Te Kakoaua, te Berita ae tabu, ao te Tia Kakoaua
I kaota au koaua bwa Ana Boki Moomon bon te berita ae boou, te kakoaua ae boou man te Aonaaba ae Boou nakon te aonaaba ni kabuta.
Te kamatoa ae tabu are iai irou ibukin te Tia Kamaiu ao Ana Ekaretia ae kaokaki e moan roko irou ngke te kairake n ataeinimwaane ngke I wareka Ana Boki Moomon. Inanon au tai ni wareka te rekooti ae tabu aio ngke I namakinna—n te taina ao n te taina riki—ana wirikiriki te Tamnei ae Raoiroi are e aki kona ni kakeweaki n taetae nakon tamneiu ibukin kakoauaana.
Warekan te boki bon moanakin ootau. Bon te tabo are e roko ma iai te tamnei ni koaua bwa te Atua e maiu, bwa ngaia Tamau are i Karawa, ao te babaire ni kakukurei e bon koreaki n akea tokina ibukiu. E kairai nakon tangiran te Baibara ae Tabu ao ana boki aika a kariaiakaki te Ekaretia ake tabeua. E reireinai nakon tangiran te Uea Iesu Kristo, n taraia ni katawea Ana nanoanga n akoi, ao ni iangoa te akoi ao tamaroan Ana mwakuri ni kamaiu.
Ibukina bwa I reireinai i bon irou bwa Ana Boki Moomon bon te tia kakoaua ae koaua—te kakoaua teuana ao te berita ae boou —bwa Iesu bon te Kristo, I reiakinna naba bwa Iotebwa Timiti bon ana burabeti ngkoa ao ngkai te Atua. N aiaron tibuu are e taku inanon moani bongin Kaokanbwaai, “Akea te aomata ae buakaka ae e kona ni korea te aekaki ni boki aei; ao akea te aomata ae raoiroi ae na koreia, tii ngkana e koaua ao e kairaki ma te kairoro iroun te Atua bwa e na karaoia.”1
N au moan kakoaua ae nene a tia ni karinaki ni kabane ootau ao kaotakin bwaai aika tabu ni boong aikai anga nanoia aika rangi n nano nakon maiu, kantaninga nakon maiu, ao aan au kakoaua aika matoatoa.
Ngkai, I aki ieie ma tarin Iareta. I aki ongo ana taetae te Uea Beniamina n taekina ana kabwarabwara are aiaron te anera. I aki mena ibuakoia ana botanaomata Nibwaite ake a taua ikoakin te Uea are e a mangauti, ke I tang ma Moomon ao Moronai iaon tiringaia te botanaomata. Ma au kakoaua ibukin te rekooti aio ao te rau are e uotia nako nanoia aomata—are e uotaki nakoiu rinanon ana wirikiriki te Tamnei ae Raoiroi n aron are ko anganaki—e bon kabaebae ao e mataata raoi n aroia. I kakoaua te boki aio n aiaron are I a tia, ma Taan Kakoaua ake Teniman, n noora te anera Moronai ke, ma Taan Kakoaua ake Waniman, n tautauii bwaatua ake koora.
I kakoaua riki bwa maibuakora are e kona n roko n te onimaki ae bwanin inanon mwakuri ni boong aika kaitira ao ni kunei babaire aika bwanin man te rau ao te karaunano inanon ara tai ni karokoa teuanne ke neienne e mwanea Ana Boki Moomon ae tabu ao te Uea Iesu Kristo, are ngaia ae kakoaua. Ngkai Moomon e taku nakon Moronai inanon teuana aia tai ni kataaki, aingaia are I taku inanon ara tai ae ti kataaki iai: “Kakaonimaki ni bwaai ni kabane iroun Kristo. … Ao ke ana akoi te Atua te Tama, are e mena ana kaintoka n uea i eta i karawa, ao ara Uea Iesu Kristo, are e tekateka i angatain mwaakana … e na mena iroum n aki toki” (Moronai 9:25–26).
Ana Boki Moomon bon kaotan ana berita Kristo ae tabu ae te kabanea ni korakora ni berita ma te botanaomata. Bon te berita ae e boou, te kakoaua ae boou man te Aonaaba ae Boou nakon te aonaaba ni kabuta. Te oota are I nakonako iai bon Ootana. Ana nanoanga ao kakannatona e kairai—ao ngkoe—inanon ara kakoaua Ibukina nakon te aonaaba.
Te Baibara ao Ana Boki Moomon a Kakoaua te Kristo, iroun Greg K. Olsen