Naʻe Maʻuhala Nai ʻEku Pīsopé?
Sini L. Solenisoni, Kalefōnia, USA
Naʻe toki vaeua homau uōtí, pea ʻi he kole ʻa e pīsopé ke fakataha mo aú, ne u ʻilo fakapapau ʻe ʻi ai hoku fatongia ʻi he uooti foʻoú. Naʻá ku ngāue mo e Kau Finemuí pea naʻá ku ʻofa ʻiate kinautolu. Naʻa nau fuʻu fie fanongo ki he ongoongoleleí pea ko e meʻa fakafiefia hono akoʻi kinautolú. Pau pē ʻe tuku mai ʻe he ʻEikí ke kei hokohoko atu ʻeku akoʻi kinautolú.
Ne u ʻohovale ʻi hono talamai ʻe he Pīsopé ʻoku fie maʻu ʻe he ʻEikí ke u faiako ʻi he Palaimelí. Pau pē naʻá ne maʻuhala! Ka naʻá ne fakapapauʻi mai kiate au naʻá ne ʻaukai mo lotu peá ne ongo mālohi kiate ia ʻa hoku uiuiʻí. Naʻá ku ʻofa he fānaú, ka ko e hā ha meʻa ne u ʻilo kau ki hono akoʻi kinautolú?
ʻI he taʻu ʻe 15 ʻo ʻema nofo-malí ko e meʻa pē naʻe fakamamahi kiate au mo hoku husepānití ko e ʻikai ke tāpuakiʻi kimaua ʻe he ʻEikí ʻaki ha fānaú. Naʻe ʻikai foki ha ola ʻo ʻema ngaahi feinga ke ohi ha fānaú koeʻuhí ko ʻema ngaahi faingataʻaʻia fakafaitoʻó.
Naʻá ku falala ki he pīsopé ʻo u tali ʻa e uiuiʻi ke u faiako ʻi he Palaimelí, ka naʻe faingataʻaʻia hoku lotó. Ne u ʻita ki he ʻEikí ko e ʻikai ke foaki mai haʻaku fānaú, pea naʻe ʻikai ke u saiʻia ʻi he uiuiʻi foʻou ko ʻení.
Ne u fifili ʻo pehē, “ ʻE ʻEiki, ko e hā ʻokú Ke kole mai ai ke u fai ʻení? ʻI hoʻo fakapotopotó, kuo ʻikai ke ke foaki mai haʻaku fānau. Ko e hā ʻoku kole mai ai ke u akoʻi e fānau ʻa e kakai kehé?”
Naʻá ku lotu mo fekuki mo fāinga mo e ʻEikí, ʻo u kōlenga mo tangi ke mahino kiate au. Faifai peá u fakakaukau kuó u ʻosi tali e uiuiʻí, mahalo ʻe sai ange ke tuku ā ʻeku fakaʻofaʻia pē ʻiate aú kae fai e lelei taha te u lavá.
Ko e taimi ia naʻe maʻu ai e ngaahi tāpuakí. Naʻe vave ʻeku ako ke ʻofa ʻi he fānaú, pea nau ako ke ʻofa ʻiate au. Ne u ʻiloʻi naʻe lahi feʻunga ʻenau ʻofá ke tokoni ʻi hono feau e ongoʻi taʻelata ʻi heʻeku moʻuí. ʻIkai fuoloa mei ai, ko e taimi ne u lue atu ai he holo ʻi falelotú, he ʻikai siʻi hifo he fānau ʻe toko uá te nau piki mai ki hoku nimá pea tuʻu mo e niʻihi ke ʻuma mai kiate au. Naʻe ui leva hoku husepānití ke hoko ko ha taki Sikauti. Taimi nounou pē mei ai kuo fonu homa ʻapí ʻi he fānaú mo e toʻu tupú.
Naʻe mālōlō hoku husepānití ʻi Nōvema ʻo e 1986 ʻi hono taʻu 47. Naʻe toe afioʻi pē ʻe he ʻEikí ʻa e meʻa ne u fie maʻu angé ʻiate au. Hili ha ngaahi uike mei he mālōlō hoku husepānití, ne uiuiʻi au ke u hoko ko e faifekau faiako ʻi he Palaimeli ʻo Felesinoú ʻi Kalefōnia, ʻi he kolo Laó. Ne fakaivia au ʻe he loto-toʻa ʻa e kakai makehe ko ʻení mo ʻenau fānaú ke hoko atu ʻeku moʻuí taʻekau ai hoku husepānití.
Meʻa fakafiefia moʻoni ko ʻeku vakai atu ki he tupu hake ʻa e toʻu tupu naʻá ku akoʻí ʻo hoko ko ha kakai lalahi, ngāue fakafaifekau, mali ʻi he temipalé, pea kamata honau ngaahi fāmili pē ʻo kinautolú. Naʻe kei afe ange ʻa e tokolahí ʻo e fānau “ohi” ko ʻení ʻo fakalea ange ʻo fakafiefia ai e ʻaho ko iá kiate au, pea ʻoku ou fiefia heʻeku sio kiate kinautolu ʻi he Temipale Felesinou Kalefōniá ʻa ia ʻoku ou ngāue ai he taimi ní.
Naʻe hoko moʻoni ʻeku ngāue ʻi he Palaimelí ko ha tāpuaki ʻi he kotoa ʻo ʻeku moʻuí. ʻOku ou fakamālō ko e ʻEikí ʻokú Ne fai hotau uiuiʻí kae ʻikai ko kitautolu.