Anaa sa mga Balita

Gipalapdan sa Liahona ang mga Gitanyag diha sa Internet

Ang Simbahan nagtrabaho aron sa pagpalambo sa access sa internet sa mga materyal nga gihubad ngadto sa mga pinulongan gawas sa Iningles, ilabi na ang Liahona, ang internasyonal nga magasin sa Simbahan.

Ang tumong mao nga inig-tapos sa 2011, kada bulan ang Liahona maimprinta sa piho nga pinulongan, ang mga miyembro sa Simbahan maka-access sa tibuok isyu diha sa internet sa PDF nga porma ingon man usab ang tinagsa-tagsa nga mga seksyon sa magasin diha sa teksto lamang nga porma. Mahitabo lamang kini sa mga magasin nga gimantala sa Abril 2011 ug lapas pa.

Ang Simbahan nagtrabaho usab aron sa regular nga pagmantala sa mga Mensahe sa Unang Kapangulohan ug sa Visiting Teaching diha sa internet sa 80 ka mga pinulongan. Kini nga mga mensahe naandan na nga gilakip diha sa Liahona o gimantala isip lahi nga aytem alang sa mga pinulongan diin ang Liahona wala pa.

Sugod sa Hunyo 2011 nga isyu, ang audio sa tanang materyal nga giimprinta diha sa Liahona i-rekord ug ibutang diha sa internet sa Spanish ug Portuguese. Agig dugang, ang unang upat ka mga isyu sa 2011 i-rekord usab. Ang mga bersyon sa audio sa Liahona sa ubang mga pinulongan moabut sa dili madugay.

Ang gidaghanon sa gihubad nga materyal sa kinatibuk-ang komperensya nga anaa sa internet nagtubo usab. Alang sa Abril 2011 nga kinatibuk-ang komperensya, ang mga pakigpulong gihubad ngadto sa 92 ka mga pinulongan. Ang mga bersyon sa audio sa tanan gibutang diha sa conference.lds.org Ang Liahona nagmantala og usa ka giimprinta nga bersyon sa 33 niadto nga mga pinulongan. Anaa kini sa pahina sa mga sulod sa Mayo 2011 nga Liahona sa liahona.lds.org

Usa ka proyekto sa pagmantala diha sa internet sa mga materyal sa kinatibuk-ang komperensya gikan sa 1990 hangtud karon sa 25 ka mga pinulongan gisugdan na usab. Sukad pa sa 1990 , kon ang usa ka sesyon sa kinatibuk-ang komperensya gimantala sa mga magasin sa Simbahan sa usa niadtong 25 ka mga pinulongan, ma-scan kini ug mabutang diha sa internet sa PDF ug HTML nga mga porma.

Ang Logo sa Simbahan Gimantala sa 100 ka mga Pinulongan

Tungod sa bag-ohay lang nga pagpagawas sa logo sa Simbahan sa Bosnian, Macedonian, Montenegrin, Persian, Tshiluba, ug Yapese, ang ilhanan sa Simbahan gimantala na karon sa sobra sa 100 ka mga pinulongan.

Ang proyekto nagsugod niadtong Disyembre 1995, sa dihang si Presidente Gordon B. Hinckley (1910–2008) mimando nga usa ka bag-o nga logo sa Simbahan ang gamiton. Ang logo gidesinyo aron ang pangalan sa Manluluwas mao ang pinakadali nga makita sa opisyal nga pangalan sa Simbahan, ug gihubad kini ug gi-typeset ngadto sa nagkalain-laing mga pinulongan sukad.

Tungod kay ang pangalan ug logotype sa pangalan sa Simbahan importante nga mga ilhanan—ug tungod kay kini narehistro nga mga tatak o kaha naproteksyunan sa tibuok kalibutan—ang Simbahan mihimo og mga lagda alang sa tukma nga paggamit sa pangalan ug sa logotype sa Simbahan.

Ang lokal nga mga yunit mahimong mogamit sa sinulat nga pangalan sa Simbahan (dili ang logotype) kon ang tanan sa mosunod nga mga kondisyon matuman:

• Ang kalihokan o katuyoan diin adunay kalabutan ang pangalan opisyal nga gipasiugdahan sa yunit—pananglitan, ang programa sa sakrament miting.

• Ang pangalan sa lokal nga yunit gigamit isip pasiuna ngadto sa pangalan sa Simbahan.

• Ang klase sa letra wala mosundog o nagpaila nianang sa opisyal nga logotype sa Simbahan.

Ang opisyal nga logotype sa Simbahan gamiton lamang alang sa mga aytem nga giaprubahan sa Correlation Department sa punoang buhatan sa Simbahan, sama sa mosunod:

• Opisyal nga pagmantala ug stationery sa Simbahan

• Mga name tag sa misyonaryo

• Mga karatula sa gawas sa meetinghouse

Ang logotype dili mahimong gamiton isip pangdekorasyon nga elemento o screensaver sa computer. Dili usab kini mahimong gamiton sa bisan unsa nga personal, pangnegosyo, o pang-promosyon nga paagi.