Parau poro‘i na te mau tuahine hahaere, Fepuare 2012
E mau tia‘i no te utuafare
A tai‘o i teie haapiiraa, e mai te mea e tano, a aparau i te reira i te mau tuahine o ta outou e hahaere ra. A faaohipa i te mau uiraa no te tauturu ia outou ia haapuai i te mau tuahine e ia faariro i te Sotaiete Tauturu ei tuhaa itoito no to outou iho oraraa.
Te Faaroo, Te Utuafare, Te Tauturu
« O outou te tia‘i o te utuafare », te parau ïa a te peresideni Gordon B. Hinckley (1910–2008) a faaite ai oia i « Te Utuafare : E Poro‘i i to te Ao nei » i roto i te putuputuraa rahi na te Sotaiete Tauturu i te matahiti 1995. « O outou o te fanau i te mau tamarii. O outou o tei aupuru ia ratou e o tei haamau i roto ia ratou te mau peu no to ratou oraraa. Aita’tu e ohipa e piri atu i te atuaraa mai te aupururaa i te mau tamaroa e te mau tamahine a te Atua ».1
Fatata 17 matahiti i teie nei to teie faaararaa faaiteraa e, ta tatou mau hopoi‘a faufaa roa a‘e, ua faatumuhia ïa i ni‘a i te haapuairaa i te mau utuafare e te mau nohoraa, noa’tu te huru o to tatou oraraa i teie nei. Tei roto o Barbara Thompson, tauturu piti i teie nei i roto i te peresideniraa rahi o te Sotaiete Tauturu, i te Fare Menemene no Roto Miti, i te taime a tai‘o matamua ai te peresideni Hinckley i te faaararaa. « E taime faahiahia mau taua taime ra », ta’na ïa e haamana‘o ra. « Ua ite au i te auraa o te poro‘i. Ua parau vau ia’u iho e, ‘Teie te hoê arata‘iraa faahiahia na te mau metua. E hopoi‘a rahi atoa na te mau metua.‘Ua mana‘o vau no te hoê taime e, aita te reira i tano maitai ia’u no te mea aita vau i faaipoipohia e aita ta’u e tamarii. Area râ ua mana‘o vitiviti ihora vau e, ‘Tera râ, e tano atoa te reira ia’u. E melo vau no te hoê utuafare. E tamahine au, e tuahine, e metua vahine fetii, e tuahine fetii, e tamahine fetii, e e mootua tamahine. E hopoi‘a— e e haamaitairaa ta’u— no te mea e melo vau no te hoê utuafare. Noa’tu e o vau ana‘e te melo e ora nei no to’u nei utuafare, e melo noa â vau no te utuafare a te Atua, e e hopoi‘a na‘u ia tauturu i te haapuai i te tahi atu mau utuafare.’ »
Aua‘e râ, aita tatou i vaiiho otahi-noa-hia i roto i ta tatou mau tautooraa. Te parau ra te Tuahine Thompson e, « Te tauturu rahi a‘e e roaa ia tatou i roto i te haapuairaa i te mau utuafare, o te iteraa ïa e te peeraa i te mau haapiiraa a te Mesia e ia ti‘aturi Ia’na no te tauturu ia tatou ».2
No roto mai i te mau papa‘iraa mo‘a
Maseli 22:6; 1 Nephi 1:1; 2 Nephi 25:26; Alama 56:46–48; Te Parau Haapiiraa e te Mau Parau Fafau 93:40
No roto mai i to tatou aamu
« I te taime a tavini ai te tuahine Bathsheba W. Smith te maharaa o te peresideni rahi o te Sotaiete Tauturu [mai te matahiti 1901 tae atu i te1910], ua ite oia i te hinaaro ia haapuai i te mau utuafare, no reira oia i haamau ai i te mau haapiiraa na te mau metua vahine no te mau tuahine no te Sotaiete Tauturu. Tei roto i te mau haapiiraa te a‘o no ni‘a i te faaipoiporaa, te atuaturaa hou te fanauraa, e te aupururaa i te tamarii. Ua paturu teie mau haapiiraa i te mau haapiiraa a te peresideni Joseph F. Smith no ni‘a i te tautururaa a te Sotaiete Tauturu i te mau vahine i roto i ta ratou mau ohipa i te utufare:
« ‘I te mau vahi atoa te vai nei te ite-ore aore râ te taa-ore-raa no ni‘a i te utuafare, te mau ohipa a te utuafare, no ni‘a i te mau titauraa e vai nei e e ti‘a ia vai mai i rotopu i te tane e te vahine faaipoipo e i rotopu i te mau metua e te mau tamarii, te vai nei ïa teie faanahonahoraa i piha‘iho noa, e na roto i te mau horo‘araa a te natura e te faaûruraa a teie faanahonahoraa ua faaineinehia e ua ineine ratou i te horo‘a i te haapiiraa no ni‘a i taua mau ohipa faufaa rahi ra.’ »3
© 2011 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane: 6/10. Parau faati‘a no te iritiraa: 6/10. Iritiraa no Visiting Teaching Message, February 2012. Tahitian. 10362 895
Eaha ta’u e nehenehe e rave?
-
Nahea e ti‘a ai ia’u ia tauturu i te mau tuahine ta’u e haapa‘o nei ia haapuai i te mau utuafare ?
-
Nahea vau e riro ai ei mana faaûru maitai i roto i to’u utuafare ?