Esɔŋɔde ke Eŋwɔŋɔ Edisana Spirit
Se Doctrine ye Covenants 132:7
Ndibɔ mme erinam itie-oku nyuŋ nduk ke nsasana ediomi edi mme ata-akpan ntɔŋɔ ke “ediyom-ŋkpɔ eke eyo uwem” man adian mme esit, ekikere, ye uwem nnyin ye uduak Abasi.
Ami mmekpep akpan ukpepŋkpɔ kiet ke mme ediwak isua emi ekebede nto President Boyd K. Packer. Enye ete:
“Ke sutɔ ebiet emi itode mme uduot-owo emi idide, mme erenowo mme ŋwan, ibeheke ewe ubɔkutom, ibeheke ewe ufɔkŋwed, isehe emana emi owo odude, uwem edi usuŋ-isaŋ edinyɔŋ ɔnɔ kpukpru nnyin, mfiak nka iso Abasi.
“Mme edinam ye ediomi akabare edi mme ŋwed nnyin ke ediduk ke iso Esie. Man idot ndibɔ mmɔ edi se iyomde ke ofuri uwem nnyin; ndinim mmɔ ke emi ebede edi mfina eke uwem isɔŋ.”
Ami mbeŋe nte yak Edisana Spirit editeme onyuŋ ayama nnyin owo kiet-kiet ke nte nnyin ikerede ibaŋa ufɔn eke mme erinam ye ediomi nte mme ŋwed spirit eke usuŋ-isaŋ nnyin ndinyɔŋ ufɔk ntiene Ete ke Heaven.
Mbuk-ŋke eke Ŋwed-isaŋ
Ami nyetɔŋɔ ye ibio-ibio mbuk kiet. Inikiet erenowo kiet okoyom ndika ŋkese mbon ufɔkemana ke anya-usuŋ idut kiet. Enye ama anam uduak abaŋa uka-isaŋ esie, nditim ekpat esie enim, nnyuŋ nsaŋa ke ubom-ofum ŋka obio emi mbon esie ekeduŋde.
Erenowo emi enem-esit ɔwɔrɔ ke ubom-ofum oro ndien asaŋa aka ebiet emi esisede ŋwed-isaŋ. Enye ama enyene eti ŋwed-isaŋ emi nnen-nnen ebiet eke ukara idut esie ekenɔde. Enye ayak ŋwed-isaŋ esie ɔnɔ owo-utom ke adaŋa idut oro, emi ekesede idiɔŋɔ, idut, ye mme ntak emi erenowo emi edide idut oro. Edi erenowo emi ikitimke ikama ŋwed-isaŋ esie. Ikpa-ŋwed eke etop idemowo ama abari onyuŋ abiara. Ndien ema edian ikpa-ŋwed emi awahade ke usuŋ eke minenke ke tape ye glue.
Ndien, owo-utom adaŋa-idut oro ama esin ŋwed-isaŋ esie onyuŋ etre ndinɔ ufik-idiɔŋɔ emi ediyakde enye ebe oduk idut oro. Erenowo emi ama okop edikpu onyuŋ ekere abaŋa se enye akpanamde adian do.
Ukpepŋkpɔ ke mbuk emi enehede emem: ana enehede ekpeme ufɔn ŋwed-isaŋ ke ofuri ini. Ndikama eti ŋwed-isaŋ ama ɔnɔ eti-ifet man erenowo oro ebe oduk idut oro, edi ŋwed-isaŋ ikpɔŋ ikinehede inyime ke eyeyak enye ebe oduk idut oro.
Nte ededi, ndimem uwutŋkpɔ enyene mme adaŋa. Ke mibietke mbiara eke ŋwed-isaŋ emi ekutde-kut, mme mfina ye ukut emi nnyin ikutde ke mitoho ndudue eke nnyin idinimeke mme eŋwɔŋɔ emi Abasi akanamde ɔnɔ nnyin mme edibiat ediomi nnyin.
Mme Ediomi, Edinam, ye Edidiɔŋ emi Ekeŋwɔŋɔde
Eke mme mbet Jesus Christ, ndibɔ mme erinam itie-oku nyuŋ nduk ke nsasana ediomi edi mme ata-akpan ntɔŋɔ ke “ediyom-ŋkpɔ eke eyo uwem” man adiana mme esit, ekikere, ye uwem nnyin ye uduak Abasi.
Ediomi edi uteŋe eŋwɔŋɔ—edibighe ubiere ke ufɔt Abasi ye nditɔ iren ye iban Esie. Abasi ekenim mme ndaha eke kpukpru ediomi ikɔ-Abasi, ndien nditɔ Esie enam unen edimek mmɔ ndikpep kabaŋa nyuŋ nnyime ke se Enye oyomde ete mmɔ enam.
