Iren Mahsen en Padahk en Pas, Pepweri 2011
Kopwurupwurdohn Mehkoaros
Onopiki iren mahsen wet, oh ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn sewese kakehlailih riomw lih akan oh pwehn wiahda Pwihn en Sawas en Lih en wiahla pali kesempwal en pein ahmw mour.
Pwoson • Peneinei • Sawas
Soukohp Joseph Smith koasoanehdi Pwihn en Sawas en Lih en wia ehu pali kesempwal en Mwomwohdiso. Ni duwen presidensi ehu, se mentehnohn sen kak seweseikumwail wehwehki kahrepen Pwihn en Sawas en Lih eh inenen kesempwal nan amwail mour.
Kitail ese me lih akan en nan Kadehde Kapw kasalehda arail pwoson Sises Krais oh kin towehda Sapwellime doadoahk. Luk 10:39 koasoaia duwen Mery, me “mwohndiongete mpen aluweluwen Sises ko, rongorong sapwellime mahsen kan.” Nan Sohn 11:27 Marda kihda kadehdehn Krais: “Liho ahpw sapeng, patohwan, Ei Maing ei Kaun, I kamehlele me komwi Mesaia, Sapwellimen Kohto, me pahn ketidohng sampah.” Wiewia Kan 9:36, 39 koasoaia duwen “lih emen me adaniki Dapida, … kin mweidohng eh ahnsou koaros en wiewia mwahu. … Liohdi koaros ahpw kapilpene … kasalehiong Piter arail likou kan me re likilikawih me [e] wiahda.” Pihpe, nan Rom 16:1–2, kin wia “doadoahk nan mwomwohdiso” oh “kompoakepahn aramas tohto.”
Mwohmw pwukat en pwoson, kadehde, oh papah kin doudoulahte nan Mwomwohdiso en imwin rahn pwukat oh uhd sansal ni mehlel nan koasoanepen Pwihn en Sawas en Lih. Julie B. Beck, president lap en Pwihn en Sawas en Lih, padahngki: “Duwehtehte Sounkomouro eh ketin luke Mery oh Marda en Kadehde Kapw en iang towehda Sapwellime doadoahk, lih akan en irair en ansou wet ahniki pwukoa mehlel me kamanaman sang powe en iang towehda Sapwellimen Kauno doadoahk. … Koasoansoandien Pwihn en Sawas en Lih nan 1842 kihpene kehlail minimin en lih akan oh ahn emenemen arail pwukoa tohrohr kan pwehn kauwada wehin Kauno.”1
Kitail kin kapwaiada atail doadoahk ni atail kin nsenohki pwukoa kan en Pwihn en Sawas en Lih: en kalaudehla pwoson oh ahn emenemen mour pwung, kakehlailih peneinei kan oh ihmw akan, oh rapahkihda oh sewese irail akan me anahne sawas.
I kadehde me Pwihn en Sawas en Lih koasoansoandi sang nanleng pwehn sawas nan doadoahk en komour. Emenemen lih en Pwihn en Sawas en Lih ahniki pwukoa me anahn ong kapwaiada doadoahk sarawi wet.
A Silvia H. Allred, sounsawas keieu nan presidensi lap en Pwihn en Sawas en Lih.
Sang Pwuhk Sarawi Kan
Sang Atail Poadoapoad
Sister Julie B. Beck padahngki me “kitail esehda sang Soukohp Joseph Smith me Pwihn en Sawas en Lih wia kiseh mehlel en Kopwurupwurdohu.”2 Doadoahk en kopwurupwurdohu tepikihda Kasansal Keieuo nan 1820 oh doudoulahte “lain ehu pohn lain ehu, madamadau ehu pohn madamadau ehu” (D&C 98:12). Ni ansou me Pwihn en Sawas en Lih koasoansoandi mehlel ni Mahs 17, 1842, Soukohpo padahkihieng lih akan duwen deuwarail me anahn oh kesempwal nan Mwomwohdiso kopwurupwurdohu. E mahsanih, “Mwomwohdiso wet sohte koasoansoandi ni unsek lao lih akan pil koasoansoandi ni duwen met.”3
© 2011 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/10. Kamanaman ong kawehwe: 6/10. Kawehwehpen Visiting Teaching Message, February 2011. Pohnpeian. 09762 885
Dahme I Kak Wia?
-
Sawas dah me I pahn kihda me pahn sewese rie lih akan nan sounpwong wet me wia kasalepen karasaras mwahu en pwoson en lih tohnpadahk kan en Sises Krais?
-
Padahk dah en rongamwahu kopwurupwurdohu me I pahn onopiki pwehn kakehlailih ahi kadehde nan sounpwong wet?