Noqu Luve ni Ose CULA Veilatai
Sandra Jennings, New Mexico, Amerika
E dua na noqu iyaloyalo ni rua na luveniose cula veilatai kau a cakava tiko ena rauta ni dua na yabaki. Sa voleka sara tu ga ni oti au qai raica e dua na cala ena rokana e dua vei rau na luveniose. Me vaka ni rawa me a roka ni kuli ni ose, au sega ni raica rawa na noqu cala me yacova na gauna au qai raica kina ni roka ni ose e sega ni veiganiti kei na roka ni laca.
Au a rarawataka sara vakalevu. Au vakayagataka na gauna taucoko oqori ena noqu cakava tiko na iyaloyalo, niu vakasamataka me sa na kau laivi na wa kece ni roka cala sa bau mosi dina sara ga. Ni tonawanawa tu na mataqu, au dolava na kava ni benu ka viritaka ki loma na iyaloyalo.
Au dabe sobu ena teveli ka dau maroroi tu kina na noqu iyaya ni culacula meu tagicaka ni sa yali na noqu iyaloyalo totoka ni luveniose ka meu tosoya tale na vo ni noqu cakacaka. Ia sa sega ni rawa—E sega ni rawa niu biuta tu ga vakakoya na cakacaka au sa oga sara kina vakalevu. Au dolava na kava ni benu ka taura tale mai na tikinisulu. Au raica e dua na ibuku ena daku ni roka e cala tiko kau kotiva ena qaqarauni. Au vukica na iyaloyalo ka tekivu dreta laivi na waniculacula.
Ena so na gauna e totolo sara na kena laudre laivi tiko na waniculacula. Ena so tale na gauna au raica ni sega soti ni rawarawa sara. Au sega ni kila vinaka sara meu sereka vakacava na veika ga au a cula. Ena so na gauna au kotiva yadudua sara ga na wa. E kaya na luvequ tagane ni sa qoroya dina na noqu na cakava na cakacaka levu ko ya meu vakadodonutaka kina. Ka ni dua walega na iyaloyalo culai ena wa veilatai.
Niu sereka laivi tiko na wa sa tekivu meu vakasamataka na veivutuni kei na kena dredre meu vakadodonutaka eso na cala au sa cakava. Na veivutuni dina e vinakati kina na gagadre kaukauwa, na cakacaka, kei na vosota, ia ena sega ni mate wale na sasaga eda biuta kina.
Niu cula tale na ose, au nanuma lesu ni veivutuni ena rawa kina ena Veisorovaki nei Jisu me kauta laivi na imawe ni ivalavala ca mai na noqu bula ka vukei au meu tekivu vou tale. Na noqu “luveniose ni veivutuni” e lili tu mai noqu vale, e dua na ivakananumi malumu ka matata, me dau caka na ka dodonu, kakua ni soro ni sega ni rawa, ka dau nanuma tiko, mai na veivutuni, ena qai botana na kena vo na Veisorovaki.