O Le Faatuatua i le Taimi Faatulagaina a le Atua
I le avea ai o se tamaitai nofofua, ua mafai ai ona ou talisapaia le tulaga e faapea, e lagolagoina i tatou e le Alii i o tatou taimi faatulagaina taitasi.
A o 19 o’u tausaga, na faaipoipo ai se tasi o a’u uo mamae. Na matagofie le faaipoipoga, na lalelei le tamaitai, aulelei foi le alii, ma sa fiafia i laua. Ae o a’u, i le isi itu, sa ou faalefiafia. Na faateia a’u i le mea na ia faia. Na ia suia la’u vaaiga mamao mo ia—ma mo a’u. Na matuai ou manao lava ia ou faaipoipo, ae e lei oo i le taimi. Na ou mafaufau e ma te laiti uma, ae e le gata i lea o le a faaipoipo o ia a o lei faauu mai le kolisi, ae na te lei maua foi se avanoa e femalagaai ai pe auai i ni avanoa faalegaluega e faateleina ai le atamai. Na ou le moe i le po a o lumanai lana faaipoipoga, i le popole i le mea o le a tupu i lona lumanai, a o moe gapepe o ia, ua talitonu moni lava i lana filifiliga.
Pe a ou toe tepa i tua i o’u manatu, ou te ataata. O le a le mea na ou mafaufau i ai? Ua ou vaai nei i lona olaga: ua i ai lana fanau aulelei e toalua ma se aiga lelei. I ni nai masina talu mai lana faaipoipoga na manino ai ia te a’u na ia faia le filifiliga sa’o, ma ua sili atu foi ona manino i le taimi lenei. Ua ou iloa na lototatalo ma mafaufau loloto ma faatuatua o ia i uunaiga a le Atua ia te ia.
O lena mea ua toeitiiti 20 tausaga talu ai. O loo ou nofofua pea. O le toatele o a’u uo ua faaipoipo; o loo i ai a latou tane ma fanau ma fale. E i ai lo’u fale; o se fale mautotogi e lua potumoe i le Aai i Niu Ioka. E leai sou toalua po o se fanau. Sa ou manatunatu i nisi taimi pe i ai ni popolega o nisi mo a’u i le leva o le po e pei ona sa i ai ia te a’u mo la’u uo.
Ou te mautinoa na ou faia ni mea sese i lo’u olaga, ae ou te le talitonu ua ou faia se mea e ono taofia ai au mai faamanuiaga o le faaipoipoga. E i ai taimi ou te manatunatu ai pe faamata e ese lo’u olaga pe ana faapea e sili atu mea ou te faia pe malosi tele atu la’u galue pe sili atu lo’u agalelei, ae peitai ou te iloa ua ou faia mea lelei ma ou te taumafai i taimi uma e agai i luma ma se vaaiga e faavavau. Ou te taumafai e faia la’u vaega e faataunuuina ai lo’u naunautaiga mo se faaipoipoga i le malumalu.
Ua ou iloa foi e malamalama le Atua i le taimi faatulagaina mo mea taua e tutupu i lo’u olaga, ma e ese mai taimi faatulaga o le toatele o isi. Ua ou matua faafetai tele i lo’u malamalama ai i lenei mea. Ua tupu pea lo’u agaga faafetai a o ou tuputupu ae i lo’u faatuatua i se Tama Faalelagi alofa, o lē malamalama i mea ou te manaomia ma mea e mafai ona ou foaiina atu i isi.
I lo’u iloa ai o lo’u olaga e ese le taimi faatulagaina o se taumafaiga faifaipea. O a’u fesili i le Atua e tusa ai ma lana fuafuaga mo a’u ua taunuu atu ai i se lagona e faapea, e tulaga ese lo’u agavaa ma o’u uiga lelei. Ua ou iloa o lenei lagona mautinoa e tele taimi e lu’iina ai e le o o’u lava manatu, ae e masani o atugaluga amiotonu o isi. O lagona o isi e faatatau i lo’u tulaga nofotoatasi e le ese mai i o’u lagona na i ai e faatatau i la’u uo e 19 tausaga, e le toe umi ae faaipoipo. Na ou manatu na ou malamalama i le mea e tatau ona ia faia, ae na ou sese.
