Nws Saib Nej Rau Nqi
Tus Tswv siv ib txoj kev ntsuas txawv ntawm qhov neeg ntiaj teb siv kom ntsuas tau ib tug neeg muaj nqi npaum li cas.
Mauxes, ib tug yaj saub zoo kawg uas txhua tus paub txog, tus nom Falaus tus ntxhais tu nws hlob thiab nws siv thawj 40 xyoo ntawm nws lub neej nyob hauv vaj ntxwv tej tsev hauv teb chaws Iyiv. Nws paub rau nws tus kheej txog lub yeeb koob thiab qhov zoo nkauj ntawm lub nceeg vaj thaum ub ntawd.
Ntau xyoo tom qab ntawd, nyob pem ib lub roob, nyob deb ntawm qhov zoo nkauj thiab lub yeeb koob ntawm Iyiv, Mauxes nyob ntawm Vajtswv lub xub ntiag thiab nrog Nws hais lus tim ntsej tim muag ib yam li ib tug neeg hais rau nws tus phooj ywg.1 Thaum ntawd, Vajtswv qhia Mauxes tej yam uas Vajtswv tsim, ua rau Mauxes pom tau Vajtswv tes hauj lwm thiab lub yeeb koob. Thaum txoj kev ua yog toog pom tiav lawm, Mauxes vau kiag rau hauv av tau ntau teev sij hawm. Thaum nws rov qab muaj zog, nws paub ib yam uas nws tsis tau xav txog dua li, txawm nws nyob hauv Falaus lub nceeg vaj ntev los.
Nws hais tias “Kuv paub tias tib neeg tsis tseem ceeb dab tsi li.”2
Peb Tsis Tseem Ceeb Npaum Li Peb Xav
Peb yim kawm txog lub qab ntuj khwb, peb yim to taub qhov uas Mauxes paub—to taub ib qho me ntsis xwb. Lub qab ntuj khwb loj, txawv txawv thiab muaj yeeb koob, nws thiaj ua rau tib neeg thiaj tsis muaj peev xwm to taub li. Vajtswv hais rau Mauxes tias “Kuv tau tsim tej ntiaj teb uas suav tsis txheeb.”3 Tej uas nyob saum nruab ntug thaum tsaus ntuj ua tim khawv txog qhov tseeb no.
Tsuas muaj ob peb yam uas ua rau kuv xav tsis thoob ntau tshaj qhov uas kuv tsav dav hlau dhau tej dej hiav txwv thiab tej thooj av teb chaws thaum tsaus ntuj thiab saib ntawm qhov rais pom cov hnub qub suav tsis txheeb uas muaj yeeb koob nyob ntev mus ib txhis.
Ib pawg kws tshawb fawb txuj ci xav tias cov hnub qub uas peb tej twj saib hnub qub pom tau yog 10 npaug ntau tshaj tag nrho txhua qhov hmoov zeb nyob ntawm tag nrho lub ntiaj teb tej ntug dej hiav txwv thiab cov tiaj suab puam.4
Qhov uas lawv xav no yeej muaj ntsis zoo ib yam li tus yaj saub thaum Enauj hais tias: “Yog neeg muaj peev xwm suav tas tej yam me uas muaj nyob hauv lub ntiaj teb, muaj tseeb tiag, ntau plhom lub ntiaj teb zoo li lub no, nws yuav tsis yog qhov pib ntawm tag nrho tej uas koj tau tsim.”5
Vim Vajtswv tsim ntau yam suav tsis txheeb, ces peb yeej tsis tas xav tsis thoob xav txog vim li cas tus vaj ntxwv Npeyamis ntuas nws cov neeg kom lawv “[nco ntsoov txog], Vajtswv txoj kev tshav ntuj, thiab nej tej kev tsis tsim txiaj.”6
Peb Tseem Ceeb Tshaj Peb Xav
Tiam sis txawm yog tib neeg tsis tseem ceeb dab tsi, ua rau kuv xav tsis thoob thaum kuv xav tias “Vajtswv pom tias neeg tej ntsuj plig muaj nqi loj heev.”7
Thiab txawm peb yuav saib tag nrho lub qab ntuj khwb no thiab hais tias, “Tib neeg yeej tsis tseem ceeb thaum piv rau lub yeeb koob ntawm tag nrho tej uas Vajtswv tsim?” Vajtswv Nws tus kheej hais tias yog vim peb, nws thiaj li tsim lub qab ntuj khwb no! Nws txoj hauj lwm thiab lub yeeb koob—lub ntsiab ntawm lub qab ntuj khwb no—yog kom cawm neeg dim thiab muab lawv tsa kom nto.8 Lwm yam lus hais tias, qhov dav dav ntawm kev nyob mus ib txhis, lub yeeb koob thiab tej peb tsis paub txog qhov uas lub ntuj thiab lub sij hawm tsis paub kawg, tag nrho yog Vajtswv tsim rau tib neeg ntiaj teb zoo li nej thiab kuv. Peb Leej Txiv Saum Ntuj Ceeb Tsheej tsim lub qab ntuj khwb no kom peb yuav ua li peb muaj peev xwm ua vim peb yog Nws cov tub thiab ntxhais.
