Epinipinino seni ewe Pwonen Ngun mi Fel
(Doctrine and Covenants 132:7)
Etiwa angangepinin pristut me tonong non pwon mi pin ra namot ngeni ipwan non ewe “achochon manau” ne awenechara netipach, ekiekich, me ach manau ngeni an Kot mochen.
Uwa kao ngeni ew auchean nessen non ekkewe ier a no seni Presiten Boyd K. Packer. A apasa:
“Ese nifinifin meni neni ke eto meian ika marita, ika mwan ika fefin, ese nifinifin met sokkun angang, ese nifinifin om sukkun, ika mo menni sokkun tapin aramas emon a nonom ie, manau a ew sai sefaniti non winiposun neniach ngeni kich meinisin, niwinsefan ngeni mwen mesen Kot.
“Angangepin me Pwon mi pin a winiti ach mumuta ngeni tonong Ren me mwen mesan. Ren nimenimochun ketiwen ne angei ir ina ewe achocho non unusen manawach; ne omuchu ngeni kich mwirin ei manau ina ewe tesin ei manauen fonufan.”
Uwa iotek ewe Ngun mi Fel epwe ouroura kich me asarama emon me emon kich non ach sia ekieki ewe auchean angangepin me pwon mi pin ren kewe mettochun mumuta mi pin ngeni ach sai ngeni winiposun neniach ren Samach won Nang.
Ewe Kapas Monomon ren ewe Passport
Uwa poputa ren ew poraus ika tutunap. Mi or emon mwan a mochen chuno ngeni chochon an famini mi towau nenier. A akkota an ewe sai, a amonata pisekin non an potou, me sai won sepenin ngeni ewe neni mararin kewe re nonom ia.
Ewe mwan a mefi meseik an tou seni ewe sepenin me fetan ngeni ewe nenien passport rekan chek me ie. I a emochu ew passport mi och ra ngeni seni ew nenien angang mi mumuta non kofomonum nenian. I a pwarau noun we passport ngeni emon chon angangen enukkun ewe neni, minne a cheki ion ewe mwan, a feito me ian, me popun a chuto non ewe neni. Nge ewe mwan ese tumunuochu noun ewe passport. Ewe kinikinin ia a or porausan non ewe passport a mekingau me a fen tano. A fen kamono och me a satuni epwe forisefani ne apacha me teipini non ew fofor ese mumuta.
Pokiten na, ewe chon angangen enukkun cheki a eniwini noun ewe passport me ese mochen ngeni ewe stampin tonong non ewe neni. Ewe mwan a tipengau me osukosuk ren met epwe ne fori mwirin.
Ei nessenin ei poraus mi chok mecheresin ach weweiti: ewe pungun ew passport epwe fokun tumun non inet fansoun. An a or ew passport mi och a awora tufichin ren ewe mwan epwe tonong non ewe neni, nge ren chok a kamoch ew passport esapw nge a wewen epwe ennetin mumuta ne tonong non ewe neni.
Ennetin, ei mecheresin awewe mi or koukun. Sokofesen seni tan ew passport, ekkewe ossukosuken fonufan me weires kich mi akkani seni esapw ach mwaan ese akkukunano an Kot pwon ngeni kich ika fori ach kewe pwon mi pin esap manaman.
Pwon mi Pin, Angangepin, me Pwonen Kewe Feioch
Ren chon kunon Jises Kraist, etiwa angangepinin pristut me tonong non pwon mi pin ra namot ngeni kinikinin non ewe “achochon manau” ne awenechara netipach, ekiekich, me ach manau ngeni an Kot mochen.
Ew pwon mi pin a ew ennetin pwon-ew nukucharan pekin achocho ngeni nefinen Kot me Noun at me nengin. Kot a forata ekkewe niwin ren meinisin pwonen kapas allim, me Noun semirit ar ra aea ar pwisin finata non fonufan ren kao ussun me tipeew ngeni met I a tungorer repwe fori.
Pwon mi Pin ra tour ngeni kich seni angangepin mi fel. Angangepin a ew mokutukut mi pin a fis seni ewe mumuta ren ewe pristut minne a or popun seni nang, me nesoponon mi feifeino, me mi tonong non an Kot kewe annuk me anapanapen annuk. Angangepin a pwan ossukunakich ren nikinikin kewe pwon mi pin kich mi etiwa non manauach.
