2012
Wauniki Atail Inou Sarawi Kan
October 2012

Iren Mahsen en Padahk en Pas, Oaktohpe 2012

Wauneki Atail Inou Sarawi Kan

Onopiki ni kapakap iren mahsen wet oh, nin duwen me konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour.

Kilel en Pwihn en Sawas en Lih

Pwoson, Peneinei, Sawas

Padahk en pas wia kasalepen atail mour en tohnpadahk oh ehu wiepen wauneki atail inou sarawi kan ni atail papah oh kakehlailih emenemen. Inou sarawi wia inou sarawi oh poatoapoat nanpwungen Koht oh Sapwellime serihkan. “Ni ansou me kitail kin esehda me kitail wia seri en inou sarawio, kitail kin ese ihs kitail oh dah me Koht kasik sang kitail,” Elder Russell M. Nelson en Pwihn en Wahnpoaron Ehk-riemeno mahsanih. “Sapwellime kosonned ntingdier nan mohngiongitail kan. Ih atail Koht oh kitail iei Sapwellime aramas.”1

Ni atail wia sounpadahk en pas kitail kak kakehlailih irail akan me kitail kin pwarek pwe irail en kolokol arail inou sarawi kan. Ni atail wia met, kitail kin sewese irail kaunop ong kapai kan en mour soutuk. “Lih koaros nan Mwomwohdiso wet me wiadahr inou sarawi rehn Kauno ahniki pwukoa sarawi en sewese doarehla ngehn kan, en kaweid lih kan en sampah, en kakehlailih ihmw kan nan Saion, oh en kairada wehin Koht,”2 Elder M. Russell Ballard en Pwihn en Wahnpoaron Ehk-riemeno mahsanih.

Ni atail kin wiahda oh kolokol inou sarawi kan, kitail kin wiahla dipwisoun doadoahk nin limen Koht. Kitail pahn kak en kasalehda ni sansal me kitail kamehlele oh kakehlailih ahn emenemen ah pwoson Sahm Nanleng oh Sises Krais.

Sang Pwuhk Sarawi Kan

1 Nephi 14:14; Mosiah 5:5–7; 18:8–13; Doctrine and Covenants 42:78; 84:106

Sang Atail Poadoapoad

Tehnpas sarawi iei wasahn kaping kalahngan ong souleng koaros, Kauno ketin kasalehiong Soukohp Joseph Smith nan 1833. E wia wasahn padahk ong koaros me lukodohng doadoahk en kalohk nan arail pwukoa malipilip oh pwukoa teikan; pwe irail en unsekla nan arail wehwehki arail kalohk, ni madamadau, ni koasoandi, oh ni padahk, nan soahng koaros me pid wehin Koht pohn sampah (tehk D&C 97:13–14).

Lih akan en Pwihn en Sawas en Lih nan Nauvoo, Illinois, nan pahr 1840 samwa sewese emenemen en kaunop ong alehdi tiahk sarawi kan en tehnpas sarawio. Nan tiahk sarawi kan en priesthood ileile me Souleng en Imwin Rahn akan alehdi nan Tehnpas Sarawi en Nauvoo manaman en Koht sansal[da] tehk D&C 84:20). “Ni Souleng kan arail kolokol inou sarawi kan, manaman wet kehlailla oh utung irail nan arail kahpwal kan nan rahn oh sounpar akan me kohdo mwuri.”3

Nan Mwomwohdiso rahn wet, lih oh ohl loaloapwoat nan sampah pwon kin papah nan tehnpas sarawi oh kin diar kehlail nan kapai kan me kin alahldi ihte sang inou sarawi kan en tehnpas sarawi.

© 2012 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/11. Kamanaman ong kawehwe: 6/11. Kawehwehpen Visiting Teaching Message, October 2012. Pohnpeian. 10370 885

Iren sawas akan

  1. Russell M. Nelson, “Covenants,” Liahona, Nohpempe 2011, 88.

  2. M. Russell Ballard, “Women of Righteousness,” Liahona, Tihsempe 2002, 39.

  3. Daughters in My Kingdom: The History and Work of Relief Society (2011), 133.

Dahme I Kak Wia?

  • Ia duwen ahi inou sarawi kan ahr kin kakehlailihie?

  • Ia duwen ahi kin sewese rie lih akan en kolokol arail inou sarawi kan?