Among Amahan sa Langit

Nasayud kita kabahin sa Langitnong Amahan gikan sa pagsugod sa atong kasinatian sa Simbahan—gikan sa una natong pag-ampo ngadto sa una natong pagkanta og “Ako Anak sa Dios” (Mga Himno ug mga Awit sa mga Bata, nu. 58). Ang nahibaloan sa mga Santos sa Ulahing mga Adlaw kabahin sa Dios Amahan walay kapareha, ug kini nakahimo sa tanang kalainan ngari kanato.

Ang Pagkakita sa Amahan

Ania ang tulo ka mga panghitabo sa kasulatan kabahin sa mga tawo nga nakakita sa Amahan:

• Esteban (tan-awa sa Mga Buhat 7:56)

• Joseph Smith (tan-awa sa Joseph Smith—Kasaysayan 1:17)

• Sila si Joseph Smith ug Sidney Rigdon (tan-awa sa D&P 76:20)

Apan, si Jesus miingon, “ang nakakita kanako nakakita sa Amahan” (Juan 14:9).

Tinuod ug INDIBIDWALnga Binuhat

“Usa sa importanting mga doktrina niini nga Simbahan mao ang atong pagtuo sa Dios ang Mahangturong Amahan. Usa siya ka tinuod ug indibidwal nga binuhat. Siya mao ang Tigdumala sa kalibutan, bisan pa niana Siya ang atong Amahan, ug kita Iyang mga anak.

“Kita mag-ampo ngadto Kaniya, ug kadtong mga pag-ampo mao ang panag-istoryahanay tali sa Dios ug sa tawo. Nakasiguro ako nga Siya maminaw sa atong mga pag-ampo ug motubag niini.”

Presidente Gordon B. Hinckley (1910–2008), “Ang mga Butang nga Akong Nahibaloan,” Liahona ug Ensign, Mayo 2007, 83.

Ang Bugtong Tinuod nga Dios

“Ang Amahan mao ang bugtong tinuod nga Dios. Kini nga butang sigurado: walay makalabaw Kaniya; walay makapuli Kaniya. … Siya mao si Eloheim, ang Amahan. Siya ang Dios. Siya ang bugtong Amahan.”

Presidente Boyd K. Packer, Presidente sa Korum sa Napulog Duha ka mga Apostoles, “The Pattern of Our Parentage,” Ensign, Nob. 1984, 69.

Pagpaminaw sa Amahan

Kon ang Dios Amahan mosulti, Siya mosaksi sa Iyang Pinalanggang Anak, si Jesukristo. Sama pananglit:

• Sa bunyag ni Jesus (tan-awa sa Mateo 3:17)

• Sa Bungtod sa Transpigurasyon ngadto nila ni Pedro, Santiago, ug Juan (tan-awa sa Mateo 17:5)

• Sa usa ka pinadayag ngadto kang Nephi (tan-awa sa 2 Nephi 31:11, 15)

• Sa pagpakita ni Jesus ngadto sa Amerika (tan-awa sa 3 Nephi 11:7)

• Sa Unang Panan-awon (tan-awa sa Joseph Smith—Kasaysayan 1:17)

Ang Misyon sa Manluluwas sa Pagpadayag sa Amahan

“Sa tanang gisulti ug gibuhat ni Jesus, … Siya nagpakita kanato kon kinsa ug unsa gayud ang Dios ang atong Mahangturong Amahan, unsa ka hingpit ang Iyang pagkamaunungon ngadto sa Iyang mga anak sa tanang dispensasyon ug nasud. Sa pulong ug sa buhat si Jesus naninguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit.”

Elder Jeffrey R. Holland sa Korum sa Napulog Duha ka mga Apostoles, “Ang Kahalangdon sa Dios,” Liahona ug Ensign, Nob. 2003, 70.

Langitnong mga Ginikanan: Usa ka Gamhanan nga Kamatuoran

“Ikonsiderar ang gahum sa ideya nga gitudlo sa atong gihambin nga kanta nga ‘I Am a Child of God’ (Hymns, 1985, nu. 301). … Ania ang tubag sa usa sa dakong mga pangutana sa kinabuhi, ‘Si Kinsa Ko?’ Ako anak sa Dios nga may espiritwal nga kagikan sa langitnong mga ginikanan. Kana nga pagkaginikanan nagpasabut sa atong mahangturong potensyal. Kana nga gamhanang ideya usa ka epektibong pagpawala sa tumang kasubo. Kini makapalig-on kanato sa paghimo og matarung nga mga pagpili ug sa pagtinguha sa labing maayo nga anaa kanato.”

Elder Dallin H. Oaks sa Korum sa Napulog Duha ka mga Apostoles, “Powerful Ideas,” Ensign, Nob. 1995, 25.

Si Joseph Smith Nagtudlo kabahin sa Dios Amahan

Si Joseph Smith mitudlo kanato og daghan kabahin sa tinuod nga kinaiya sa Dios tungod kay iyang nakita ang Langitnong Amahan ug si Jesukristo ug nakadawat og daghang mga pagpadayag.

Unsa Siya nga matang sa pagkatawo? “Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan!”¹

Unsa man ang Iyang panagway? “Ang Amahan adunay lawas nga unod ug mga bukog nga mahikap ingon sa tawo.”² “Kon kamo makakita Kaniya karon, makakita kamo Kaniya sama sa porma sa usa ka tawo—sama sa inyong mga kaugalingon.”³

Unsa man ang atong relasyon sa Ginoo? “Kon ang mga tawo dili makasabut sa kinaiya sa Dios, sila wala makasabut sa ilang mga kaugalingon.”⁴ “Ang Halangdong Ginikanan sa kalibutan nagtan-aw sa kinatibuk-ang tawhanong pamilya … isip Iyang mga anak.”⁵

Nganong Iyang giestablisar ang plano sa kaluwasan alang kanato? “Ang Dios mismo sa kaugalingon, nakakita nga siya anaa sa taliwala sa mga espiritu ug kahimayaan, … [pagmugna] og mga balaod diin ang uban makabaton og kahigayunan sa pag-uswag sama sa iyang kaugalingon.”⁶

Unsa ang yawe aron mas mahiduol sa Dios? “Kon kita makasabut sa kinaiya sa Dios ug nasayud unsaon sa pagduol ngadto Kaniya, Iyang buksan ang mga kalangitan ngari kanato.”⁷

Mubo nga mga sulat

1. Mga Pagtulun-an sa mga Presidente sa Simbahan: Joseph Smith (2007), 48.

2. Doktrina ug mga Pakigsaad 130:22.

3. Teachings: Joseph Smith, 40.

4. Teachings: Joseph Smith, 40.

5. Teachings: Joseph Smith, 39.

6. Teachings: Joseph Smith, 210.

7. Teachings: Joseph Smith, 40–41.

Ang Unang Panan-awon, ni Gary L. Kapp