Serafo
Ese Wor Emon mi Unusoch
Ua achocho ne winiti usun chok Nifai: anneasochis meinisin, nukuchar, me wesewesen achocho non pekin ngun. Non ai ekiek Nifai mi ewe nenien appirun och mi napanap. Ekkoch mettoch chok mi och ngeniei nap seni ewe ekiekin mamarita epwe winiti usun chok i—are poputa ne angei ekkis chok ochun.
Fan eu ran ua ekkis osukosuk, a feito seni ai memef pwe use och. Mi watte ai achocho me ai mochen ne föri chommong mettoch. Nge usun pwe use feino ia mine ua mochen. Seni kechiwen tufichingaw, ua pwäratä ekkei memef ngeni semei. A muttir uta, fetan ngeni ewe nenien puk, me a angei echo nein noun kewe kapien ewe Puken Mormon. Ese fos, me a suki ngeni 2 Nifai 4 me a poputa ne anneani wokisin 17.
Ua mefi usun chok nge fifi a ku inisi nupwen ua ausening ngeni ekkei kapas pochokun non mine a kapas pwe a emon mwan mi netipechou. A fakkun chommong ai ekiek. Ifa usun Nifai, ai we nenien appiru, a tongeni apasa pwe a “netipechou”? Ika pwe i a netipechou, iwe nge met a fisi ngeni ei?
Sefaniti, ewe fifi a ku inisi nupwen semei we a aneani wokisin 28 non mine Nifai a ereni ngunun, epwe pwata! Me esap chuen nom non tipis. Ua mefi pwe usun chok ekkewe kuuchun rochokpwak non ai ekiek mi suuno me a pwäratä ewe kinamwe me ochun nang mi tin ewe akkar. Ese tufichin awewei napanapan ei wokisin a asarama nguni. Ekkoch chok wokisin mi urono nguni ren watten epinukunuk, pwäratä, me pwapwa usun chok ei.
Non woksiin 30, Nifai a apasa met chok ua ekieki, non chok kapas mi fakkun ningoch. A apasa pwe ngunun epwe pwapwa non I ewe Kot me ewe foun an manau ese much. Ei wokisin a uwei ren memefin kinamwe me kinisou ren an ewe Samon chen me tong.
Semei we a esipano ewe puk me a awewei pwe ekkei wokisin mi iteni ewe könun Nifai. Mwirin a aitiei pwe ekkewe aramas mi napanap me won fonufan rese unusoch, me mi namot pwe ekkei aramas repwe esinna ngawer kewe are repwe uren namanam tekia me, iwe, resap napanap.
Ua weweiti. Pokiten chok a wor ai apwangapwang esap wewen pwe use tongeni winiti usun chok Nifai. Ai esinna ai kewe apwangapwang a etufichi ngenikich pwe upwe arap ngeni ochun Nifai. Nifai a napanap pokiten, a anneasochis me nukunuk, a pwan netip tekison me a tongeni esinna an kewe tipis.
Seni chok ena fansoun, ua fakkun sani ekkei kapasen Nifai. Iteitan fansoun ua anneanir, ua mefi ekkewe chok pwapwa me pwäratä usun chok ewe aewin fansoun ua anneanir. Ekkewe wokisin ra kön ngeniei pwe ngang emon noun Kot fopun, me ua tongeni föri nap seni met chok ua tongeni ekieki. Ua sinei pwe ika ua nukunuk me achocho nikitu ngeni, mi wor chommong efeioch mi wor ngeniei.