Aisea e Manaomia ai Lo’u I Ai Iinei?
Megan, Robinson, Iuta, ISA
I le vaiaso ao lumanai le Kerisimasi o le 2007 e toalua lau fanau sa faailoa mai ua i ai siama i faai ma taliga. O Iakopo, e 5 tausaga, na tagi i le taimi atoa ao agai atu i le faletalavai mo ana vai, ma Peti, 19 masina, sa matua piimau [mai ia te au].
Ina ua matou taunuu atu, sa faafeiloaia i matou e se laina umi o tagata o loo faatali e faatau a latou vai. Ao tosoina e Iakopo lo’u vae ma tomumu e uiga i lona taliga, na tafiti lemu ese atu Peti mai ou lima. Sa ou faapea o le a nofo o ia i ou autafa, ae o le taimi lava na mamulu ai o ia, sa ia tamoe sao atu lava i se toeaina matua sa nofo i se nofoa i talaane o le laina.
Sa tilotilo le toeaina i le fola o le fale, sa to’o ona fofoga i ona lima. Sa ou valaau atu ia Peti e aunoa ma le manao e aluese mai le laina, ae sa ia faalatalata atu pea i le toeaina ma punou i lalo e tilotilo a’e i ona mata ao ia ataata ma līlī.
Sa ou tulia loa Iakopo e aumai o ia [Peti]. Sa uu mai [e Iakopo] le lima [o Peti] ma taumafai e toso ese mai o ia mai le toeaina, ae sa le manao o ia e sau. Ona amata lea ona ia tuleia le muaulu o le toeaina ina ia mafai ona tuu i luga le ulu [o le toeaina]. Ao amata ona ou le mautonu, sa tatala e Peti ona seevae e lei nonoaina ma tulei i luga o vae o le toeaina. Sa ia nofo i luga ma ataata.
“Peti!” o la’u valaau lea.
“E le afaina,” o le tala lea a le toeaina i se leo vaivai. “O le a ou nonoaina ona seevae mo ia.”
Sa tupu ae si ou popole teisi ao ia faamauluina seevae [i vae] o Peti. Ina ua maea, sa ia opoina mai o ia [Peti] i ona lima ma kisi atu i lona ulu. Sa tuai ona ia faamamuluina ia Peti, o lea sa vave ai ona ou aluese mai le laina ina ia faasao mai la’u tama teine mai lenei tagata ese.
Ao ou faalatalata atu i ai, sa ou iloa ai o loo i ai loimata i ona mata. I lo’u popole, na ou nofo ifo ai i lalo i ona autafa.
“Ou te fia tauina atu se mea ia te oe,” o lana tala lea ao tilotilo sa’o i luma. “E lei sili atu ma le masina ua tuanai na maliu ai lo’u toalua, ma e tusa ma se itula talu ai na ou iloaina ai ua maua au i le kanesa e le mafai ona togafitia. Sa ou sau iinei ia maua ni talavai, ma sa ou mafaufau loloto i lo’u ola pe le tatau ona ou agai atu i se isi tulaga e lē ma alofia. Sa ou le manatu e mafai ona ou tauaveina le agai atu i le Kerisimasi ma tiga o le kanesa e aunoa ma si o’u toalua pele.”
Na ia fai mai sa ia tatalo ma aioi atu i le Atua, “Afai e manaomia ona ou i ai iinei mo se mea aoga, e tatau ona E ta’u mai nei, po o le a ou alu i le fale e faamuta mea uma.” Ae na te lei faapea mai “amene”, ua amata ona faalavelave atu Peti ia te ia ma valaau atu ia te ia “Tama Matua”.
“O lea ua ou iloa nei le mafuaaga e manaomia ai ona ou i ai pea iinei,” o lana tala lea. “E manaomia ona ou ola pea mo le fanau a la’u fanau. Latou te manaomia au.”
Sa tuu atu ou lima ma opo mai o ia ma na le mafai ona taofiofia lo’u tagi. Sa ou alu atu loa ma aumai le matou talavai. O Peti, lea sa foliga mai sa matua ma’i lava i ni nai minute ua mavae, na kisi atu i le alafau o le toeaina ma osooso fiafia ese atu faatasi ai ma Iakopo ma au, ma talotalo ma fonō mai, “Tofa-tofa, Tama Matua.”
Ou te lei fesili atu mo lona igoa, ae o le a le galo lava ia te au, e oo lava i se teineitiiti laitiiti e faalavelave i se toeaina e mafai ona avea ma se tali i se tatalo.