Ebɔ mme ediomi eto mme nsasana erinam. Erinam edi edisana utom enamde eto odudu itie-oku emi enyenede ufɔn ŋkpɔ-Abasi ye nsinsi utip onyuŋ enyene ebuana ye ibet ye ewuhɔ Abasi. Mme erinam ŋko ekpep nnyin abaŋa uduɔt eke ediomi emi nnyin inyimde isin ke uwem nnyin.
Ediomi ye erinam eke mfiak-men-ndi ikɔ-Abasi Andinyaŋa edi ŋwed-itoro ŋkpɔ-Abasi emi ekemede edikubɔre nti-ifet window heaven man ebɔ edisana ufɔn, ndausuŋ, ye ɔsɔŋɔ isin ke uwem nnyin. Abasi ɔkɔŋwɔŋɔ ɔnɔ nditɔ irenowo ye iban Esie ikpɔ edidiɔŋ ke edikpono ediomi, esinede edikop item nɔ ibet ye erinam eke ikɔ-Abasi Jesus Christ. Eyom ŋkaiso mbuɔtidem enɔ mme ŋwed-itoro man edi nti ndien edot ndibɔ mme eridiɔŋ emi ekeŋwɔŋɔde.
Edisana Spirit edi Edisana Spirit Eŋwɔŋɔ
Edisana Spirit edi ɔyɔhɔ ita ke Ibuot Abasi. Enye edi owo eke spirit, etie-ntiense abaŋa kpukpru akpanikɔ, onyuŋ edi ntiense ye isuŋutom eke Ete ye Eyen.
Emen Edisana Spirit ewut ke ŋwed Abasi nte Edisana Spirit eke Eŋwɔŋɔ emi enyimede mme ɔsɔŋɔde nte Abasi ɔbɔde ndinen utom eke nditɔ Esie. Ke akpatre, ana Edisana Spirit eke Eŋwɔŋɔ ana ɔsɔŋɔ ofuri mme erinam ye ediomi ikɔ-Abasi. Nte Jehovah akayarare ɔnɔ Prophet Joseph Smith ete, “Kpukpru ediomi … eke owo minamke inyuŋ ibehe iduk ndien ibɔhɔ ɔsɔŋɔ oto Edisana Spirit eke eŋwɔŋɔ … inyeneke odudu, ufɔn, mme ɔsɔŋɔ ndomokiet mi ye ke eriset ke mme mkpa okurde.”
Ini emi esɔŋɔde eto Edisana Spirit eke Eŋwɔŋɔ, edinam ikɔ-Abasi, eŋwɔŋɔ, mme ediomi ɔbɔbɔ ke isɔŋ ye ke heaven. Edisɔŋɔ oro ɔkɔŋɔ ke uwem isɔŋ ndien ekeme edibiat mme edibɔ otode ke idiɔk-ido.
Ndibɔ unyime edisɔŋɔ emi nto Edisana Spirit eke Eŋwɔŋɔ inehede idi erinam emi enamde inikiet; edi, enye etibe ke ini ke ini ke nte nnyin inehede ikabarede-esit inyuŋ ke ofuri ini, ikpono ediomi nnyin, inyuŋ iyak esit nnyin inɔ Abasi. Ndinehede nyom eridiɔŋ emi edi “utom eke uwem isɔŋ,” ke nte President Packer emende owut.
Ukem nte erenowo ke mbuk ŋwed-isaŋ mi oyomde ufik-unyime ke ŋwed-isaŋ esie man ebe oduk esen idut, ntre ke nnyin kiet-kiet iyom unyime ntiense Edisana Spirit eke Eŋwɔŋɔ man otodo nnyin ibɔ mme nsinsi eridiɔŋ emi asaŋade ye ediomi ye mme erinam ikɔ-Abasi Andinyaŋa.
Nnyin owo kiet-kiet ikpina inɔ ekɔm ke nsasana nti-ifet ke “edisaŋa ke kpukpru mme erinam Jehovah” nyuŋ mbɔ Edisana Spirit eke Eŋwɔŋɔ, “ke edikem ini,” idibɔ unyime ɔsɔŋɔ emi enyimede kpukpru mme eridiɔŋ emi ekeŋwɔŋɔde ndinɔ.
Erinam Edidian-kiet
Edidian eke erenowo ye ŋwan ke ufɔk Jehovah edi akpatre ediomi ye erinam eke mfiak-men-ndi ikɔ-Abasi Andinyaŋa. Ndien akpan-akpan, ndifiɔk ufɔn ukpep eke erinam edidian emi Edisana Spirit eke Eŋwɔŋɔ ɔsɔŋɔde eyeŋwam ndibɔrɔ, ke ubak, ata mme mbume idemowo abaŋade mme mbumek eke owo efen ekeme edikpan eti andinim ediomi ndibɔ mme nsinsi eridiɔŋ.