O nisi taimi e fautua mai ai e tagata ni faamalamalamaga e ono talafeagai e uiga i le mafuaaga ua leai ai so’u toalua ma se fanau. Ou te iloa e masani lava, o nei manatu e ofoina mai ma le agalelei, ae o o latou tua mai, e foliga mai e i ai lava se lagona faapea, ua ou sese i lo’u agavaa mo faamanuiaga o se faaipoipoga ma se fanau. Ua ta’u mai e isi atonu ua tele lo’u ai filifili, tele lo’u soona [tautala] tuusa’o, tele lo’u poto, tele lo’u mafaufau i galuega, tele lo’u tutoatasi, tele lo’u fiafia e saoloto, ma le—mea e sili ona ou fiafia i ai—tele lo’u fiafia. Ou te ta’u atu e i ai taimi ou te taliaina ai nisi o nei faitioga o ni faamalo, ae peitai i le taimi lava lea, ou te iloa o loo i ai tamaitai o e sili atu le popoto, sili atu ona [tautala] tuusa’o, ai filifili, ma sili atu ona tutoatasi nai lo a’u.
O se Sini o le Avea ma Soo
A o ou mafaufau loloto i le mea ua ou talitonu o le taimi faatulagaina a le Atua mo mea taua e tutupu i lo’u olaga, ua ou matua iloa ai a’u filifiliga ma saolotoga. I le avea ai ma fanau a lo tatou Tama Faalelagi, ua tuuina mai ia i tatou avanoa fiafia ma le tiutetauave e tulimatai ai le faamanuiaga o le faaipoipoga. E ala i le galue agai atu i lena sini, o loo tatou faia ai la tatou vaega.
I le avea ai ma se tagata o le Ekalesia, ua ia te a’u faamanuiaga o le tatalo, tusitusiga paia, o le uarota ua ou auai, ma saunoaga a perofeta e aumaia ia te a’u se malamalamaaga loloto o le Tama Faalelagi ma le Faaola. O nei faamanuiaga taitasi e aumaia ai taiala mo le faaaogaina tatau o lo’u saolotoga. Ou te faamoemoe o loo atagia atu le faautauta i a’u filifiliga e fai, e aofia ai i la’u tali atu le fiafia ma lu’itau e le’i mafaufauina.
E masani ona ou toe iloiloina lo’u olaga ma lo’u tulaga. O le vaega e sili ona taua o lena iloiloga patino, o le fesili e uiga i lo’u tulaga agavaa. Ua ou faia se taumafaiga faamaoni e ola i aoaoga faavae ma tu ma aga a le Ekalesia: e auai i a’u sauniga ma le malumalu, e totogi le sefuluai, e ola i se olaga mama, ma auauna atu i isi. Ou te talitonu i le Togiola a le Faaola ma i le taua o olaga e faaalu i le ola ai i poloaiga ma taitaiga a perofeta.
O Se Olaga Faaoaina
E masani ona fesiligia a’u pe faapefea ona ou fiafia o se tagata e le’i faaipoipo o se ekalesia e faamamafaina le faaipoipoga. O le a ou tauina atu ia te outou le mea ua ou faia.
Na tonu ia i maua ma lo’u uso o Christine ao ma laiti e mautinoa lava o le a ma faaipoipo i se aso, ae o le taimi lena, o le a ma ola ai i se auala e avea ai i maua ma tagata e sili atu le lelei i mea uma ma lelei i lo ma tuputupu ae. Ou te faafetai ona sa ma faia lena fuafuaga —o se fuafuaga o loo fusia i o ma nauanautaiga e faia le mea ua ma talitonu ua faamoemoe i ai le Atua mo i maua. O le mea moni lava, o se fuafuaga na faalagolago i le faalogo i uunaiga a le Agaga.
