Ennaan eo an Būreejtōnji eo Kein Kajuon, Jānwōde 2012
Mour juon Mour Ejeram̧m̧an
Ilo jinoin juon iiō kāāl, Ij idajon̄jon̄e Armej ro Rekwojarjar ilo Raan-ko Āliktata aolep jikin n̄an bōk juon em̧m̧akūt an juon make, etiljek, eaorōk n̄an ta eo Ij ņa etan mour ejeram̧m̧an—juon mour eobrak kōn jeram̧m̧an in tōprak, em̧m̧an, im kōjeram̧m̧an ko. Ejja āinwōt ad kar katak ABC ko ilo jikuuļ, Ij lewaj ABC ko aō make n̄an jipan̄ kōj aolep bōk juon mour ejeram̧m̧an.
Bōk juon M̧wil Em̧m̧an
A ilo ABC ko aō ej kōnono kōn attitude(m̧wil). William James, juon American bainieer psychologist im philosopher, eaar je, “oktak eo em̧ōkaj eļaptata an epepen in ad ej ekkatak bwe armej ro, kōn ukōt m̧wil ko ilowa in ļōmņak ko aer, maron̄ ukōt paotok ko itulik in mour ko aer.”1
Elōn̄ men ko ilo mour in rej pedped ioon m̧wilid. Wāween eo jej kālet n̄an lo men ko im uwaake ro jet ekōm̧m̧ane aolep oktak ko. N̄an kom̧m̧m̧ane ijo em̧m̧an tata jemaron̄e innām n̄an kālōt n̄an m̧ōņōņō kōn jekjek ko ad, jekdo̧o̧n ta ko remaron̄ in, maron̄ bōktok aenōm̧m̧an im laudin̄din̄.
Charles Swindoll—rijeje, rikatakin, im Rikabun̄—eaar ba: “M̧wil, n̄an n̄a, eļapļo̧k an aorōk jān … jem̧aanļo̧k, … jān jāān, jān jekjek ko, jān likjab ko, jān tōprak ko, jān ta eo ro jet rej ļōmņak ak ba ak kōm̧m̧ane. Eļapļo̧k an aorōk jān paotok, māletlet, ak kapeel. Enaaj kōm̧m̧an ak kakkure juon kom̧bani, juon kabun̄, juon em̧. Men eo ekabwilōn̄lōn̄ ej bwe ewōr ad kālōt aolep raan ikkijien m̧wil eo jenaaj bōke ilo an raan eo.”2
Jejjab maron̄ kōjbwebweik kōto, bōtaab jemaron̄ ukukōt wōjļā ko. N̄an lem̧ōņōņō eo, aenōm̧m̧an, im laudin̄din̄ eo eļap, kōm̧m̧an bwe jān kālōt juon m̧wil em̧m̧an.
Tōmak ilo Kwe make
B ej n̄an believe(tōmak)—ilo kwe make, ilo ro ipeļaakūm̧, im ilo pedped ko indeeo.
M̧ool n̄an kwe make, ro jet, im n̄an Jemam̧ Ilan̄. Juon eo eaar jab m̧ool n̄an Anij m̧ae iien eo eaar kanooj rum̧wij eaar Cardinal Wolsey ekkar n̄an Shakespeare, joļo̧k an mour ilo jerbal in jipan̄ n̄an jilu irooj ro im kar lem̧ōņōņō kōn m̧weie im kajoor. Āliktata, kar joļo̧ke jān kajoor im m̧weie ko an jān juon kiin̄ ejjab kijenmej. Cardinal Wolsey eaar jan̄:
Eļan̄n̄e Iaar jerbal wōt n̄an aō Anij kōn jimettan wōt itok limo
Iaar jerbal n̄an aō kiin̄. Eban kar dettan wōt n̄a
Kar likūt eō kelwaan n̄an rikejdet ro aō.3
Thomas Fuller, juon English rikabun̄ im ribwebwenato eo eaar mour ilo 17th epepen, kar kōmejajaik m̧ool in: “Eo ejjab mour ekkar n̄an tōmak eo an ejjab lukkuun tōmak.”4
Jab kōm̧m̧an jon̄an n̄an kwe make im jab kōtļo̧k bwe ro jet ren kareel eok bwe ewōr jon̄am̧ ilo ta eo komaron̄ kōm̧m̧ane. Tōmak ilo kwe make innām mour ekkar n̄an tōpar aorōk ko am̧.
