Me Pwulopwul Kan
Misineri Tohto Kan nan Ahi Mour
Keieu en Rahn Sarawi me I iang misinerihko kohla sarawi, I kasawiada aramas me I kin kilikilang sang ni ei tikitik kohda oh kin ese sang nan ahi wasao. I kilang emen kompoakapahi me I keieu poakepoake sang sukuhl, sekteri kan en nihmwen sukuhl kan en elementary oh high school, serepein men me I sohte kin nohn mwahu ong ansou ieu mahs, oh pil mwahnakapw men me I kin mwahuki mahs.
Emenemen aramas pwukat inenen sair ie mehlel. Kompoakapahi me I keieu poakepoakeo wia peinakapw men me uhdahn kin mehlel, oh pwehki ih I pilada en doula oh tehkada duwen Mwomwohdiso. Sekteri kan me taman ie sang sukuhl kin seweseie en ese me I kesempwal. I esehla duwen limpoak me duwe koht oh limpoak mehlel sang peinakapw me kin mwahuongie mendahte ahi kin sohte nohn kadekohng ih mas. Pwutak me I kin mwahkio wia karasaras mwahu ong ie, I kasawiada ah maraino oh kin men karanih.
Irair pwukat seweseie esehla me, lella pil mwohn ei tepin tuhwong misineri kan, Sahm Nanleng ketin kaunopeiehda en alehdi rongamwahuo sang rehn aramas akan me E ketin kapilihkinie. Sang irail I esehla me soahng tikitik kan me kitail kin wia kak mie lipwe laud. Me keieu kesempwal, I esehla me doadoahk en misineri kin tepisang rehi.