “Human niini [kamo] molimud kanako, kini maayo pa alang kaninyo nga kamo wala makaila kanako” (2 Nephi 31:14). Mas nag-ampo ko, nagbasa sa mga kasulatan, nagtambong sa mga miting sa Simbahan, ug nag-focus sa mga panalangin sa akong kinabuhi. Isip resulta, nagsugod og kawala ang kasakit.
Sa dihang nagkaduol ang akong birthday, nadasig ko nga magpahigayon og salo-salo sa akong birthday sa akong balay ug dapiton ang tanan nakong higala sa Simbahan, lakip ang full-time missionaries. Gusto nako nga akong pamilya mas makaistoryahanay sa mga miyembro sa Simbahan, nga para nako mao ang labing malipayon nga mga tawo sa kalibutan. Alang kanako, ang salo-salo sama lang sa family home evening.
Human niadtong adlawa, ang mga butang nausab. Ang mga misyonaryo welcome na sa among balay ug nahimong mga higala sa akong pamilya. Usa ka adlaw ang akong amahan mipahibalo nga gusto niya ang tanang sakop sa pamilya maminaw sa mga misyonaryo ug manimba. Nakalitan ko.
Tulo ka tuig human sa akong bunyag, ang akong pamilya nabunyagan. Sa baptismal service, ang akong inahan mipamatuod, ug ang akong amahan mipasalamat sa mga misyonaryo. Ang mga miyembro sa ward nahingangha sa ilang pagkakabig.
Sa unsang paagi kini nahitabo? Ang akong pagkamabination sa akong pamilya ug mga tumong nga akong gihimo nakatabang. Apan labaw sa tanan, ang kasingkasing sa akong amahan nahumok tungod sa gugma ug pagkahigala sa mga misyonaryo ug mga miyembro sa ward. Ang tanang miyembro mga misyonaryo tungod sa ilang ehemplo sa pagsunod sa ebanghelyo ni Jesukristo. Mapasalamaton ko kanila ug sa plano sa Langitnong Amahan, nga nakapahimo sa pamilya nga mag-uban sa kahangturan.