Komaron̄ tōpar ta eo kwoj tōmak komaron̄e. Lōke im tōmak im bōk tōmak.
Jelm̧ae Apan̄ ko kōn Peran
Peran ej erom juon wānōk eo eļap tokjen im ļap meļeļein n̄e ļōmņak kake ejjab kanooj ļap āinwōt juon m̧ōņōņō in mej ilo kanniōk bōtaab āinwōt juon kijejeto n̄an mour jeram̧m̧an.
Rijeje essay im poem̧ in America eo Ralph Waldo Emerson eaar ba: “Jekdo̧o̧n ta eo kwoj kōm̧m̧ane, kwoj aikuj peran, jekdo̧o̧n ta iaļ eo kwoj ļōmņake, iien otemjej enaaj wōr juon eo ej jiron̄ eok bwe kobōd. Iien otemjej ewōr apan̄ ko rej waļo̧k me rej kapoik eok n̄an tōmak bwe ro rej kōrraat e eok rejim̧we. N̄an jaate juon iaļ in jerbal im ļoor e n̄an jem̧ļo̧k in ej aikuji jet iaan ejja peran eo wōt me juon ritariņae ej aikuji. Aenōm̧m̧an ewōr an anjo ko, bōtaab ej aikuj em̧m̧aan im kōrā ro reperan n̄an wiin er.”5
Enaaj wōr iien ko me kwonaaj mijak im ebbwer. Komaron̄ in en̄jake bwe koluuj. Kōtmāne ko an bōk anjo emaron̄ in waļo̧k ilo an tōr jān jon̄an. Ilo iien ko komaron̄ en̄jake āinwōt David ekar kajjeon̄ n̄an ire ippān Goliath. Bōtaab kememej—David eaar wiin!
Peran ej men eo aikuji n̄an kōm̧m̧ane juon ijjino eo im̧aan tata m̧aanļo̧k n̄an menin kōttōpar eo kōņaan an juon, bōtaab peran eo eļapļo̧k ej kūr eo n̄e juon ej tibbo̧k im aikuj in kōm̧m̧ane juon bar kijejeto n̄an tōpare.
Wōr kijejeto eo n̄an kōm̧m̧ane juon jipadpad, juon wōt ļōmņak n̄an jerbal m̧aan ļo̧k n̄an juon menin kōttōpar ewōr tokjān, im peran eo ejjab wōt n̄an jelm̧ae apan̄ ko me ralikkar aer itok bōtaab barāinwōt n̄an kōm̧m̧ane juon kijejeto kein karuo, kain in ej aikuj men in aikuj. “Jet iien peran ej juon ainikien edik ilo jem̧ļo̧k in juon raan me ej ba, ‘Inaaj bar kajion̄ ilju.’”6
Jān kememej ABC kein ilo ad jino juon em̧m̧akūt ilowaan iiō in ekāāl, kōļapļo̧k juon m̧wil em̧m̧an, juon tōmak bwe jemaron̄ tōpar menin kōttōpar ko ad im kalim̧m̧ur ko, im peran eo n̄an jelm̧ai jabdewōt apan̄ ko remaron̄ itok ilo iaļ eo ad. Innām mour ejeram̧m̧an enaaj ad.
© 2012 jen Intellectual Reserve, Inc. Aolep jim̧we rej pād ippān. Kar jeje ilo Amedka. Kōmālim kajin English: 6/11. Kōmālim Ukook eo: 6/11. Ukook eo an First Presidency Message, January 2012. Marshallese. 10361 874
Katakin jān Ennaan In
Ļōmņak in kūr ro uwaan baam̧le eo n̄an kwaļo̧k en̄jake ko aer make ke juon m̧wil em̧m̧an, tōmak ilo er make, ak peran eo eaar jipan̄ er. Ak kūr er n̄an pukōt waanjon̄ak ko kōn pedped kein jilu ilo jeje ko rekwojarjar. Komaron̄ kōppopo n̄an katakin jān kanooj ļōmņak kōn eoon ko ak en̄jake ko am̧ make.