Poraus seni ewe Aewin Presetensi, January 2010
Komochunukuno Won
Eu me nein ekkewe saingonon nesen seni ewe kinikinin Kirtland ngunuch a auchea an epwe fakkun tumun. A auchea ach sipwe arapakan ngeni ewe Samon iteiten ran pwe sipwe tongeni pochokun ngeni ekkewe sokkun sosot ngeni kich.
Non ewe summer a no am me punuwei we ai ua uwei noum kewe nipwe ne no Kirtland, Ohio. A fakkun auchea me namot ngeni kem ren am ai ua nonomo ngenir me mwen ar repwe feino ngeni ar we angangen misin.
Non ewe fansoun am mi chiwen nonom ikewe, ai ua kaeo am ai pwe weweochuti an ewe Soufos Joseph Smith kewe angang me ekkewe souneng non Kirtland. Ena fansoun ewe uruon Mwichefen a fat pwe eu fansoun riafou nge pwan watten feioch.
Non Kirtland ewe Samon fang ekkoch me nein ekkewe amwararen esisin seni Nang me niffangen ngun mine ese mwo fis ngeni ei fonufan. One me nimu kinikin me non ewe puken Annuk me Pwon ra angei non Kirtland me ekkewe kinikin meinisin mi chok arap fengen—pwäratä a eniwinato ewe saram me sinenap usun ekkewe itenap ren ewe Oruen Niwinsefanito, tumunu ekkewe mi osupwang, ewe kokkoten manau ese much, pochokun me mumuta, ewe kapasen emirit, asoren eu na engon, ewe tempel, me aean annukun ekkewe feioch.1
Ewe fansoun aforean fefeitan ngun. Ewer, ewe Ngunun Kot mi usun ekei a kenano. Moses, Elijah, me chommong ekkewe chon nang ra pwato non ei fansoun, pachonong Semach won Nang me Noun we At, ewe Chon Amanauen fonufan, Jises Kraist.2
Eu me nein ekkewe pwäratä Joseph a angei me non Kirtland ei pwäratä a eita ewe “choon olive … a angei seni ewe Iran Paratais, me iei an ewe Samon porausen kinamwe ngeni kich” (nepoputan ewe D&C 88). Ei amwararen pwäratä a pachonong ewe apochokunen tingor, “Arapakan ngeni ei me upwe pwan arapakan ngonuk; nikitu ne kutta ei pwe kopwe kuna ei” (D&C 88:63). Usun ekkewe Sounengin Kirtland ra fakkun arapakan ngeni ewe Samon, iwe a pwan fakkun arapakan ngenir, a ninatiw ekkewe feioch won mokuren ekkewe mi nukuchar.
Ninitiwen ekkewe Feioch
Iwe nesoponon ekkei esisinen ngun a fis nupwen ei fansoun angang ngeni Kot non ewe Tempel Kirtland non March 27, 1836. Eu me nein ekkei a fis nupwen William Draper a ier 28, ewe a awewei ewe ran pwe “ranin Pentecost.” A makei: “Mi wor eu fansoun niniun Ngunun ewe Samon, nei we pen a fakkun weires ne maketiw are chenekanei ese tongeni an epwe apasa. Nge iei upwe apasa pwe ewe Ngun a niu me feito usun eu mwitirin asepwan mi ngusuri eu imw, chommong me neir ra kapas non ekkoch kapas me wor ar nemasepwi me kunokun chon nang me osini, me wor ar fansoun pwapwa ren usun met rese mwo sinei non ei tarepwin aramas.”3
Ekkei esisinen ngun ese wor koukun ngeni chok ekkewe ra tonong non tempel, ren “ekkewe aramas unukur ra ioi fengen (ne rongorong ewe sokkun mongungu, me kuna eu saram usun eu ngeten ekei a tinetiw won ewe tempel), me ra fakkun mwar ren met a fis.”4
Lorenzo Snow (1814–1901), Mwirin an a Presetenin ewe Mwichefen, a nom non Kirtland nupwen ewe fansoun feioch. A nengenifichi, “Emon a ekieki usun mwirin an angei ekkei amwararen esisin ese wor sosot epwe tongeni okufatiw ekkewe Souneng.”5
Nge, ewer, ekkewe watten feiochun ngun ra fis ngeni kich rese tongeni ar repwe wakichenong non sosot. Fitu maram chok me mwirin ewe fansoun angang non tempel, ewe pekin mwoni tonong a fakkun eu watten osukosuk ngeni fonuen Amerika, me Kirtland a pwan fakkun mefi weiresin. Fetanengawen nenien isoisen mwoni, suseni chommong weiresin pekin tonongen mwoni. Atawei mettoch mi ngaw, chommong me nein ekkewe Sounang a ekieki an Kirtland epwe feito ren ekis chok choo kukunun pisek pwe pisekir, nge rese sinei met repwe nupwen ra tour are ifa usun ar repwe tongeni.
Mwen fansoun nakatam, a wor eriafou me ekkewe mob ra ungeni ekkewe Souneng. Chon ewe Mwichefen—usun ekkewe ekkoch mi arapakan ngeni ewe Soufos, chommong ekkewe ra nom otun ewe angangen tempel—ra rochopwakano me ekieki pwe Joseph emon soufos mi nikatomotom.