Na faaipoipo lo’u uso i le 10 tausaga talu ai ma ua i ai lana fanau aulelei e toalua. Ua maua lona tikeri (PhD) ma e tele sona saofaga i le Ekalesia ma lona nuu. O loo faaauau pea ona ou ola i la maua fuafuaga, ma ou te talitonu o le mea lena e finagalo ai le Atua ia ou faia. E masani ona ou iloiloina pe sa’o le mea ua ou faia—pe tutusa au sini i lo’u olaga ma sini maoae atu o le avea ma se soo o le Faaola. Ou te galue e faamautinoa o a’u sini ma taumafaiga, faaleagaga ma faaletino, e taitaia a’u ou te malamalama lelei ai i la’u matafaioi o se afafine o le Atua.
I le avea ai ma se tamaitai nofofua o le Au Paia o Aso e Gata Ai, ua ou maua le avanoa e auauna atu ai i le tele o auala e ese le matagofie. E i ai sa’u galuega e aofia ai le auauna atu, ma o loo mafai ona faataunuuina o’u valaauga faalelotu. Ua ou atiina ae a’u taleni ma ou fiafia i taumafaiga maoae faaleaoaoga. Ua faaoaina lo’u olaga. I lo’u olaga atoa, ou te saili e mulimuli i uunaiga a le Alii i a’u filifiliga.
O ni nai tausaga talu ai, na matou maua ai ma isi tamaitai nofofua e toaono o lau tupulaga, le avanoa faapitoa ma e le’i mafaufauina e feiloai ai i le peresitene aoao o le Aualofa o Bonnie D. Parkin. Na sili laitiiti atu i se itula le taimi na matou faaaluina e talanoa faatasi ai e uiga i o matou olaga o tamaitai nofofua i totonu o le Ekalesia.
O lena feiloaiga o se tasi o faamanuiaga moni lava o lo’u olaga i lena tausaga. A o matou nonofo faataamilo i le laulau i le ofisa o Sister Parkin, sa matou talanoa e uiga i lu’itau ma faamanuiaga i o matou olaga. I le faaiuga na ia talosaga mai ai pe i ai ni o matou manatu faaiu e faia. Na sii lo’u lima ma faapea atu, “O le Ekalesia o le nofoaga sili lea e tatau ona i ai i le avea ai ma se tamaitai nofofua.” O le mauaina o le avanoa i le alu o lena itula puupuu e tuuina atu ai la’u molimau e uiga i le auauna atu ma le faamaoni i le Atua, na matuai faamalosia ai la’u molimau e uiga i la’u matafaioi i totonu o le Ekalesia. Na ou iloaina muamua lava la’u matafaioi, ae na ou manaomia lena talanoaga e faaleoina ai ma faamalosia ai lo’u talitonuga i lona taua.
Faatuatua i le Tagata Lava Ia
I le Ekalesia ou te talitonu o loo i ai se manaoga faapitoa e atiina ae le faatuatua i le tagata lava ia, e le faapea e tatau ona tutusa o ia ma se taimi faatulagaina ua faamoemoeina e tagata lautele, ae a o mulimuli atu o ia i faaaliga patino mai se Tama Faalelagi alofa. E taua le i ai o le mautinoa atonu o loo faia e isi tagata le mea sa’o ma ia iloa e ui lava ina foliga ese o tatou olaga, o loo ia i latou ni taulaga tulaga ese tatou te manaomia. E faigofie tele ona manatu faapea, e tasi lava le taimi faatulagaina e sa’o mo tagata uma.
E tofu tagata uma ma luitau. Pe tatou te faaipoipo, tatala faaipoipoga, maliu le tane, pe lei faaipoipo foi, e ia i tatou uma lava le faamanuiaga o lo tatou gafa paia ma a tatou matafaioi paia ma le faapitoa.