Nov yog qhov txawv txav rau tib neeg: piv rau Vajtswv, tib neeg tsis tseem ceeb dab tsi; tiam sis peb tseem ceeb tshaj plaws rau Vajtswv. Txawm yog piv rau tag nrho tej uas Vajtswv tsim peb xav tias peb tsis tseem ceeb dab tsi los, peb muaj ib feem ntawm qhov uas nyob ntev mus ib txhis nyob hauv peb lub siab. Vajtswv tau cog lus tias peb txais tau kev tsa nto—uas muaj tej ntiaj teb suav tsis txheeb. Thiab Vajtswv xav kom peb ncav mus cuag lub hom phiaj no.
Qhov Yuam Kev ntawm Kev Muab Hlob
Tus uas ntxias neeg loj paub tias ib qho uas ntxim coj Vajtswv cov me nyuam ua yuam kev yog kev ua rau lawv xav tsis yog txog qhov uas lawv tsis tseem ceeb los yog xav tsis yog txog qhov uas lawv tseem ceeb tshaj plaws. Nws ntxias tej tug raws li lawv txoj kev muab hlob, ua rau lawv khav theeb thiab hais kom lawv ntseeg tias lawv tseem ceeb dhau thiab tsis muaj dab tsi kov yeej tau lawv. Nws qhia lawv tias lawv zoo tshaj cov neeg dog dig thiab vim lawv muaj peev xwm, muaj nyiaj, los yog lawv muaj npe lawv thiaj zoo tshaj txhua tus tib neeg uas nyob puag ncig. Nws ntxias lawv kom xav tias lawv tsis tas ua raws li lwm tus txoj kev cai thiab tsis tas cia lwm tus qhov teeb meem meem txom lawv.
Lwm tus hais tias Abraham Lincoln nyiam ib zaj paj lug uas hais tias:
Vim li cas neeg ntiaj teb yuav khav theeb?
Li ib hnub qub ya, ib tauv huab mus ceev
Xob tib laim, ib nthwv dej los mus xwb,
Sai npaum no rau hauv lub ntxa tib neeg thiaj mus pw.9
Cov uas raws Yexus Khetos qab to taub hais tias piv rau txoj sia nyob ntev mus ib txhis, peb lub neej hauv lub ntiaj teb no tsuas yog ib me pliag xwb nyob ntawm ib qho chaw me me.10 Lawv paub tias qhov uas ib tug neeg muaj nqi tiag tiag tsis yog nyob ntawm seb neeg ntiaj teb nyiam heev. Lawv paub tias yog yus muaj tag nrho cov nyiaj txiag nyob thoob plaws lub ntiaj teb no ces tseem yuav tsis tau ib qhov mov mog nyob saum ntuj ceeb tsheej.
Cov uas yuav txais “Vajtswv lub nceeg vaj ua lawv ntiag tug”11 yog cov uas rais los mus “ua li ib tug me nyuam yaus, mloog lus, siab dawb siab zoo, txo hwj chim, ua siab ntev, muaj kev hlub puv npo.”12 “Rau qhov tus uas khav hais tias, nws muaj hwj chim, tus ntawd yuav poob hwj chim, tiam sis tus uas txo hwj chim, tus ntawd yuav tau hwj chim.”13 Cov uas raws Vajtswv qab to taub hais tias “thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb.”14
Vajtswv Nco Ntsoov Peb
Xatas kuj ntxias peb los ntawm kev poob siab. Nws sim ua rau peb tsom ntsoov rau qhov uas peb tsis tseem ceeb mus txog thaum peb pib ntseeg tias peb tsis tshua muaj nqi. Nws qhia peb tias peb me dhau ua rau txhua tus tsis pom peb, thiab qhia tias tsis muaj leej twg nco qab peb—tsis hais Vajtswv los yog.
