Te Rongorongo ni Kakawari n Reirei

Te Riki Ni Bwai ni Mwakuri ni Bain te Atua

Tataro mwaaka n rinei ao ni wareki kibu ao reirei man te rongorongo aei ake a na kaitibo ma kainnanoia aine ake ko kawaria. Tibwaua am namakin ao am kakoaua. Kaoiia naake ko reireiniia bwa a na karaoia naba.

Tera Ae Kananonaaki N Te Riki Ni Bwai ni Mwakuri ni Bain Te Atua?

Aramwa 26:3: “Aio te kakabwaia are e a tia ni katokaki i aora, bwa ti a tia ni karikaki bwa bwaai ni mwakuri ngaira ni bain te Atua bwa ti na kakoroa bukin te mwakuri ae korakora aio.”

Bonnie D. Parkin, beretitenti ni kabuta n te Botaki n Aine: “Tera ae nanonaki n te riki ni bwai ni mwakuri n te taetae ae taabangaki? I taku bwa te karikirakeia tabemwaang. E aranna Iotebwa Timiti bwa te mwakuri ‘ni kaineti ma taian nanoanga’ ake inanora… . Iai kawai aika aki kona ni warekaki n riki bwa bwaai ni mwakuri ni bain te Atua. N aron te katooto, riki bwa te aeka n tia kaakawari n reirei ae ko tangiria n taai nako; titirakina te kairake n roronrikirake bwa tera ae e tangiria ni karaoia nakon ae e aera ngkai e aki iein; ibuoka ni iango nakon ae ko na ukeria; karaurau n rinea am kunnikai, am taetae, ao am rinerine n am waaki ni kakukurei, wiingare nakon buum ke natim ae e ataia ae a bwarannano ke ni uruakinnano; rabwata te aine ae kairake; angareirei n te tabo are a kawakinaki iai ataei ake a mwakuri aia karo ma te nano ae kukurei; kaotia n teim bwa ko a kunea te kakukurei ni kawaim” (“Sweet Moments,” Riaona, Nobembwa 2005, 107, 109).

Kathleen H. Hughes, moan kauntira n te beretitentii n te botaki n aine ni kabuta: “E a tia te Uea ni kaira tamneiu n te tai ae okioki, ao n rangi ni bati nakon ae e bon aki, Riingakiu irouna e roko rinanon ana ibuobuoki raoraou… . Tao [ti] na namakina riki ana Tangira ngkana [ti] ukora Baina n aia mwakuri naake a tabeakin [arora]… . Te Atua e atai kainnanoia Natina, ao E bati ni mwakuri rinanora, ni wirikirikiniira bwa ti na ibuobuoki ibon imarenara. Ngkana ti mwakuri iaon ana wirikiriki tabeua, ti karaoa te bwai teuana ae tabu, bwa ti anganaki te tibwanga ni mwakuri ni ibuobuoki bwa ana tia mwakuri te Atua ni kaekaan te tataro” (“What Greater Goodness Can We Know: Christlike Friends,” Riaona, Meei 2005, 74–76).

Tera Ae N na karaoia Bwa Te Bwai Ni Mwakuri ni Bain te Atua?

Beretitenti James E. Faust, Kauoman ni Kauntira n te Moan Beretitentii: “Ko kona n riki bwa te bwai ni mwakuri ae korakora ni bain te Atua ni kakoroa bukin te mwakuri ae kakawaaki… . Ko kona ni karaoa te bwai teuana ibukin temanna te aomata ae e aki kona ni karaoia temanna ae tia ni bungiaki… . Kakabwaia ao te rau ae kamweeraoi e na roko nakoim ngkana ko kona n tangira te Atua ‘ma nanom ni kabanea, ao tamneim ni kabanea, ao korakoram ni kabanea, ao ni wanawanam ni kabanea; ao ko na tangira raom n ai aron tangiram ibon iroum’ [Ruka 10:27]… . Ngkana ko a tia ni karaoa am kabanea ni kona, are ko bon tataneiai ni kakaraoia, am anganano ae mangori, ao tera nako ae ko kona n anga, e na bon butimwaeaki ao ni kakukurei nakon te Uea” (“Instruments in the Hands of God,” Riaona, Nobembwa 2005, 115–16).

Beretitenti Gordon B. Hinckley: “Akea tokin te raoiroi ae ti kona ni karaoia, nakon te kairiiri are ti bitaki iai are ti kona ni karekea ma tabemwaang. Ti a riai n aki iangoi bwaai aika kakaawaki ao bwaai aika aki kakaawaki. Ti a riai n tataro ibukin te korakora; ti a riai n tataro ibukin te konabwai ao kainnanoan te kan buokiia tabemwaang. Ti a riai ni kaotanako te ota mairoura. N ana taeka te Uea nakon Iotua … , ‘ko na korakora ma n ninikoria; tai maku, ao e na tai bwara naba nanom: bwa [E na ] memena Iehova ae Atuam iroum ike ko na nako iai’ (Iotua 1:9)” (“The Need for Greater Kindness,” Riaona, Meei 2006, 61).