Namulong Karong Adlawa
Sila Elder Ballard, Elder Jensen Mibisita sa mga Miyembro sa Mexico
Atol sa tapos sa semana niadtong Septyembre 10–11, 2011, si Elder M. Russell Ballard sa Korum sa Napulog Duha ka mga Apostoles ug si Elder Jay E. Jensen sa Kapangulohan sa Seventy nakighimamat sa mga miyembro ug mga misyonaryo sa Cuernavaca, Mexico. Si Elder Ballard miawhag sa mga miyembro nga itanom ang ebanghelyo diha sa mga kasingkasing sa katawhan sa Mexico pinaagi sa mga espirituhanong mga kasinatian. “Adunay daghan kaayo nga pagdawat sa ebanghelyo diha sa hunahuna nga wala makasinati sa espirituhanon nga pagdawat,” siya miingon. “Ang halawom nga pagkakabig sa espiritu gikinahanglan sa atong mga miyembro aron mapabati sa ilang mga kasingkasing unsa ang nadawat sa ilang hunahuna.”
Sila Elder Oaks, Elder Andersen Mibisita sa Peru, Bolivia
Niadtong Agosto 2011 si Elder Dallin H. Oaks ug si Elder Neil L. Andersen sa Korum sa Napulog Duha ka mga Apostoles mibiyahe ngadto sa Bolivia ug Peru sa South America. Ang mga mensahe ni Elder Andersen naglakip sa iyang panudlo nga sa tibuok kalibutan, ang tanang tawo nanlimbasug sa pagpili tali sa maayo ug dautan. “Ang kalisud sa paghimo og desisyon kabahin sa pagkamortal managsama ra gayud alang kaninyo ingon man kanako,” siya miingon. “Ania kita dinhi aron makat-on sa pagpuyo uban sa hugot nga pagtuo.”
Si Elder Bednar Nagtuman og Buluhaton sa Europe
Atol sa unang bahin sa Septyembre, si Elder David A. Bednar sa Korum sa Napulog Duha ka mga Apostoles nakighimamat sa mga Santos sa England, Germany (diin di53dto siya miserbisyo isip full-time nga misyonaryo dul-an sa 40 ka tuig na ang milabay), ug Denmark. Sa matag tigum, si Elder Bednar mitudlo sa doktrina ni Kristo ug mihatag og gibug-aton sa gahum sa Pag-ula. Siya usab padayon nga mitudlo sa baruganan sa matarung nga kabubut-on ug sa atong indibidwal nga responsibilidad sa pagbuhat. “Ang matarung nga kabubut-on mao ang gahum ug kapasidad sa gawasnong pagbuhat,” siya miingon. “Ug samtang kita mobuhat nga tukma ug sumala sa mga pagtulun-an ni Jesukristo, ang atong kinaiya mismo mausab pinaagi sa Iyang Pag-ula ug pinaagi sa gahum sa Espiritu Santo.”
gilitratohan ni Craig T. Olson