Cia kuv qhia ib zaj ntawm kuv lub neej uas tej zaum yuav pab cov uas xav tias lawv tsis tseem ceeb, Vajtswv tsis nco qab lawv, los yog lawv kho siab.
Ntau xyoo dhau los kuv kawm ua ib tug kws tsav dav hlau hauv lub Teb Chaws Amelikas Pawg Tub Rog Tsav Dav Hlau. Kuv nyob deb ntawm kuv lub tsev, kuv yog ib tug tub rog hluas tuaj ntawm Yelemes Sab Hnub Poob teb tuaj, yug los hauv Czechoslovakia, uas tau loj hlob nyob hauv Yelemes Sab Hnub Tuaj; thiab nyuaj rau kuv hais lus As Kiv. Kuv nco qab zoo txog kuv txoj kev mus rau qhov chaw qhia tub rog nyob hauv Texas. Kuv nyob hauv ib lub dav hlau, ntawm kuv ib sab los muaj ib tug neeg uas hais lus sis los ntawm Sab Qab Teb. Ua rau kuv yuav luag tsis to taub cov lus uas nws hais. Kuv xav tias tej zaum tau ntev no kuv kawm lus As Kiv tsis yog lawm. Ua rau kuv ntshai uas kuv yuav tsum nrog cov tub ntxhais kawm ntawv uas paub lus As Kiv zoo sib xeem seb leej twg yuav kawm tau ua cov kws tsav dav hlau.
Thaum kuv tuaj rau qhov chaw kawm ua tub rog hauv lub zos me hu ua Big Spring, Texas, kuv nrhiav tau ib ceg ntseeg ntawm Haiv Neeg Ntseeg hauv Hnub Nyoog Kawg, uas muaj ib co mej zeej zoo heev uas sib ntsib hauv tej chav uas lawv xauj nyob hauv qhov chaw kawm ua tub rog. Cov mej zeej tab tom ua ib lub tsev sib ntsib me uas yog ib qho chaw lawv siv tau ntev rau lub Koom Txoos. Thaum lub sij hawm ntawd cov mej zeej yog cov uas ua hauj lwm ua tej tsev sib ntsib tshiab.
Ib hnub dhau ib hnub kuv kawm ua ib tug kws tsav dav hlau thiab siv zog kawm ntawv ces kuv siv sij hawm feem ntau ua hauj lwm ua lub tsev sib ntsib tshiab. Nyob ntawd kuv kawm tias ib daim ob mus txog plaub tsis yog ib txoj kev seev cev tiam sis yog ib daim txiag ntoo. Kuv kuj kawm tias yuav tsum muaj txuj ci kom txhob ntaus yus tus ntiv tes xoo thaum yus ntaus ib tug ntsia hlau.
Kuv siv sij hawm ntau ua lub tsev sib ntsib no cuag kom ceg ntseeg tus thawj tswj hwm—uas kuj yog ib tug kws qhia kev tsav dav hlau—nws txhawj tias tej zaum kuv tsis tau siv sij hawm txaus kawm ntawv.
Kuv cov phooj ywg thiab cov kws kawm tsav dav hlau twb ua ntau yam thaum lawv tsis kawm ntawv thiab; tej zaum kuv muaj cuab kav hais tias tej yam lawv ua yeej tsis yog raws li tej lus qhia hauv phau ntawv Ntxiv Dag Zog rau cov Tub Hluas Ntxhais Hluas. Kuv nyiam koom nrog ceg ntseeg me me nyob hauv Texas sab hnub poob, xyaum ua raws li kuv kawm ua ib tug kws ntoo, thiab pab kom kuv hais tau lus As Kiv zoo dua thaum kuv ua hauj lwm qhia pawg txwj laug thiab qhia Hnub Caiv Kev Kawm Vaj Lug Kub.
Thaum lub sij hawm ntawd, Big Spring yog ib lub zos me me, tsis tseem ceeb, thiab tsis muaj neeg paub txog. Thiab ntau lub sij hawm kuv xav zoo ib yam li ntawd txog kuv tus kheej—kuv tsis tseem ceeb, tsis muaj neeg paub kuv, thiab kuv nyob kuv ib leeg xwb. Txawm li ntawd los, kuv tsis tau xav hais tias tej zaum tus Tswv tsis nco qab kuv los sis ntshe Nws nrhiav tsis tau kuv nyob ntawd. Kuv paub tias kuv Leej Txiv Saum Ntuj Ceeb Tsheej tsis quav ntsej seb kuv nyob qhov twg, kuv kawm li cas yog maub piv rau lwm tus hauv kuv chav kawm ua ib tug kws tsav dav hlau, los yog kuv txoj hauj lwm hauv lub Koom Txoos yog dab tsi. Nws tsuas xav kom kuv ua zoo npaum li kuv ua tau, xav kom kuv tso siab plhuav rau Nws, thiab xav kom kuv muaj siab xav pab cov uas nyob ib puag ncig kuv. Kuv paub tias yog kuv ua zoo npaum li kuv ua tau, ces yeej yuav tsis muaj teeb meem.