E moni ou te tatalo ia ou faaipoipo ma ia i ai se ma fanau ma lo’u toalua. I le taimi lenei, o loo ou galue e faalauteleina ma faatuputeleina lo’u olaga e faavae i le talalelei. E i ai o’u faamanuiaga o se tamaitai nofofua a ou faaleaogaina e avea ai a’u o se tagata faatamala ma le maua le agaga faafetai, ma ou te faatuatua o na faamanuiaga i le iuga, o le a avea ai a’u ma ava ma tina sili atu ona lelei.
Ou te faafetai mo se Tama Faalelagi alofa, o lē silafiaina i tatou ma silafia mea e mafai ona tatou faia i o tatou olaga—e eseese mamao le tasi i le isi ma matagofie e pei ona i ai. Ou te faafetai mo le olaga ua ou maua ma avanoa o loo i o’u luma. Ou te tatalo o le a mafai e i tatou taitoatasi ona tatou faatuatuaina le taimi faatulagaina a le Alii mo i tatou, o taimi faatulagaina o loo lagolagoina e a tatou filifiliga lelei ma faatuatua i le Atua.
FAAIPOIPOGA MA LE TAIMI A LE ALII
“O le taimi e faaipoipo ai atonu o le faataitaiga sili lea o se mea e tupu i o tatou olaga e toetoe lava ina a le mafai ona fuafua agai i ai. E pei lava o isi mea taua faaletino e tutupu, e faalagolago lea i le filifiliga a isi po o le finagalo ma le taimi o le Alii, o le faaipoipoga e le mafai ona fuafua ma le mautinoa. E mafai ona tatou galulue ma tatalo mo o tatou manaoga amiotonu, ae ui i lea, e toatele lava i latou o le a tumau ai i le nofofua e sili atu nai lo le taimi na latou manaomia ai e faaipoipo.
“O le a la le mea e tatau ona fai i le taimi lenei? O le faatuatua i le Alii o Iesu Keriso o le a saunia ai i tatou mo soo se mea e aumaia e le soifuaga lenei. O lenei ituaiga o faatuatua e saunia ai i tatou mo le taulimaina o avanoa e aumaia e le soifuaga lenei—ia faaaogaina lelei avanoa e maua mai, ma ia onosai i faanoanoaga e oo mai mo avanoa ua le maua. I le faaaogaina o lena faatuatua, e tatau ona tatou tautino atu i tatou lava e faatulaga mea e tatau ona ave i ai le faamuamua ma tulaga e tatau ona mulimuli ai mo mataupu e le mafai ona tatou puleaina, ma ia tausisia ma le faamaoni ia tautinoga, e tusa lava po o le a le filifiliga a isi tagata ae po o le a foi le faasologa o taimi a le Alii. Pe a tatou faia lena, o le a i ai pea lava pea i o tatou olaga le tulaga tatou te maua ai le taitaiga ma le filemu. E tusa lava po o le a le tulaga e aliae mai e le mafai ona tatou puleaina, e mafai lava ona tumau a tatou tautinoga ma tulaga faatonuina.
“O tautinoga ma le auauna atu a le au nofofua matutua e mafai ona faatumauina ai lo tatou malosi ma le faamaoni a o faagasolo tausaga faigata o lo o latou faatalitali ai mo le taimi sao ma le tagata sao. O a latou tautinoga ma le auauna atu e mafai foi ona musuia ma faamalolosi ai isi. E atamamai i latou o e faia lenei tautinoga: O le a ou faamuamua le Alii i lo’u olaga, ma o le a ou tausia Ana poloaiga. O le faataunuuina o lea tautinoga o loo i ai lea i le tagata lava ia. E mafai ona tatou faataunuuina lena tautinoga e aunoa ma le manatu po o le a le faaiuga a isi tagata o le a fai, ma o lena tautinoga o le a taula ai i tatou e tusa lava po o le a le taimi e faatonuina mai e le Alii mo mea aupito taua e tutupu i o tatou olaga.”
Elder Dallin H. Oaks o le Korama a Aposetolo e Toasefululua, “Taimi,” Liahona, Oke. 2003, 15.