Lamharon
Kaisog sa Paglampuwas sa Bagyo
Sa ika-duha nga gab-i sa camp sang Young Women sa stake, nagtupa ang mabaskog nga ulan kag buhawi. Ang akon ward siguro may 24 ka young women nga nagtambong sa camp kaupod ang duha ka mga lider, kag kinahanglan namon mag-igo sa isa ka gamay nga kamalig agud maproteksyonan. Mabaskog ang tupa sang ulan, kag ang hangin nagaamat madlos. Kinahanglan ko nga pirme pahanumdumon ang akon kaugalingon sang pangamuyo para sa kahilwayan sa katalagman nga ginhatag sang amon stake president sang kagina. Ang amon man nga ward nagsambit sang amon mismo nga pangamuyo bilang grupo sa amon nga kamalig, kag nagsambit ako sang akon mismo nga pangamuyo.
Madamo sa lamharon nga mga babayi ang nahadlok, kag mahapos lang mahibal-an kon ngaa. Ang amon kamalig indi gid mapag-on, kag yara gid kami sa higad sang suba. Sa sulod sang 20 minutos naglala na gid ang bagyo nga ang bug-os nga stake kinahanglan magdinalagan halin sa mga kamalig sang ward pakadto sa mga kamalig sang mga counselor, nga yara sa mas mataas nga lugar. Ang akon stake president nagsambit sang isa pa ka pangamuyo, kag nagkanta kami sing mga hymns, mga ambahanon sa Primary, kag mga kalantahon sa camp sa pagtinguha nga pakalmahon ang amon mga kaugalingon. Huo, nahadlok kami, pero nabatyagan namon nga mangin maayo lang ang tanan. Tunga sa oras ang nagligad kag nangin OK na nga magbalik sa mga kamalig sang ward.
Sang ulihi natukiban namon kon ano ang natabo sa buhawi sina nga gab-i. Natunga ini sa duha ka mga bagyo. Ang isa sa ila naglibot sa amon sa tuo kag ang isa sa wala. Ang nagtupa sa amon indi pa gali ang pinakagrabe!
Nahibaluan ko nga ginpamatian sang Dios ang amon mga pangamuyo sina nga gab-i kag gin-amligan Niya kami gikan sa pinakamalala sadtong bagyo. Ngaa abi matunga ang buhawi magluwas kon kinahanglan ini himuon sang Dios? Nahibaluan ko nga sa mga bagyo sang kabuhi, sarang kita pirme magpangamuyo sa Amay nga Langitnon kag pamatian kag sabton Niya kita, nga nagahatag sa aton sing kaisog kag pag-amlig nga kinahanglan naton agud malampuwasan ini.