Ekkewe pwon mi pin me angangepin ren an ewe Samol niwinsefaniton kapas allim minne a ketiwen pekin ngun a tongeni sukano asamachon nangin tufich ren kaworan non manawach popun seni nang, awenewenach, me pochokunach. Kot a pwon ngeni Noun at me nengin wachemuken feioch ren asamonu pwon mi pin, pachenong aponueta ngeni ekkewe annuk me angangepinin ren ewe Kapas allim an Jises Kraist. Nikitun nukunuk mi soposopono a namot ren ekkewe mettoch epwe tongeni tawe me ren ekkewe pwonen feioch kopwe tongeni angei.
Ewe Ngun mi Fel A ewe Pwonen Ngun mi Pin
Ewe Ngun mi Fel I ewe eunumonun kewe Unumon non Kot. I ewe inisin ngun, a pwarata meinisin met mi ennet, me ewe chon pwarata ren me chon kunon ren ewe Sam me ewe Nau.
Ewe Ngun mi Fel a pwan awewe non pukefel ren ewe Ngun mi Pin ren Pwon, minne a mutata ika etiwa ne tipeew ngeni Kot ewe mokutukut mi pung an Noun kewe semirit. Akkauchean, meinisin pwon mi pin me angangepinin ewe Kapas Allim epwe epinipinino seni ewe Pwonen Ngun mi Fel. Atun ewe Samol a pwari ngeni ewe Soufos Joseph Smith, “pwe meinisin pwon mi pin ese for me tonong non me epinipinino seni ewe Pwonen Ngun mi Fel … ir ese or uwan, manamanan, ika ririn pochokunan me mwirin manausefanitan seni ewe mano.”
Atun a epinipinino seni ewe Pwonen Ngun mi Fel, ew angangepin, akkapon, ika pwonepin a fofofengen won fonufan me non nang. Ewe riri fengen a anongonong won ewe aramas won fonufan me mi tongeni taa ika katano seni mokutukutun tipis.
Kaworun ei anokunukun riri fengen seni ewe Ngun mi Fel napengeni esap chok ren ew-fansoun a fis; nge ren, a feito nuseni anea ren ren ach sia ennetin aier me iteitan ne, asamonu ach kewe pwon mi pin, me fangetani netipach ngeni Kot. Assuku non pungoch ren ei feioch a“ewe sosotuch won fonufan,” Presiten Packer a fen anapanapa.
Ussun ewe mwan non ai we porausan ewe passport a auchea an ewe stampin non noun ewe passport ne tonong non ewe neni esapw nenian, ina ren emon me emon kich sia aucheani ewe pwaratan chon pwarata ren ewe Pwonen Ngun mi Fel ren ach sipwe tongeni angei ekkewe feioch mi esemuch fiti ngeni ekkewe pwon mi pin me angangepin ren an ewe Samol kapas allim.
Emon me emon kich sipwe ennetin kinisou ren pinin atufich ne “fetan non meinisin ekkewe angangepinin ewe Samol” me ren ketiwan seni ewe Pwonen Ngun mi Fel, “non pwisin kunokun,” ewe enukunukun epinipinino minne a ennetin sipwe angei meinisin ekkewe feioch a pwonei.
Ewe Angangepinen Riri Fengen
Ewe riri fengen ren emon mwan me emon fefin non ewe Imwen ewe Samol a ew tekian pwon mi pin me angangepin ren an ewe Samol kapas allim a niwinsefanito. Me akkauchean, atun emon epwe weweiti auchean ewe Pwonen Ngun mi Fel an a etiwa ewe angangepinin riri fengen, ei sinei a anisi ewe aramas kutta ponuan an pwisin kapaseis ren ika an emon pwisin finata a tongeni epeti emon aramas mi tupwen seni an angei feioch mi feifeino minne a feito seni pwon mi pin.
