’Ia au i tō te Fatu pa’ari tātou i fa’ari’i ai i te Buka a Moromona

Nā te Peresideni Mark L. Pace

Peresideni rahi nō te Ha’api’ira’a Sābati

Tē pure nei au ’ia riro te tai’ora’a i te Buka a Moromona i teie matahiti ’ei ’oa’oa ’e ’ei ha’amaita’ira’a nō tātou tāta’itahi ’e ’ia ha’afātata atu ā ia tātou i te Fa’aora.

Te mau taea’e ’e te mau tuahine here, tē māuruuru nei mātou nō tō ’outou itoito i roto i te tai’ora’a i te mau pāpa’ira’a mo’a e te Mai, pe’e mai. Māuruuru nō te mau mea ato’a tā ’outou e rave nei. E hope’ara’a hōhonu tā ’outou tū’atira’a i te mau mahana ato’a i te Atua ’e tāna parau. « Tē ha’amau nei ’outou i te niu nō te hō’ē ’ohipa faufa’a rahi roa. ’E nā roto i te mau mea iti e tupu mai ai tei rahi roa ra. »

E tauturu te tai’ora’a i te mau ha’api’ira’a a te Fa’aora i roto i te mau pāpa’ira’a mo’a ia tātou ’ia fa’ariro i tō tātou ’utuāfare ’ei vāhi mo’a nō te fa’aro’o ’e ’ei pū nō te ha’api’ira’a ’evanelia. E ani te reira i te Vārua i roto i tō tātou fare. E fa’a’ī te Vārua Maita’i i tō tātou vārua i te ’oa’oa ’e e fa’afāriu ia tātou ’ei mau pipi nā Iesu Mesia roto e a muri noa atu.

I te mau matahiti i ma’iri a’enei, a tai’o ai tātou i te mau buka o te pāpa’ira’a mo’a, ’ua māta’ita’i tātou i te mau hōho’a o te mau ha’api’ira’a a te Atua i tāna mau tamari’i i roto i te mau tau tu’ura’a rahi ato’a o te ’evanelia.

I roto i te mau tau tu’ura’a ato’a, ’ua ’ite tātou i te hō’ē hōho’a mātarohia. E fa’aho’i ’e ’aore rā e heheu mai te Atua i te ’evanelia a Iesu Mesia nā roto i tāna mau peropheta. E pe’e te mau ta’ata i te mau peropheta ’e e ha’amaita’i-rahi-hia rātou. I roto rā i te roara’a o te tau, ’ua fa’aea te tahi mau ta’ata i te ha’apa’o i te mau parau a te mau peropheta ’e ’ua fa’aātea ia rātou i te Fatu ’e i tāna ’evanelia. Tā tātou ïa e parau nei te tāivara’a. ’Ua heheu-nā-mua-hia te ’evanelia ia Adamu, ’ua fāriu ’ē rā te tahi o te mau tamari’i a Adamu ’e Eva i te Fatu i roto i te tāivara’a. Tē ’ite nei tātou i te hō’ē hōho’a nō te fa’aho’i-ra’a mai ’e te tāivara’a i tupu noa i te mau tau tu’uraa o Enoha, Noa, Aberahama, Mose ’e o vetahi ’ē.

Teie mahana, tē ora nei tātou i roto i te tau tu’ura’a nō te ’īra’a o te mau tau. Teie ana’e te tau tu’ura’a e ’ore e hope i roto i te tāivara’a. E tāpa’o teie tau tu’ura’a ’evanelia i te ha’amatara’a o te Tae-Piti-ra’a mai o te Fa’aora Iesu Mesia ’e i tāna fa’aterera’a mileniuma.

E aha te ta’a ’ē-ra’a i roto i teie tau tu’ura’a ? E aha tā te Fatu i hōro’a mai ia tātou i teie mahana, nō tō tātou ihoā rā ’anotau, ’o te tauturu ia tātou ’ia ha’afātata i te Fa’aora ’e ’ia ’ore roa e fa’aru’e iāna ?

Hō’ē pāhonora’a e tae mai i tō’u ferurira’a o te mau pāpa’ira’a mo’a ïa, te Buka a Moromona : te tahi fa’ahou ’ite nō Iesu Mesia iho ā rā.

Noa atu ’ua fafau mai te Atua e ’ore roa te hō’ē tāivara’a rahi e tupu fa’ahou, e ti’a ia tātou ’ia ha’apa’o maita’i ’e ’ia ara ’ia ’ape i tō tātou iho tāivara’a—ma te ha’amana’o, mai tā te Peresideni Russell M. Nelson i ha’api’i mai, « Tei ia tātou tāta’itahi te hōpoi’a nō tō tātou iho tupura’a i te pae vārua. » E ha’afātata tāmau noa te tuatāpapara’a i te Buka a Moromona, mai tā tātou e rave nei i teie matahiti, ia tātou i te Fa’aora—’e e tauturu ia tātou ’ia vai piri noa iāna.

