Fas Presidensi Mesej, Disemba 2010

Yumi Save Luk Kraes?

I kam long Presiden Dita F. Ukdof

Seken Kaonsela long Fas Presidensi

Wan naet, wan bubuman i stap ridim wan stori long apugel blong hem we i gat fo yia, mo apugel ia i lukluk antap mo talem, “Bubuman, luk ol sta!” Olfala man ia i smael mo wetem kaen fasin hem i talem, “Yumi stap insaed long haos ia, hani. I no gat ol sta long ples ia.” Be pikinini ia i gohed blong talem, “Yu gat ol sta long rum blong yu! Luk!”

Bubuman ia i lukluk i go antap mo, long sapraes blong hem, hem i luk se siling blong haos i fulap wetem ol smolsmol pis aean we i stap saen. Bae wan i no save luk gud oltaem, be sapos laet i kasem olgeta long wan spesel wei, i tru tumas se hem i olsem wan ples we i fulap wetem ol sta. Hem i tekem ol ae blong wan pikinini blong luk olgeta, be oli bin stap long ples ia. Mo stat long taem ia i go, taem bubuman ia i wokbaot i go insaed long rum ia mo lukluk antap, hem i save luk wanem we hem i no bin save luk bifo.

Yumi stap go insaed long wan nara gudfala taem blong Krismes we i fulap long miusik mo ol laet, ol pati mo ol presen. Be long evri pipol, yumi olsem ol memba blong jos we yumi tekem nem blong Sevya long yumi, yumi nid blong lukluk longwe bitim ol samting we i stap hapen long taem ia, mo luk trutok we i hae mo naesfala samting we i stap long taem ia blong yia.

Mi stap tingting se hamas man long Betlehem i bin save se, stret long ples ia, kolosap long olgeta Sevya i bin bon? Pikinini blong God, Hem we oli bin wet longtaem long Hem mo Hem we oli bin promesem long olgeta—Mesaea ia i bin stap long medel blong olgeta!

Yufala i tingbaot wanem nao enjel i bin talem long ol man blong lukaot long ol sipsip? “Long naet ia nomo, long vilej ya blong King Deved bifo, i gat wan pikinini i jes bon, we bambae i sevem yufala. Hemia man ia we God i promes finis blong sanem i kam. Hem i Mesaea ya we i Masta blong yumi.” Nao ol man ya oli stap taltalem long olgeta se, “Ei, i gud yumi go long Betlehem blong luk samting ia we i jes hapen, we Hae God i talemaot long yumi” (Luk 2:11, 15).

Olsem ol man blong bifo blong lukaot long ol sipsip, yumi nid blong talem insaed long hat blong yumi, “Yumi go luk samting ya we i jes hapen.” Yumi nid blong wantem tumas samting ia long hat blong yumi. Letem yumi luk Tabu Wan blong Isrel insaed long haos blong ol animol, insaed long tempol, antap long hil, mo long kros. Olsem ol man blong lukaot long ol sipsip, yumi givim glori long mo presem God from ol gudfala nius ia blong bigfala glad!

Samtaem ol samting we oli moa had blong luk, oli ol samting ia we oli stap long fored blong yumi oltaem nomo. Olsem bubuman ia we i no bin save luk ol sta long siling blong haos, samtaem yumi no save luk ol samting we oli stap klia long fored blong yumi.

Yumi we yumi bin harem bigfala mesej ia se Pikinini blong God bae i kam, yumi we yumi tekem long yumi nem blong Hem mo bin mekem kavenan blong wokbaot folem rod blong Hem olsem ol disaepol blong Hem—yumi no mas mestem blong openem hat mo maen blong yumi mo lukluk gud Hem.

Taem blong Krismes hem i naes tumas long plante wei. Hem i wan taem blong mekem ol aksen we oli kaen wetem lav mo blong soem lav we yumi gat long wan brata o sista. Hem i wan taem blong yumi luklukbak long laef blong yumi wanwan mo luklukbak long plante blesing we oli blong yumi. Hem i wan taem blong fogivim man mo blong kasem fogivnes. Hem i wan taem blong harem glad long miusik mo ol laet, ol kaekae mo dring wetem ol presen. Be ol samting ia we oli mekem taem ia i saen, oli neva mas mekem ol ae blong yumi i no lukluk i go longwe mo stopem yumi blong luk gud Prins blong Pis long glori blong Hem.

Long yia ia, bae yumi evriwan i mekem Krismes taem, i wan taem blong stap glad mo mekem lafet, i wan taem blong luksave merikel ia, se God blong yumi we i gat olgeta Paoa, i bin sendem Wan Stret Pikinini Ia Nomo blong Hem, Jisas Kraes, blong i pemaot wol ia!

© 2010 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen: 6/09. Translesen blong First Presidency Message, December 2010. Bislama. 09372 852

Ol Tingting blong Tij Wetem Mesej Ia

“Oli save yusum ol aktiviti blong pulum tingting blong mekem man i intres mo blong helpem olgeta we oli stap lan, blong oli lisin mo folem topik blong lesen ia. … Ol pikja, oli ol gudfala tul blong mekem stamba tingting blong wan lesen i kam moa strong, mo helpem olgeta we oli stap lan blong stap lisin oltaem” (Teaching, No Greater Call [1999],160, 176). Taem yu stat blong serem mesej ia, tingting long wan aktiviti we i save pulum tingting mo intres olsem, blong soemaot wan pikja, o serem wan skripja mo askem famle ia blong tingting long olsem wanem nao samting ia i go wetem mesej ia.
“Wan long ol impoten gol blong yu hem i blong helpem ol narawan blong oli yusum ol gospel prinsipol long ol evri dei situesen blong olgeta. … Helpem olgeta we oli stap lan blong faenemaot ol blesing we oli kam taem yumi stap laef folem gospel” (Teaching, No Greater Call, 159). Afta we yu serem mesej ia, tingting blong invaetem ol memba blong famle blong serem ol eksperiens we oli bin gat taem oli stap lukluk moa long Sevya long taem blong Krismes.