Elder Kazuhiko Yamashita
Sa Seventy
Sukad nga nahimong batan-ong bishop sa Fukuoka, Japan, daghang mga tuig na ang nakalabay, si Elder Kazuhiko Yamashita nakat-on gikan sa maayong mga ehemplo ug mga kinaiya sa iyang senior nga mga lider.
Sa wala madugay human nakigminyo si Yamashita sa iyang asawa, nga si Tazuko Tashiro, mibalhin sila gikan sa Tokyo ngadto sa Fukuoka, diin si Elder Yamashita gitawag isip usa ka bishop sa dihang anaa na siya sa ulahing bahin sa iyang edad nga sobra sa 20.
“Lisud kadto nako ug sa akong pamilya,” miingon si Elder Yamashita. “Kami adunay tulo ka mga anak nianang higayona ug bag-o kami sa lugar—apan usa usab kadto ka maayo kaayo nga kasinatian sa pagtudlo ug pagkat-on alang nako, ug ang akong pagpamatuod ug hugot nga pagtuo nagkalig-on.”
“Dayag lang nga dihay lisud nga mga panahon, tungod kay bag-o pa ang akong pamilya ug ako walay daghang mga kasinatian isip lider sa Simbahan” miingon si Elder Yamashita. “Ang akong senior nga mga lider maayo og mga ehemplo ug mitudlo nako og daghang mga leksyon pinaagi sa ilang kinaiya.”
Si Sister Yamashita miingon nga iyang nakita ang iyang bana nga nakadawat og daghang calling ug nahimong bantugan nga amahan ug bantugang espirituhanong lider pinaagi sa mga hagit nga gihatag niadto nga mga calling. Paglabay sa panahon iyang nakita kaniya ang mga kausaban ug nahimong mas mabination, mas mahigugmaong amahan ug bana. Ang pamilya malingaw nga mag-uban, lakip na sa pagbiyahe og layo kada tuig.
Si Elder Yamashita, natawo niadtong Septyembre 1953, mao ang anak nila ni Kiyoshi ug Sadae Yamashita. Nagtubo siya sa Tokyo, Japan, diin iyang nakaplagan ang Simbahan niadtong 1971 pinaagi sa Expo 70, ang World’s Fair.
Si Elder Yamashita nakadawat og bachelor’s degree sa edukasyon gikan sa Saitama University ug master’s degree sa sport science gikan sa Tsukuba University. Nagtuon usab siya og philosophy of physical education sa Brigham Young University. Si Elder Yamashita nahimong usa ka magtutudlo ug propesor sa nagkalaing-laing mga unibersidad sa daghang mga organisasyon sa siyensya, komunidad ug sa sport.
Si Elder Yamashita ug ang iyang asawa naminyo niadtong Marso 29, 1980, ug nabugkos niadtong Disyembre 1980, human sa makompleto ang Templo sa Tokyo Japan. Sila adunay unom ka mga anak.
Sa wala pa ang iyang tawag ngadto sa Unang Korum sa Seventy, si Elder Yamashita nagserbisyo isip bishop, high councilor, stake mission president, stake president, ug Area Seventy.