Carole M. Stephens
Fesoasoani Muamua i le Au Peresitene Aoao o le Aualofa
E i ai pea ia Carole Manzel Stephens se faaaloalo mo mea paia ma le mamalu. Sa amata lena migao a o laitiiti lava o ia, ina ua faamauina lona aiga i le malumalu lea sa sosoo ma le liliu mai o lona tina i le talalelei.
“Ou te lei malamalama i mea uma sa tutupu,” sa saunoa ai le fesoasoani fou muamua i le au peresitene aoao o le Aualofa. “Ae sa ou iloaina sa faapitoa. Sa lava lou matua e manatua ai le malumalu o se nofoaga paia.”
Sa fanau ia Mati 1957 ia Carl L. ma Forest Manzel, o Sister Stephens o le lona tolu o le fanau e toaiva ma sa soifua ae i Ogden, Iuta, ISA. Na te manatuaina lelei ia faataitaiga a ona matua o auaunaga, ositaulaga, ma le uiga o le avea o le aiga ma le Ekalesia ma mea e sili ona faamuamua.
“Sa avea le talalelei ma mea uma ia i latou, ma sa la faaalia mai ia i matou e ala i faataitaiga le uiga o auaunaga faaKeriso,” sa ia saunoa ai. “Sa la aoao i matou i le uiga o le auauna atu—pe faapefea moni lava ona auauna atu.”
A o auauna atu ona matua i tulaga eseese, sa la faaaofia ai ma le la fanau. O taimi na sa latou atiae ai ni faauoga o le tasi ma le isi—o se mea o loo ia taumafai ma lona toalua, o Martin “Marty” Stephens, e fai i le laua lava fanau e toaono.
Sa feiloai o ia ma Martin a o auai ai i le Iunivesite a le Setete Weber i Ogden, Iuta, lea sa ia suesue ai i aoga amata a tamaiti. Sa la faaipoipo ia Aperila 1976 i le Malumalu o Logan Iuta. Sa fai mai Sister Stephens o ia ma lona toalua sa avea pea ma se “au” i le aluga o tausaga a o la felagolagomai i tofiga eseese, e aofia ai ona valaauga o se peresitene o le Aualofa a le siteki ma le uarota, fesoasoani, ma se faiaoga; peresitene o Tamaitai Talavou a le uarota; fesoasoani o le Peraimeri a le uarota, faiaoga, ma le taitai o le Cub Scout; faiaoga o le seminare; faifeau faamisiona o auaunaga a le Ekalesia.
“I le pisi uma, ua matou maua ai le tele o le olioli ma le fiafia,” sa ia fai mai ai. “Ua ma faaaofia ai le ma fanau ma le fanau a le ma fanau i a ma auaunaga. Ona o lena mea, ua matou atiae ai ni sootaga malolosi faaleaiga a o matou auauna atu faatasi.”