Thiab yeej tsis tau muaj teeb meem.15
Cov Nyob Tom Tw Yuav Ua Cov Thawj
Tus Tswv tsis xav li cas yog peb ua hauj lwm hauv tus nom lub tsev los yog lub tsev rau tsiaj nyob. Nws paub peb nyob qhov twg, tsis hais peb txom nyem npaum li cas los yog. Nws yuav siv cov uas tso siab plhuav rau Nws—raws li Nws lub siab xav thiab kom ua Nws tej lub hom phiaj dawb huv.
Vajtswv paub tias tej tug uas yog neeg zoo tshaj plaws nyob hauv lub ntiaj teb yog cov uas yeej tsis tau sau ntawv txog hauv tej zaj keeb kwm. Lawv yog cov neeg uas tau koob hmoov thiab txo hwj chim uas ua raws li tus Cawm Seej tus yam ntxwv thiab ua zoo txhua hnub ntawm lawv lub neej.16
Muaj ib khub niam txiv, kuv ib tug phooj ywg niam thiab txiv uas coj yam ntxwv qhia txog ntsiab cai no. Tus txiv tsev ua hauj lwm hauv qhov chaw ntaus hlau nyob hauv Utah. Thaum lub sij hawm noj su nws nyeem cov vaj lug kub los yog lub Koom Txoos ib phau xov xwm. Thaum lwm tus neeg ua hauj lwm pom nws ua li no, lawv luag nws thiab thuam nws txoj kev ntseeg. Thaum twg lawv ua li ntawd, nws ua siab zoo hais lus rau lawv nrog kev ntseeg. Nws tsis tau cia lawv txoj kev saib tsis taus nws ua rau nws npau taws los yog chim siab.
Ntau xyoo tom qab ntawd ib tug uas pheej thuam nws pib mob mob. Ua ntej nws xiam nws thov kom tus txiv neej txo hwj chim no hais lus ntawm nws lub ntees tuag—tus neeg ntseeg twb ua li ntawd.
Tus mej zeej rau siab ntseeg ntawm lub Koom Txoos yeej tsis tau muaj nyiaj txiag los yog muaj suab muaj npe, tiam sis nws lub hwj huam pab txhua tus uas paub nws. Nws xiam thaum raug xwm txheej hauv qhov chaw ua hauj lwm vim nws nres pab lwm tus neeg ua hauj lwm uas mus tsis taus vim muaj daus ntau dhau.
Ua ntej dhau ib xyoos tom qab ntawd, nws tus poj ntsuam tau raug phais paj hlwb, uas ua rau nws mus tsis taus kev. Tiam sis tib neeg tseem nyiam tuaj siv sij hawm nrog nws vim nws mloog lawv lus. Nws nco qab yus hais li cas. Nws muaj siab xav pab. Txawm nws sau tsis tau ntawv, nws cim ntsoov nws cov me nyuam thiab cov xeeb ntxwv tej naj npawb xov tooj. Nws nco qab lawv tej hnub yug thiab hnub sib yuav.
Cov uas tuaj xyuas nws xav zoo txog lawv lub neej thiab lawv tus kheej tom qab ntsib nws. Lawv paub tias nws hlub lawv. Lawv paub nws muaj siab zoo xav pab. Nws yeej tsis yws txog dab tsi tiam sis siv nws lub sij hawm foom koob hmoov rau lwm tus. Nws ib tug phooj ywg hais tias tus poj niam no yog ib tug uas coj yam ntxwv raws li Yexus Khetos txoj kev hlub thiab lub neej tiag tiag.
Ntshe khub niam txiv no yuav hais tias lawv tsis tshua tseem ceeb nyob hauv lub ntiaj teb no. Tiam sis tus Tswv siv ib txoj kev ntsuas txawv ntawm qhov uas neeg ntiaj teb siv kom ntsuas tau seb ib tug neeg muaj nqi npaum li cas. Nws paub ob tug neeg muaj siab ntseeg no; Nws hlub nkawd. Tej yam nkawd ua yeej ua tim khawv txog nkawd txoj kev ntseeg tus Tswv.
