Parau poro‘i no te hahaereraa na te mau tuahine, Titema 2012
Te hahaereraa utuafare, e ohipa no te faaoraraa
A tai‘o i teie haapiiraa na roto i te pure, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.
Te Faaroo, Te Utuafare, Te Totauturu
E horo‘a te hahaereraa utuafare i te rave‘a i te mau vahine no te haapa‘o, no te haapuai, e no te haapii te tahi e te tahi—e ohipa mau te reira no te faaoraraa. Na roto i te hahaereraa utuafare, e aupuru te mau tuahine na ni‘a i te i‘oa o te Faaora e e tauturu ratou i te mau vahine ia faaineine no te mau haamaitairaa o te ora mure ore.
« E ti‘a ia tatou ‘ia faaara, ia a‘o, ia faaa‘o, e ia haapii, e ia titau atu (ia vetahi ê) i haere mai i te Mesia ra’(PH&PF 20:59), mai ta te Fatu i parau i roto i ta’na mau heheuraa », te parau ïa a te peresideni Spencer W. Kimball (1895–1985). Ua parau faahou â oia e, « ua riro to outou iteraa papû ei rave‘a faahiahia mau ».1
Mai te mea e, e faarahi tatou te mau tuahine hahaere i to tatou ite i te mau parau mau o te evanelia, e haapuai e e paturu ïa to tatou iteraa papû i te mau tuahine o te faaineine nei no te bapetizoraa e te haamauraa. E tauturu ïa tatou i te mau melo apî ia faatumu i roto i te evanelia. E tauturu ta tatou mau hahaereraa e to tatou here « ia faaho‘i mai i te feia tei mo‘e ê [e] ia tamahanahana i te mau aau o te feia tei to‘eto‘e i roto i te evanelia ».2 E e faaitoito ïa tatou i te mau tuahine ia haere mai i te Mesia ra na roto i te haereraa i te hiero.
« … E faaora outou i te mau varua », te parau ïa a te peresideni Kimball i te mau tuahine hahaere, « e o vai te nehenehe e parau e e rave rahi o te mau taata maitai e te itoito i roto i te Ekalesia i teie mahana e mea itoito no te mea ua haere outou i to ratou mau fare e ua horo‘a outou ia ratou te hoê hi‘oraa apî, te hoê orama apî. Ua iriti outou i te paruru. Ua faaaano outou i to ratou mau iriatai. …
« Ia ite mai outou e, aita outou e faaora noa nei i teie mau tuahine, area râ, ta ratou atoa paha mau tane faaipoipo e to ratou mau utuafare ».3
No roto mai i te mau papa‘iraa mo‘a
Te Parau Haapiiraa e te Mau Parau Fafau 20:59; 84:106; 138:56
No roto mai i to tatou aamu
I to te peropheta Iosepha Semita faati‘araa i te Sotaiete Tauturu, ua parau oia e, eiaha te mau vahine e haapa‘o noa i te mau vêvê, ia faaora atoa râ i te mau varua. Ua haapii atoa oia e, e ohipa faufaa roa ta te mau vahine i roto i te Ekalesia i roto i te opuaraa no te faaoraraa a te Metua i te Ao ra.4 Ma te arata‘ihia e te mau parau tumu tei haapiihia e te peropheta Iosepha Semita, tatou te mau tuahine i roto i te Sotaiete Tauturu e ti‘a ia tatou ia rave amui i te ohipa no te faaineine i te mau vahine e to ratou utuafare no te mau haamaitairaa rarahi a te Atua.
« E aroha na tatou i te tahi e te tahi », te parau ïa a te peresideni Brigham Young (1801–77), « e ia utuutu (te feia) puai i te paruparu i roto atu i te puai, e ia arata‘i te feia e nehenehe e ite i te matapo e tae noa’tu e nehenehe ia ratou ia ite i te e‘a no ratou iho ».5
© 2012 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/11. Parau faati‘a no te iritiraa: 6/11. Iritiraa no Visiting Teaching Message, December 2012. Tahitian. 10372 895
Eaha ta’u e nehenehe e rave ?
-
Nahea te Sotaiete Tauturu i te faaineine ia’u no te mau haamaitairaa o te ora mure ore ?
-
Nahea vau i te faarahi i te faaroo o te feia o ta’u e haapa‘o nei ?