Me Pwulopwul Kan
Kaweid sang Soukohp Ieias
Ni ahi sounpar 16, I ahniki ansou mwahu en kohla Salt Lake City ni tepin ei iang towehda tiepene lap. Ahi peneinei kin kousoan nan western Oregon, USA, oh se diraip lel Utah pwehn towehda tiepene lapo oh en wahla riei pwutak laudo ni wasahn kaiahn misineri.
I kohla ni tiepene lapo ni ei inangih en alehdi padahk sang Ngehn Sarawi. Imwilahn met, I alehdi kamarain sang Ngehno me mwein I sohte pahn alehdi ma I sohte pein kaunop nan kapehdi.
Ni ehu mihting ko, koaruhsiehn kesihnenda oh kouliki koul en sarawi, “Guide Us, O Thou Great Jehovah.” Ni aht wie kokoul, I ahniki pepehm sansal me I en kilangseli nan imwen Conference Center. I wia met oh pwuriamweiki manaman en minimin en aramas kidkei ni aht koaros wie kokouliki aht kaping ong Koht.
Eri irair ehu lelohngie duwehte Nephi ansou me e kilangada kasansal en tuhkehn mouro, pwe Ngehno mahsanihongie, “Kilang” (tehk 1 Nephi 11–14). I kilenglahng President Thomas S. Monson oh pehm me minimin en Mwomwohdiso mie pwehki kitail kaweid sang soukohp ieias. Sang kadehde en Ngehn Sarawi, I ese me President Monson iei soukohp mehlel ong atail mwehi, oh I ese me Sises Krais kin ketin kaweid Mwomwohdiso wet sang ih.