E Kanga te Tembora ni Ibuobuoki
Kaaro n tatabemaniia ataia bwa karikirakeaia natiia e uotii kakabwaia ao kakaewenako aika aki kantaningaaki. Ngai ao kainnabau te mwaane tia kunea bwa ngkana ti iangoi anua ibukin te mwakuri ni karo ae akea tokina, ti namakina tinebun te katabeaki ae korakora ni ikotaki ma ara kantaninga ae korakora.
Bon te koaua, te Uea e a tia n anganiira bwaintangira n tamnei ni katokii rawawatara. Ibukia ara utu, kanuanga aika korakora aika bwain te tamnei e a tia n roko n ana auti te Uea ibukin karekean Ana ibuobuoki ngkai natira a tabe ni ikawai ao te maiu e a moanna riki ni kanganga. Ti kunea bwa ti kona n uoti aekakin kanganga aika a onoti nakon te Uea inanon Ana tembora.
Ngkai natira a riki bwa te roro ae tebwii tabun aia ririki ti nooria bwa iai aia konabwai ni karaoi kaairua aika a korakora. Ni koauana te bwai ae kakamaaku ae riai n ataaki bwa tia bon tia ni karaoa are ti ataia bwa ti riai ni karaoia, ma ti teimatoa n noori kanganga aika a kona n riki.
Ngkanne tia kunea bwa te nebonebo n e tembora bon te namakin ae kakaawaki n ara konabwai ni buokiia natira n rinea te eti. Tia tia ni karekea te korakora ao te kakabwaia man kaeakin te tembora n tamnein te aki mamatam ao te tataro ibukiia natira. Ti tataro ibukin te namakin n te katauraoi ae e onoti, ibukin iango ao anua aika a riai imwaain rinnakora n te tembora. Ngkana e riai, arora n iango ngkana ti mena inanon te tembora bon ibukin katabeakira ngkai ngaira kaaro ao ibukin kainnanon te nati anne ae onoti.
N tabetai ao taian kaeka a roko ni waekoa ao n itiaki. Te moan tai are e riki iai, tao ti bon iangoia bwa te bwai ae aki kantaningaaki rikina. Ma imwiina bon te bwai ae bebete noorakina bwa tia karekea raoi te bwai ae e a bon karuoi rikaaki kakabwaia mai i karawa.
Taian kaeka n tabetai a roko n te anga ae mai irouia aomata ake a rooti iai maiuia natira, n aiaron ara bitiobi ae tatangira are e buoka natira te aine are e a roko n te roro ni kaaina te kuura ae rietata rinanon taai ni kabuanibwai. Natira ake tabeman a tia n rangin kakabwaiaaki. Temanna n tatabemaniia n aron te mwaane ke te aine iai irouna te inaomata n rinerine, ao a kona n rineia n aki kaeka te kawai are ti kantaningaia, ma ti namakina ara mwakuri n ibuobuoki inanon te tembora bwa e a tia n uota ana ibuobuoki karawa nakon maiuia natira.
Kabwaiara man ara nebonebo n te tembora e kabwabwakaki riki riaon kakabwaiakiia natira. N te tai teuana, buu te mwaane e rinanon te kangaanga n te mwakuri ae e aki rangin oota iai ao e baaireia bwa e nang uotia nakon te tembora. N te bong anne, te Uea e a kakabwaia ma te namakin bwa koroboki aika a tabu n onoti bon kaekaan ana titiraki.
N rokora ni mweengara, e rangin ingainga ni kauki koroboki aika a tabu ao, nakon mimiina, e a kunea buokana ibukin ana kangaanga. Te taneiai aei e a kauka te bubuti ae boou ae bwanin man koroboki aika a tabu. Te Uea e kona n taetae nakoia Natina man kauringakira ni koroboki aika a tabu are iai inanona taian kaeka nakon kakaewenakoara. Ti kakaitau n moan tua are ti reiakin inanon te tembora.
N te aonaaba are e mena iai te buakaka ao ike e mena iai Tatan e a tia n namakinaki mwaakana n urui taian utu, e bon karaunano n ataakina ae ti kona n nako nakon ana auti te Uea ao ni kakaea buokara. N aki tabeakin taian kakaewenako are ti kaaitarai ngkai ti tararuaia ara utu, ti kona ni kunea te kimwareirei ngkana ti ukoukora te kamanoaki ao te rau man te tembora.