Nupwen ua fiti punuwei we me noun nei we at we ne fetan ngeni ewe Tempel Kirtland, ua ekipwichi ukukun weiresin an emon epwe manauen nukuchar tori mwirin ekkewe esisinen ngun ra fen pwäratä. Ifa ukukun metekin ar rese tongeni nikitu ngeni ar resap takiri me tipengaw ngeni ekkewe rese nuku. Netipengaw, nupwen sia tonong non sosotun mwoni tonong are ekkoch weires, rese tongeni tori non me pochokun ar repwe nikitu non ar nukuchar. Mi fakkun efeiengaw nupwen ekkoch ra morukono ren ekkewe amwararen manauen ngun nupwen ewe angangen tempel.
Ekkewe nesen
Met sia tongeni kaeo seni ei amwararen fansoun non ewe uruon ewe Mwichefen?
Eu me nein ekkewe saingonon nesen seni ewe kinikinin Kirtland ngunuch a auchea an epwe fakkun tumun. Nupwen Preseten Harold B. Lee (1899–1973) a asukuna: “Kapasen pwäratä esap och mettoch mi wor reom ikenai me epwe nonom reom iteitan. Kapasen pwäratä a tongeni fefeita me napono ngeni ewe saramen nukuchar, are a tongeni kisino an esap wor, anongonong won met sia föri fan itan. Ua apasa, ewe kapasen pwäratä sia eniwini eu ran me eu ran iei eu mettoch epwe amanaua kich seni ekkewe weiresin sosot.”6 A fakkun auchea ach sipwe arapakan ngeni ewe Samon iteiten ran ika sia pochokun ngeni ekkewe sosot sipwe tonong non.
Non ekkoch an ei fonufan ikenai mi taitap ngeni Kirthaln me non ewe ier 1830s. Sia pwan nonom non fansoun weiresin mwoni tonong. Mi wor chon riafou me pwara ra ungeni ewe Mwichefen me ekkewe memper. Emon me emon me ekkoch sosot ra fakkun aweires fan ekkoch.
Ina ena fansoun sia mochen, nap seni ekkoch, ach sipwe arapakan ngeni ewe Samon. Nupwen sia föri, iwe sipwe fakkun weweochuti met auchean an ewe Samon epwe arapakan ngeni kich. Nupwen sia nikitu ne kutta, iwe sipwe chok fakkun kuna Ii. Sipwe fakkun kuna ochu pwe ewe Samon ese tongeni an epwe nikitano An we Mwichefen me noun kewe Souneng. Mesach epwe sukuno, me sipwe kuna An sukano asamachon nang me etina ngeni kich napen An we Saram. Sipwe angei pochokun ren ewe ngun ne pochokun ngeni ewe pwinin rochopwak.
Ina mwo ika ekkoch souneng non Kirtland rese mwo awen mefi ekkewe esisinen ngun a fis ngenir, napengeni rese. Ewe auchean, pachonong William Draper, a komochunuk ewe tufichin sinenap non pekin ngun mine ewe Kot a fang ngenir me sopweno ne tapweno mwirin ewe Soufos. Non ewe fansoun a fis ngenir chommong sokkun sosot nge pwan chommong sokkun fefeitan unusochun feiochun ngun tori, nesoponon, ekkewe ra nikitu tori nesoponon ra “repwe tonong non … ewe nenien pwapwa ese-much” (Mosiah 2:41).
Kopwe Komochunuk
Ika pwe a mecheres om kopwe ningeringer are nusuni om nuku, chechemeni ekkewe Souneng nukuchar ra fakkun unusen uwonukunuk non Kirtland. Komochunukuno Won Ka tongeni föri ei! En chochon ewe kinikinin aramas mi auchea. Ka ammoneta me kefinita ngeni om kopwe nom non ei auchean fansoun non nepoputan ach ei manau won fonufan amen ningoch. En chochon ewe faminien celestial me ekkewe sokkun tufich meinisin epwe anisi manauom an epwe fakkun porousoch ren manau esemuch.
Ewe Samon a efeiochu ngonuk ewe kapasen pwäratä usun ewe ennet. Kopwe fakkun mefi An pochokun me pwäratän An manaman. Me ika pwe ka soposopono ne kutta Ii, Epwe sopweno ne fang ngonuk ekkewe tufich mi pin. Ren ekkei me ekkoch nifangen ngun, iwe kopwe tongeni esap chok an epwe siwini manauom ngeni met mi pung pwe epwe pwan efeiochu imwom we, wart are ekkewe pranch, sop, neni, fonu, me mwichen neni meinisin ren om angang murino.
Epwe weires om kopwe kuna non na fansoun, nge komochunukuno won, ren met “mesach ese kuna, are sening esap rong, ika fen tonong non netipen aramas, ekkewe mettoch mine Kot a ammonata fan iter pwe repwe tongei” me uti Ii (1 Corinthians 2:9; pwan nengeni D&C 76:10; 133:45).
Upwe pwäratä ewe ennet ren niwisefaniton ewe kapas allimen Jises Kraist me ewe ennet ren ei, An we Mwichefen. Ua pwäratä ren unusen netipei me nguni pwe Kot mi manau, pwe Jises Kraist Noun At me ii ewe mokuren an ei watten Mwichefen. Mi wor nouch soufos won fonufan ikenai, usun Preseten Thomas S. Monson.
Upwe tingor sipwe chechemeni ewe nesenin Kirtland me komochunuk won—usun chok pwan nupwen mettoch epwe weires. Sinei me chechemeni ei: ewe Samon amen tongeok. Mi chechemenuk. Me Epwe pwan seikata ekkewe ra fakkun “nikitu non ar nuku tori nesoponon” (D&C 20:25).