Mensahe sang Unang Panguluhan, Agosto 2012
Ang Panawagan sang Manluluwas nga Mag-alagad
Ang tanan nga nakatuon sang mathematics nakahibalo kon ano ang common denominator. Para sa mga Santos sa Ulihing mga Adlaw, may yara sang common denominator ukon pareho nga kahimtangan nga nagabugkos sa aton. Ina nga common denominator amo ang indibidwal nga panawagan nga ginabaton sang kada isa sa aton sa pagtuman sang mga takay sa ginharian sang Dios diri sa duta.
Nagakumodkumod ka bala kon may tawag nga nagaabot sa imo? Ukon ginabaton mo nga may pagpasalamat ang tagsa ka oportunidad sa pag-alagad sa imo mga kauturan, nga nakahibalo nga ang aton Amay nga Langitnon magabugay sa ila nga Iya ginatawag?
Ginalauman ko nga indi madula sa aton ang matuodtuod nga katuyuan sang aton importante nga mga oportunidad sa pag-alagad. Inang katuyuan, inang wala’y katapusan nga lalab-uton, ang amo man nga ginsiling sang Ginuo kag makita sa Pearl of Great Price. “Kay yari karon, amo ini ang akon buluhaton kag ang akon himaya—ang magpahanabo sang imortalidad kag wala’y katapusan nga kabuhi sang tawo.”1
Kabay nga padayon naton nga dumdumon nga ang kunop sang pagkamiyembro sa Ang Simbahan ni Jesucristo sang mga Santos sa Ulihing mga Adlaw indi isa ka kunop sang kasulhay kundi sina sang responsibilidad. Ang aton tulumanon, dugang sa pagluwas sang aton kaugalingon, amo ang paggiya sa iban padulong sa selestiyal nga ginharian sang Dios.
Paagi sa kinabubut-on nga paglakat sa banas sang pag-alagad sa Dios, indi gid kita mangin yara sa posisyon ni Cardinal Wolsey sa ginsulat ni Shakespeare. Nga ginkakasan sing gahum pagkatapos sang iya bug-os-kabuhi nga pag-alagad sa iya hari, masubo sia nga nagbalakhuon:
Kon gin-alagaran ko lang kuntani ang akon Dios bisan katunga
Sang pag-alagad ko sa akon hari, indi Niya ako pagpabay-an sa akon katigulangon
Nga hublas sa atubang sang akon mga kaaway.2
Ano nga sahi sang pag-alagad ang ginapangayo sang langit? Ang Ginuo, paagi kay Joseph Smith, nagsiling nga Sia nagapangayo sang tagipusuon kag handa nga pamensaron; kag ang handa kag matinumanon magakaon sang kabuganaan sang duta sang Sion sa sining ulihing mga adlaw.3
Nagadulog ako kon akon ginapanumdum ang mga pulong ni Pangulong John Taylor (1808–87): “Kon wala ninyo ginapabaskog ang inyo mga palangakuan, ang Dios magatudlo sa inyo nga responsable para sinang inyo kontani naluwas kon inyo lamang ginhimo ang inyo tulumanon.”4
Kasubong sang isa ka masanag nga suga sang kaayuhan amo ang kabuhi ni Jesus sang Sia nag-alagad sa tunga sang katawhan. “Yari ako sa tunga ninyo subong sang nagaalagad,”5 pahayag ni Jesus samtang Sia nagahatag sing kusog sa mga tiil sang inutil, panulok sa mga mata sang bulag, palamatin-an sa mga dulunggan sang bungol kag kabuhi sa lawas sang patay.
Paagi sa paanggid sang Maayo nga Samariahanon, ang Maestro nagtudlo sa aton nga higugmaon ang aton isigkatawo subong sang aton mga kaugalingon.6 Paagi sa Iya sabat sa manggaranon, lamharon nga hari, gintudloan Niya kita nga dulaon ang aton kadalok.7 Paagi sa pagpakaon sang 5,000 [ka tawo], gintudloan Niya kita nga atipanon ang mga panginahanglan sang iban.8 Kag paagi sa Wali sa Bukid, gintudloan Niya kita nga unahon sa pagpangita ang ginharian sang Dios.9
Sa Bag-o nga Kalibutan, ang nabanhaw nga Ginuo nagpahayag, “Inyo nahibal-an ang mga butang nga kinahanglan gid ninyo nga pagahimuon sa akon simbahan; kay ang mga buluhaton nga inyo nakita nga ginahimo ko, ina amo man ang inyo himuon; kay inang inyo nakita nga akon ginahimo, bisan ina man ang inyo himuon.”10
Ginabugayan naton ang iban samtang nagaalagad kita sa landong ni “Jesus nga Nazaretnon … nga naglibot nga nagahimo sang kaayuhan.”11 Bugayan kita sang Dios nga masalapuan ang kalipay sa pag-alagad sa aton Amay sa Langit sa aton pag-alagad sa Iya mga kabataan sa duta.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, August 2012. Hiligaynon. 10368 861
Pagtudlo gikan sa Sining Mensahe
[Ang Ginuo] indi magatugot nga mapaslawan kita kon aton ginahimo ang aton bahin. Iya kita nga pabaskugon nga labaw pa sangsa aton kaugalingon nga mga talento kag mga abilidad. … Amo ina ang isa sa pinakamanami nga eksperiyensya nga sarang mag-abot sa isa ka tinuga” (Ezra Taft Benson, sa Teaching, No Greater Call [1999], 20). Binagbinaga ang pagpaambit sang isa ka eksperiyensya sang ikaw ukon isa mo nga kakilala nakabatyag nga ginpabaskog sang Ginuo ang iya mga talento kag mga abilidad. Agdaha ang panimalay sa pagpaambit sang pila nila ka positibo nga mga eksperiyensya sang sila nagsabat sa “panawagan sang Manluluwas nga mag-alagad.”