Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Ang Doktrina kabahin sa Amahan,” pahina 20: Sugdi pinaagi sa paghangyo sa mga miyembro sa pamilya sa pagpakigbahin unsay ilang nahibaloan kalabut sa kinaiya sa Langitnong Amahan. Hisguti ang artikulo, i-summarize ang mga punto nga gihimo sa matag seksyon nga naghatag og panabut kon si kinsa ang Dios nga Amahan. Ikonsiderar ang pagtapos uban sa inyong pagpamatuod sa gugma sa Langitnong Amahan ug sa Iyang Anak, si Jesukristo.

“Kini ang Inyong Buhat,” pahina 42: Una, basaha ang sidebar nga giulohan og “Unsa ang Akong Mahimo?” ug pagpili og usa sa mga ideya nga makatabang sa inyong pamilya nga moapil sa family history ug buhat sa templo (tan-awa usab lds.org/familyhistoryyouth). Atol sa family home evening, basaha ang artikulo uban sa inyong pamilya ug dayon pangutan-a unsa nga mga panalangin ang gisaad ni Sister Beck niadtong moapil niining importante nga buhat. Buhata ang ideya nga inyong giplano ug ikonsiderar ang pagpadayon niini nga proyekto sa umaabut nga mga semana.

“Ang Malumo nga mga Kalooy sa Ginoo,” pahina 48: Basaha ang istorya sa batan-ong pamilya nga nakadawat og espesyal nga kard sa Pasko ug ang istorya sa lider sa priesthood kinsa nakat-on sa mga ngalan sa kabatan-onan sa iyang stake. Hangyoa ang mga miyembro sa pamilya sa paghunahuna sa malumong mga kalooy nga ilang nadawat gikan sa Ginoo. Ikonsiderar ang pagpangutana, “Unsa ang malumong mga kalooy? Kinsa ang modawat sa malumong mga kalooy? Unsaon ninyo sa pagpakita og pasalamat sa malumong mga kalooy nga inyong nadawat?” Mahimo ninyong suportahan gamit ang mga tubag ni Elder Bednar niini nga mga pangutana gikan sa artikulo.

“Unplugged,” pahina 61: Basaha unsa ang gihimo niini nga mga bata ug sa ilang mga pamilya aron makaangkon og maayong paggamit sa media. Mahimo ninyong hisgutan unsaon sa inyong pamilya nga makahimo og balanse nga paggamit sa TV, computer, ug ubang “screen time.” Sa kinatibuk-ang komperensya sa Oktobre 2011, si Elder Ian S. Ardern sa Seventy namulong kabahin sa maalamong paggamit sa nagkalain-laing mga teknolohiya: “Kining mga butanga mga maayo, dili kita makatugot niini nga makapadaplin niadtong mga butang nga labing importante” (“Oras sa Pagpangandam” Liahona ug Ensign, Nob. 2011, 32). Ikonsiderar ang paghimo og mga tumong nga susama niadtong anaa niini nga artikulo aron ang inyong panimalay mahimong usa ka dapit diin ang Espiritu makapuyo.

Mga Leksyon sa Dominggo sa Lunes sa Gabii

Gusto gayud nako nga adunay epektibo nga leksyon sa family home evening matag semana, apan ang paghunahuna og hilisgutan ug pag-andam sa leksyon sa kanunay mga hagit alang kanako.

Usa ka Lunes nakalimot ko pag-andam og leksyon. Apan dayon akong naamguhan ang nakatagong panalangin isip usa ka magtutudlo sa Primary. Bag-ohay lang kong gitawag nga motudlo sa mga singko anyos ug nakatudlo og usa ka leksyon sa miaging adlaw. Nakahukom ko nga mogamit og minubo (ug tukma sa edad) nga bersyon sa unsay akong gitudlo nianang Dominggo alang sa FHE. Nianang Lunes sa gabii naghisgut kami kabahin sa pagkamasulundon, ug akong gibalik pagsaysay ang tulo ka mga istorya nga akong gipaambit sa Primary sa miaging adlaw.

Ang pagpahiangay sa akong leksyon sa Primary ngadto sa akong pamilya usa ka maayong paagi alang kanako nga makab-ot ang akong tumong nga adunay maayong pagkaandam ug epektibo nga leksyon sa family home evening matag semana.

Christina Sherwood, Arizona, USA