Erinam edidian oro esine akpan-ŋkpɔ iba onyuŋ abuana ke ubak: (1) nsinsi ebuana eke erenowo ye ŋwan ke ndɔ—ke se edifiɔkde nte edidian nkaŋ-nkaŋ—ye (2) edidian ebe ye ŋwan nsin ke nsinsi ufɔkemana eke Abasi ye ediyire ubonowo ke ofuri mme emana—ke se edifiɔkde nte edidian ke ata etiŋe. Ŋkpɔ iba esinede ke edinam edi akpan-ŋkpɔ.
Mme udɔŋ ye ibɔro emi ebɔŋde-akam eyom ke edidian temple eke ufɔt erenowo ye ŋwan esine anyan-uwem ke ŋkɔri ŋkpɔ-Abasi, edikpono ndɔ, akpanikɔ ke ndɔ, ndinam utom ɔtɔkiet man ekan unana idorenyin ye afanikɔŋ eke uwem isɔŋ, ye edibigeh inemesit.
Usukini, ke ndiɔk-iso, mme udɔŋ ye ibɔrɔ emi ekeyomde iditibeke. Mme idiɔkŋkpɔ eke ebe mme ŋwan, unana-akpanikɔ ke ndɔ, mfiak-edem eke idemowo, mme mkpɔsɔŋ-ŋkpɔ efen ekeme ndinam eneni, ubahare, ye kpa ediwɔrɔ-ndɔ. Ke mme ndaha ntem, eti ebe mme ŋwan ekeme edibup ete, “Nte unen edimek eke owo emi ɔdiɔkde-ido ekeme edibɔ mi ke se Abasi ɔkɔŋwɔŋɔde?” Ibɔrɔ eke mbume emi edi ata iŋ-iŋ!
Ndiɔi edinam eke ebe mme ŋwan esinehede ada ubiak-esit ye mfuhɔ ɔsɔk ebe mme ŋwan eken ye mbon ufɔkemana. Nte ededi, idiɔk-ido eke owo kiet ikemede edibiɔŋɔ mme editre ima, ɔsɔŋɔ, ye mme eridiɔŋ emi Abasi ekenimde ɔnɔ owo efen. Odudu eke anana-adaŋa ye nsinsi erisio-isop Christ ekeme ndikan kpukpru ŋkpɔ, ke kpukpru ini, kpukpru ebiet, ɔnɔ ofuri owo eke enehede emum ediomi mmɔ ekama ye Enye
Ebe mme ŋwan emi abiatde ediomi inyuŋ ikabakede esit ɔduɔk eti-ifet ndibɔ nɔ idemesie ɔsɔŋɔ unyime eke Edisana Spirit eke Eŋwɔŋɔ eke mbiba ndaha nkaŋ-nkaŋ ye etiŋe erinam edidian-kiet.
Eti ebe mme ŋwan emi ekponode ediomi enyuŋ esin-ifik eka-iso ke mbuɔtidem edu edot ndibɔ nɔ idemesie ɔsɔŋɔ unyime Edisana Spirit eke Eŋwɔŋɔ eke ndaha etiŋe eke erinam edidian onyuŋ ɔbɔ kpukpru mme eridiɔŋ eke idemowo emi asaŋade do.
Afo emekeme edibup ete, “Didie ke emi ekeme nditibe edieke ndɔ eke temple mibighike?”
Ukpepŋkpɔ Ufɔk Abasi Jesus Christ Mme Ndisana Owo ke Ukperedem Usen emi eyarare ibɔrɔke ofuri ŋkpɔ ye mbubehe abaŋade mme utɔ ndaha oro. Ami ndiɔŋɔke nyuŋ ŋkemeke ndinehede nam-aŋwaŋa usuŋ ye ini emi edibɔde mme eridiɔŋ emi ekeŋwɔŋɔde ndinɔ. Edi ami mmɔdiɔŋɔ ke eyebɔ mme eridiɔŋ emi ekeŋwɔŋɔde ndinɔ. Iduhe eti mbet ke akpatre emi edinanade nsinsi edidiɔŋ Abasi ndomokiet emi ekeŋwɔŋɔde otode ke idiɔk edinam unen edimek eke owo efen.
Ami nyetre ye ɔsɔŋɔ ikɔ-ntiense eke Edidem Benjamin ete: “Ami mkpama nte mbufo ekere ebaŋa edidiɔŋ ye idaha inemesit eke mmɔ emi enimde ibet Abasi. Koro sese, ediɔŋ mmɔ ke kpukpru ŋkpɔ, ke obukidem ye ke spirit mbiba; ndien edieke mmɔ ebuɔtde idem tutu esim utit ebɔ mmɔ esin ke heaven, man otodo mmɔ eduŋ ye Abasi ke edu emi inemesit minyeneke utit. O eti, eti ete ke mme ŋkpɔ emi edi akpanikɔ, koro edi Jehovah Abasi etiŋ enye.”
Ami mmedara ntiŋ ikɔ-ntiense mbaŋa akpanikɔ eke eŋwɔŋɔ prɔfesi eke Edidem Benjamin ke nsasana enyiŋ Ɔbɔŋ Jesus Christ, amen.