Ewe angangepinin ririr fengen a pachenong ruu nongonong me ekkoch pwan kinikinin: (1) ewe ew chok non feifeino ren emon mwan me emon fefin non pupunu—minne sia weweiti pwe lateral sealing—me (2) ewe riri fengen ren kewe pean pupunu ra ri fengen ngeni Kot me mwirimwirir kewe ra fen fis me ekkewe repwe uputiw—ei sa ko ngeni vertical sealing. Me ruu ekkewe kinikinin ren ewe angangepin mi fokun namot.
Ewe popun me iotek-ren nesoponon ren ewe ririn tempel nefinan emon mwan me emon fefin a pachenong maritan ngun non unusen manauer, ar nikitu fengen, tupwen, angang fengen ne fiu ngeni ekkewe mettoch ese fat me sosotun fonufan, me nikitu ngeni pwapwa esemuch.
Fan ekkoch, non tipengau, ewe popun me iotek-ren nesponon ese fis. Emon neir a fori tipis, ese tupwen, sapeseni nuku non Jises Kraist, ika ekkoch osukosuk minne a forata anini, towauno, me fen kaimu fesen. Non ekkei wewe, emon chon tupwen non ewe pupunu epwe eis, “Mi tongeni emon ese tupwen an a finata met seni pwan emon aramas a sonaseniei met Kot a fen pwonei?” Ewe ponuen ei kapaseis pwe mi fatafatoch apw!
Ewe nikinik an ewe emon ese tupwen ennetin mi wato tatakisin netip me tipechou ngeni punuwan we me chochon an ewe famini. Nge, fofor ese pung seni emon aramas ese tongeni epwe epeti ika akoueno ngeni ewe pwutiwen an Kot tong, pochokun, me feioch ngeni pwan emon aramas. Ewe manaman an ewe Samon ese or kaukun me feifeino Achasefan a tongeni ponuweno mettoch meinisin, iteitan fansoun meinisin, ese nifinifin ian, ngeni emon me emon aramas ion a kamochunuk ngeni ar kewe pwon ngeni I.
Emon chon pupunu io a attai pwon mi pin me ese aier sefan a fangetani ewe tufichin angei ren winikapan ewe ketiwen impwangen ewe Pwonen Ngun mi Fel ren ekkewe ruu lateral (riri fengen nefinen pupunu) ika vertical (riri ngeni Kot me a fiti mwirimwirin me mwan kewe) ren ei angangepinin riri.
Emon mi pupunu mi tupwon ewe chon nikutu ngeni an pwonepin me feino pwan non nukunuk a anomu ewe tupwon ne angei won winikapan ewe fatochun impwangen ewe Pwonen Ngun mi Fel ren ewe vertical me ewe angangepinin riri me ren angei meinisin minne met a pwan pacheta ngeni an pwisin kewe feioch.
Kopwe tongeni eis, “Ifa ussun a tongeni iei ika ew pupunun non tempel ese soposopono?”
Ewe pwaranon nongonong seni Ewe Mwichefenin Jises Kraist ren Aramas mi Pin Non Fansoun Saponon rese kon fosun meinisin tichikin me sokopaten ren ekkei mettoch. Use sinei me use tongeni awewei ren ifa ussun me innet pwonen feioch a kawor. Nge uwa sinei pwonen feioch epwe chok kawor. Esapw or emon chon kao mi tupwen nesoponon epwe tongeni epeti ren ekkewe ese nifinifin feifeinon feiochun nang Kot a pwonei pokiten ren an pwan emon finata ese pung won ei fonufan.
Upwe asopwono ngeni esapw or tipemwaremwaren kapasen pwarata seni King Benjamin: “Ua mochen pwe oupwe ekieki usun ewe feioch me pwapwan nikinikin ekkewe ra aneasochisi ekkewe annukun Kot. Pun nengeni, ra feioch non mettoch meinisin, ren pekin inis me pekin ngun; iwe ika ir mi achocho ne nikitu ngeni nesoponon repwe mumuta ne tonong non nang, ren ewe popun pwe repwe tongeni nonnom ren Kot non ew nikinikin pwapwa ese tongeni much. O chechemeni, chechemeni pwe ekkei mettoch mi ennet; pun ewe Samon Kot a fen apasa.”
Uwa ennetin pwapwa ne pwarata ngeni ewe pungoch an King Benjamin pwonen soufos non iten ewe mi pin ewe Samol Jises Kraist, amen.