Poraus seni ewe Aewin Presetensi, February 2010
Won Ammonata non Pekin Ngun
Kapasen aurour seni Nouch we Soufos
Eu Nongonongen Nuku
“Ika pwe ese wor ach nongonongen nuku me eu kapasen pwäratä ren ewe ennet, meni epwe weires ne pochokun ngeni ekkewe osukosuk me asepwanin sossot minne epwe feito ngeni emon me emon kich.
“Manau won ei fonufan mi eu fansoun sossot, eu fansoun ne pwäratä pwe sia tongeni niwinsefan ngeni fan mesan Semach won Nang. Ika pwe sipwe weri sossot, mi namot pwe sipwe weri osukosuk me weires. Ekkei mi tongeni aosukosuka kich, me ngunuch kewe mi tongeni apwangapwangeno—ina minne, ika ach kewe nongonongen nuku, ach kewe kapasen pwäratä ese fakkun pochokun.”1
Kaeo Nesen seni Nom
“Non ach kutta manauach epwe ochuno, sipwe ekieki usun ekkei kapas eis: Ngang met ua mochen pwe upwe winiti? Ngang mi pwan ekkis arap ngeni ewe Chon Amanau ikenai nap seni naneu? Upwene pwan ekkis arap ngeni I nesor? Mi wor ai pwara ne siwini manauei ren met mi och? …
“Ekkewe ier ra feito me ekkewe ier ra no, nge namotan eu kapasen pwäratä ren ewe kapas allim mi chiwen watte. Nupwen sia pwan arap ngeni fansoun mwach, ese namot pwe sipwe ekieki ekkewe nesenin nom.”2
Pwisin Noum we Liahona
“Om we efeioch seni petriark a pwisin om. Meni a mochomoch are nangatam, mecheres are annonnon. Taman me kapasan esap popun ewe efeioch seni petriark. Ewe Ngun mi Fel mine a pwäratä wewen mi ennet. Om we efeioch esap chok numufengen me nonnom non nenian we chok. Esap pacheta non imw are kapini won taropwe. Iwe nge, epwe annea. Sipwe tongei. Sipwe tapweno mwirin kapasan. Om we efeioch seni petriark epwe anisuk non ewe pwiin mi fakkun kiroch. Epwe emwenuk non osukosuken manauom. … Om we efeioch seni petriark mi chok pwisin noum we Liahona ne ammonata om we kokkot me emwenuk won ewe an. …
“Netipetekison mi namot nupwen sia katon, witiwit, me angang ngeni eu efeioch mi pwon pwe epwe apwonueta.”3
Feito ngeni I
“Chechemeni pwe kese fetan anaemon chok. … Nupwen ka fetan non ei manau, kopwe fetan ngeni ewe saram, me ekkewe kirochun manau epwe nom mwirum . …
“Nupwen ua suki ekkewe pukfel ren pwäratä, eu kapas mi pochokun ngeniei fan fite. Ewe kapas [mi] ‘feito.’ Ewe Samon a apasa, ‘Feito rei.’ A apasa, ‘Feito kaeo usii.’ A pwan apasa, ‘Feito, tapweto mwiri.’ Ua sani ena kapas, feito. Ai mochen ina pwe sipwe feito ngeni ewe Samon.”4
© 2010 seni Intellectual Reserve, Inc. Meinisin pung mi kawor. Mi för non Amerika. Kapunguno non fosun Engenes: 6/09. Kapunguno chiakun: 6/09. Chiakun First Presidency Message, February 2010. Chuukese. 09362 901
Afanafan seni Ei Poraus
Teaching, No Greater Call mi poraus: “Emon sense mi sineioch ese ekieki,… ‘Met upwe afanafana ikenai?’ nge, ‘Ifa usun upwe tongeni anisi nei kewe chon sukkun ar repwe kuna met mi namot ar repwe sinei?’” ([1999], 61). Anisi aramas ne kaeo seni ei poraus, kopwe ekiekin awora echo taropwe me efoch pisekin mak me ngenir ekkis fansoun ne anneani kapasan Preseten Monson me makkei ekkewe mettoch mi ennet ra kuna usun ar repwe ammonata non pekin ngun. Semirit mi kukkun ra tongeni chungani nios usun met ra kaeo. Kopwe ekieki ar repwe poraus usun met ra makkei are chungani.