Asa Kamo Dad-on sa Inyong mga Higala?
Nahitabo na ba kini kaninyo? Naglingkod mo sa simbahan naminaw ngadto sa mamumulong sa dihang kalit lang kamo nakadungog og kusog kaayo nga saba gikan sa kisame. Sa inyong hilabihang katingala, ang atop naabli, nagpakita sa hayag nga asul nga kalangitan, ug nakakita kamo og mga nawong sa upat ka mga lalaki nga nagsud-ong ngadto sa kongregasyon. Ang sunod ninyong nahibaloan, sila nagpaubos og laing tawo diha sa usa ka stretcher ngadto sa salog sa chapel.
Nahitabo na ba kana kaninyo? Siguro wala. Apan adunay susama nga butang nga nahitabo panahon sa pagpangalagad sa Manluluwas.
Usa ka Milagrosong Pagkaayo
“Dihay mga lalaki nga nanagyayong sa usa ka paralitico diha sa higdaanan” ang istorya nagsugod sa Lucas 5:18, “ug sila naninguha sa pagpasulod kaniya, ug sa pagbutang kaniya sa atubangan [ni Jesus].” Ang problema lang dili nila madala sa sulod ang ilang masakitong higala tungod kay puno kaayo ang lugar! Bisan ang mga pultahan gialihan sa pundok sa katawhan, ug walay laing agianan sa pagsulod.
Niini nga punto ang mga higala mahimong mohunong ug mouli. Apan wala. Halos inyong mahunahuna ang panag-istoryahanay: “Unsa ang atong kinahanglang buhaton?” miingon ang usa. “Aduna koy ideya,” miingon ang usa. “Adto sa atop sa building, ug lungagan nato ang atop, ug ipaubos siya ngadto sa salog!” Inyo usab nga mahunahuna ang masakitong tawo niining puntoha nga nagpaminaw niining talagsaong plano ug moingon, “Unsay inyong buhaton?”
Ang istorya nagpadayon:
“Misaka sila sa atop, ug ilang gitonton siya uban sa iyang gihigdaan lusot sa mga tisa ngadto sa taliwala sa mga tawo diha sa atubangan ni Jesus.
“Ug sa pagkakita niya sa ilang pagsalig, siya miingon kaniya, Tawo, ang imong mga sala gipasaylo na kanimo” (Lucas 5:19–20).
Ang mga escriba ug mga Pariseo naghunahuna nga kini pagpasipala, busa si Jesus mitubag:
“Kay hain bay labi pang masayon, ang pag-ingon ba, ang imong mga sala gipasaylo na kanimo; o ang pag-ingon ba, Bumangon ka ug paglakaw?
“Aron kamo mahibalo nga ang Anak sa tawo may kagahum diay dinhi sa yuta sa pagpasaylog mga sala, (siya miingon sa tawo nga paralitico,) ako magaingon kanimo, Bangon, dad-a ang imong gihigdaan ug pumauli ka sa imong balay” (Lucas 5:23–24).
Ang istorya natapos nga nindot:
“Ug diha-diha siya mibangon sa ilang atubangan, ug misakwat sa iyang gihigdaan, ug mipauli nga nagdayeg sa Dios.
“Ug ang tanan giabut og dakong kahibulong, ug nanagdayeg sila sa Dios, ug napuno sila sa kahadlok, nga nanag-ingon, karong adlawa nakakita kitag mga katingalahang butang” (Lucas 5:25–26).
Kon Kamo Mobati nga Naluya sa Espirituhanong Paagi
Tingali wala pa kamo nakasaksi og ingon nga panghitabo, apan adunay daghang paagi sa paggamit niining istorya sa inyong kinabuhi. Mahimong inyong ibutang ang inyong kaugalingon sa lugar sa masakiton nga tawo. Ibutang nato nga kamo naluya—dili sa pisikal nga paagi apan sa espirituhanong paagi. Asa kamo dad-on sa inyong mga higala? Tingali adunay salo-salo o salida sa sine o sa laing kalihokan, ug kamo gamay lang og ikasulti sa hilisgutan—asa ka nila dad-on? Kini nga istorya nagtudlo kanato og usa ka talagsaon nga leksyon: Moabut unya ang panahon diin kamo dili na ingon kalig-on nga kamo angay gyud unta. Sa niana nga punto ang inyong pagpili og mga higala mahimong kritikal. Pilia ang mga higala kinsa modala kaninyo ngadto kang Kristo. Sa pagbaton og mga higala kinsa kanunayng modala kaninyo ngadto sa mas taas nga dapit usa ka dili maihap nga panalangin.
Unsang Klase Kamo nga Higala?
Apan adunay laing paagi sa paglantaw niining kasulatan. Ibutang ang inyong kaugalingon sa lugar sa mga higala. Unsang klase kamo nga higala? Bisan tuod ang Manluluwas mao ang nag-ayo ug nagpasaylo sa tawo, ang mga higala angay usab nga hisgutan. Sila nahigugma sa ilang higala ug gustong motabang kaniya. Wala sila mohunong ug miuli sa balay sa dihang ang mga butang nagkalisud. Hunahunaa ang hingpit nga kalipay nga ilang gibati sa dihang sila mitambo gikan sa kisame ug mitan-aw sa ilang higala nga nanghipos sa iyang higdaanan ug milakaw! Kana lain nga leksyon: Himoa nga usa ka kahigala kinsa modala sa mga tawo ngadto ni Kristo. Kining mga higala maisug, mapadayunon, gani mamugnaon. Sa matag pulong, sa matag aksyon, sa matag pagpili, kamo makagiya og mga tawo ngadto sa Manluluwas, kinsa makaayo kanato dili lang sa pisikal nga paagi apan sa espirituhanon nga paagi usab.
Usa ka Tawo nga Nasakit og Paralitico Gipaubos gikan sa Atop aron mahiduol ni Jesus, ni Frank Adams, sa maayong kabubut-on sa Church History Museum