Ua Valaaulia Tagata o le Ekalesia e Faasoa Atu le Talalelei e ala i le Totogi o le Lesitala mo Mekasini
I le avea ai ma supavaisa o le Pulega o Meatotino a le Ekalesia mo Taialani, e taulima ai e Kanogwan Wongwiraphab e le aunoa ia talosaga mai tagata o le Ekalesia mo mea a le Ekalesia e faaaoga e pei o laei paia ma lomiga a le AAG.
Ae sa ofo o ia i se tasi aso ina ua asiasi se fafine i lona ofisa e faafou lana lesitala mo mekasini a le Ekalesia. I lena vaega o le lalolagi, e masani lava ona faafou lesitala a tagata e ala i o latou sui mo mekasini i a latou iunite. Peitai, na faamatala e lea fafine e leai se sui faapena o la latou uarota. O ia o se tagata e Lotu Puta, ma sa ia iloa e uiga i mekasini a le Ekalesia ina ua fai meaalofa atu se tagata o le Ekalesia ia te ia e ala i le lesitalaina o ia mo mekasini.
“Sa amata ona ia faamatala mai ia te au mea matagofie e uiga i mekasini a le Ekalesia ma le taua o na mekasini i lana fanau,” na tusia ai e Sister Wongwiraphab. “Ina ua foi mai lana fanau mai le aoga, ma vaai i mekasini, sa matuai fiafia lava i latou, ma sa vave ona latou faitauina uma.”
Sa viia e le fafine ia mekasini mo lo latou “aoga tele” ma le aoaoina ai o lana fanau i le vaogagana lelei ma le mama. Sa matua faagaeetia lava o ia ma o lea na ia toe faafouina ai lana lava lesitala ma faimeaalofa ai foi i e latou te faigaluega i lona totogia lea o lesitala mo i latou, ina ia mafai ai foi ona manuia ai a latou fanau.
“E oo lava foi i tagata e le auai i le ekalesia, e mafai ona lagonaina ma iloa le taua [o mekasini], ma [latou] mananao ai foi e faasoa atu i isi,” na tusia ai e Sister Wongwiraphab.
O loo fautuaina pea lava pea e taitai o le Ekalesia ia tagata o le Ekalesia e faitau i mekasini a le Ekalesia, ma faasoa atu i isi.
Na faamamafa mai e Elder L. Tom Perry o le Korama a Aposetolo e Toasefululua le aoga tele o mekasini: “O le agaga lelei o loo i totonu o nei mekasini, o le a fesoasoani e faatumulia o outou aiga i le mafanafana, alofa, ma le malosiaga o le talalelei,” na ia saunoa ai (“O Le Taua o le Aiga,” Liahona, Me 2003, 42).
O Elder Craig A. Cardon o le Fitugafulu o loo avea ma Faatonu Lagolago Faapitoa i le Matagaluega a le Perisitua ma Faatonu o mekasini a le Ekalesia, ma ua ia vaaia foi le taua mo tagata uma taitoatasi.
“O mekasini a le Ekalesia o se vaega taua o le siufofoga ta’ita’i o le Ekalesia lea e maua ai ia fautuaga faaperofeta mai le Alii mo fanau uma o vaitausaga uma a lo tatou Tama, e uiga i mataupu e talafeauga ma le lalolagi i ona po nei,” na ia saunoa ai. “O masina taitasi, e i ai tusiga malie ma mananaia e tautalagia ai tulaga e masani ai tagata uma i le lalolagi atoa, pe o ni tagata o le Ekalesia pe leai foi. O tagata uma e sailiili ma le loto i ai i le upumoni, e matua faamanuiaina lava i aoaoga ma taitaiga musuia e maua ai.”
Afai e auina atu e tagata uma o loo lesitala i mekasini a le Ekalesia se meaalofa e lesitala ai se uo e le auai i le ekalesia, e lata i le 1.7 miliona tagata fou e lesitala o le a aumaia i se fesootaiga faaleuo i masina taitasi i le Ekalesia.
E mafai e tagata taitoatasi ona vave ma faigofie ona lesitala i se tasi pe sili atu foi ia mekasini pe lesitala faameaalofa mo se tagata o le aiga po o se uo, e ala i le—store.lds.org—O Le Friend, o le New Era, ma le Ensign e na o le faa-Peretania o loo maua ai, ae o le Liahona, lea o loo maua ai tusiga o loo lolomi i le taimi lava e tasi i mekasini e tolu i le na o le faa-Peretania, o loo maua i le tele o isi gagana.
Ua iloa e se tasi o epikopo i le Siteki a Arisona Peoria o le faameaalofa mo le lesitalaina i se tausaga atoa o le Friend mo tamaiti o lana uarota, o se ala aoga lea e fesoasoani ai e siomia ai i latou i upu a perofeta soifua ma aposetolo.
Na auina atu e Penélope B. Woodward o Texas, ISA, se lesitala faameaalofa o le Liahona i lona tausoga, faapea foi se uo ma se faiaoga i se isi atunuu.
“Ou te faamoemoe o le a fesoasoani i [lo’u tausoga’ e aoao ai i le taua o le osia ma le tausia o feagaiga,” na ia tusi mai ai. Sa ia toe fai mai, o le meaalofa o le lesitala mo le mekasini o se auala e “saunia ai le ala mo [la’u uo] ia i ai se aso e faalogo ai ma talia le talalelei toefuataiina.”
Ina ia oka pe faia se lesitala faameaalofa o le mekasini, alu i le store.lds.org. O loo i ai faamatalaga mo le okaina o le mekasini i le itu agavale o le itulau. O le faagasologa o le okaina i le initoneti, e taiala ai tagata i le faafouga, o lesitalaga fou, ma lesitalaga faameaalofa.
E maua le Store.lds.org i le gagana Saina, Peretania, Farani, Siamani, Italia, Iapani, Korea, Potukale, Rusia, ma le Sipaniolo. O i latou e le tautatala i gagana na, pe le maua ai foi le Initoneti, e mafai ona oka pe faameaalofa ia mekasini e ala i le faafesootai pe asiasi foi i faletusi autu o le Ekalesia, na o loo i ai i le tele o atunuu.
E uunaia tagata o le ekalesia e faasoa atu le talalelei i uo e le lolotu ma aiga i soo se matutua, o tapuaiga, ma siosiomaga e ala i le lesitala faameaalofa mo mekasini a le Ekalesia.
Ata na pueina e Rick Wallace