Nws Saib Nej Rau Nqi
Cov kwv tij thiab cov muam, qhov uas tib neeg yeej tsis tseem ceeb dab tsi thaum muab nws piv rau lub qab ntuj khwb loj no yog qhov tseeb. Tej lub sij hawm ua rau peb xav tias peb tsis tseem ceeb, tsis muaj neeg pom peb, peb kho siab los yog peb raug tso tseg. Tiam sis, cia li nco ntsoov—Nws saib nej rau nqi! Yog tias koj ua xyem xyav txog qhov ntawd, cia li nco txog plaub yam ntsiab cai no:
Ntsiab cai thib ib, Vajtswv hlub cov uas txo hwj chim thiab muaj siab mos siab muag, vim lawv yog “cov loj dua ntais nyob saum ntuj ceeb tsheej.”17
Ntsiab cai thib ob, tus Tswv cia siab tias “cov neeg qaug zog thiab cov neeg dog dig tshaj tawm Nws txoj moo zoo mus kom thoob ntiaj teb.”18 Nws tau xaiv “cov uas neeg suav hais tias tsis muaj zog hauv lub ntiaj teb no kom cov neeg muaj zog poob ntsej muag”19 thiab ua rau “cov uas muaj zog” txaj muag.20
Ntsiab cai thib peb, txawm nej nyob qhov twg los xij, txawm nej txom nyem npaum li cas, nej txoj hauj lwm tsis tseem ceeb npaum li cas, nej muaj txuj ci tsawg npaum li cas, txawm nej xav tias nej tsis zoo nkauj los zoo nraug los sis nej txoj hauj lwm hauv lub Koom Txoos tsis tseem ceeb los, nej Leej Txiv Saum Ntuj Ceeb Tsheej yeej saib nej. Nws hlub nej. Nws paub nej lub siab uas txo hwj chim thiab tag nrho tej yam nej muaj siab zoo ua. Ob qho no ua tim khawv txog nej txoj kev ncaj ncees thiab txoj kev ntseeg.
Ntsiab cai thib plaub, thov kom nej to taub hais tias tej yam uas muaj los rau nej tam sim no tsis yog tej uas yuav muaj tas mus li. Tsis yog nej yuav kho siab, tu siab, muaj mob los yog poob siab tas mus li. Vajtswv cog lus rau peb hais tias Nws yuav tsis hnov qab los yog tso cov uas cia siab rau nws tseg hlo li.21 Cia siab thiab ntseeg Nws cov lus cog tseg no.
Cia li paub tias yog nej tuav rawv, ntseeg txog Nws, thiab rau siab ntseeg ua raws li Nws cov lus txib, ces muaj ib hnub nej yuav txais tau tej yam uas tus Tswv cog lus rau tus Thwj Tim Pov Lauj: “Tej uas qhov muag tsis tau pom los sis qhov ntsej tsis tau hnov, thiab tej uas neeg lub siab xav tsis txog hais tias yuav muaj los, Vajtswv npaj tej ntawd tseg rau cov neeg uas hlub Vajtswv lawm.”22
Cov kwv tij thiab cov muam, tus uas muaj hwj chim loj tshaj plaws hauv lub qab ntuj khwb yog Leej Txiv rau nej tus ntsuj plig. Nws paub nej. Nws hlub nej nrog ib txoj kev hlub uas zoo tag nrho.
Tsis yog Vajtswv tsuas saib nej yog cov neeg hauv lub ntiaj teb uas ua neej nyob tau ib ntu xwb—Nws saib nej yog Nws cov me nyuam. Nws saib nej yog neeg raws li nej muaj peev xwm hloov los ua. Nws xav kom nej paub tias Nws saib nej rau nqi.
Kuv thov kom peb yuav ntseeg thiab ua neej zoo kom peb yuav to taub txog qhov uas peb muaj nqi tiag tiag nyob ntev mus ib txhis. Kuv thov kom peb yuav ua neeg tsim nyog txais peb Leej Txiv Saum Ntuj Ceeb Tsheej cov koob hmoov zoo uas nws tseg cia rau peb los ntawm Nws Leej Tub lub npe, Yexus Khetos, amees.
© 2011 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/10. Pub txhais ua lus Hmoob: 6/10. Kev txhais Visiting Teaching Message, Kaum Ib Hlis Ntuj 2011. Hmong 09771 295