Tē pi’i nei tātou i te reira te « ha’api’ira’a, » ’e e mea maita’i te reira nō te mea e tītau te reira i te tauto’ora’a. Terā rā, ’aita tātou e tītauhia ’ia ha’api’i i te hō’ē mea ’āpī. Te tahi taime, te tai’ora’a i te Buka a Moromona nō ni’a noa ïa i te mana’o e ’ua tū’ati tātou i te Atua i teie mahana—te ’atu’atura’a i te vārua, te ha’apūaira’a i te pae vārua hou tātou e haere ai e fārerei te ao nei, ’aore rā e ’imi ai i te ora i muri a’e i te hō’ē mahana fifi i roto i te ao nei.

E tuatāpapa tātou i te mau pāpa’ira’a mo’a ’ia ti’a i te Vārua Maita’i, te ’orometua rahi, ’ia fa’ahōhonu i tō tātou fa’afāriura’a i te Metua i te ao ra ’e ia Iesu Mesia ’e ’ia tauturu ia tātou ’ia riro rahi atu ā mai ia rāua te huru.

Ma teie mau mana’o i roto i te ferurira’a, e ti’a ia tātou ’ia ui ia tātou iho, « E aha tā te Vārua Maita’i i ha’api’i ia tātou i teie hepetoma a tuatāpapa ai tātou i te Buka a Moromona ? » ’e « Nāhea te reira e ha’afātata ai ia tātou i te Faaora ? »

E mau uira’a maita’i roa teie nō tā tātou tuatāpapara’a papa’ira’a mo’a i te fare. E mau uira’a maita’i ato’a teie nō te ha’amata i te hō’ē piha ha’api’ira’a nō te Sābati i te fare purera’a. E ha’amaita’i tātou i tā tātou ha’api’ira’a i te fare purera’a i te Sābati nā roto i te ha’amaita’ira’a i tā tātou ha’api’ira’a i te fare i te roara’a o te hepetoma. Nō reira, i roto i tā tātou mau piha ha’api’ira’a i te Sābati, « ’o ’oia ’o tei a’o atu ’e ’o ’oia ’o tei fa’ari’i mai, ’e ’ua ha’amāramaramahia ’e ’ua ’oa’oa ’āpipiti ho’i rāua. »

Teie te tahi mau ’īrava tā te Vārua i tu’u mai i roto i tō’u ferurira’a nō roto mai i te tuatāpapara’a o teie hepetoma i te Buka a Moromona :

’Ua fa’ause Nephi ia Iakoba ’ia « fa’aherehere i teie nei mau ’api ’e ’ia hōro’a […] i terā u’i i terā u’i. E mai te mea tē vai ra te tahi mau a’ora’a mo’a, ’aore rā te heheura’a […] ’e ’aore rā te tohu », e mea ti’a ia Iakoba ’ia « pāpa’i […] i te reira i ni’a i teie mau ’api […] nō te maita’i o tō [rātou] mau ta’ata ».
’Ua fa’a’ite pāpū o Iakoba i muri iho : « ’Ua ’imi mātou i te [mau pāpa’ira’a mo’a] […] ’e nō te mea, tē vai ra teie mau ’itera’a pāpū ia mātou nei, ’ua roa’a ïa ia mātou te ti’aturi, ’e ’ua riro tō mātou fa’aro’o ’ei mea ’āueue ’ore. »

Teienei, ’ua fa’aha’amana’o mai teie mau ’īrava iā’u i te mea tā Nephi i parau nā mua atu nō ni’a i te mau ’api veo :

« ’Ua roa’a mai ia mātou te mau pāpa’a parau […] ’e ’ua tai’o i te reira ’e ’ua ’ite mātou ē […] e mea faufa’a rahi ho’i te reira ia mātou, ’e nō reira ho’i i ti’a ai ia mātou ’ia fa’aherehere i te mau fa’auera’a a te Fatu i tā mātou mau tamari’i.

« Nō reira, ’ia au i tō te Fatu ra pa’ari e mea ti’a roa ia mātou ’ia hōpoi atu i te reira nā muri ia mātou, ’a tere ai mātou nā roto i te mēdēbara e tae atu ai i te fenua i fafauhia ra. »

I teienei, mai te mea e pa’ari tō Lehi ’e tōna ’utuāfare ’ia fa’ari’i i te mau pāpa’ira’a mo’a, e pa’ari ato’a ïa te reira nō tātou. ’Aita te faufa’a rahi ’e te mana vārua o te mau pāpa’ira’a mo’a e morohi i roto i tō tātou orara’a i teie mahana.

’Aita e nūna’a ta’ata i roto i te ’ā’ai i fa’ari’i a’enei i te Buka a Moromona ’e i te tahi atu mau pāpa’ira’a mo’a mai ia tātou i teie mahana. ’Oia mau, ’ua ha’amaita’ihia Lehi ’e tōna ’utuāfare i te ravera’a i te mau ’api veo nā muri ia rātou, ’aita rā tā rātou e buka nō te mau ti’ahapa ato’a ! Te Buka a Moromona faufa’a roa a’e, o tā tātou iho ïa buka. Teie te hōho’a tā mātou e tai’o nei.

I roto i te ’ōrama a Lehi nō te tumu rā’au nō te ora, ’ua ha’api’i mai Lehi ia tātou i te faufa’a nō te ’itera’a o te ta’ata iho nā roto i te here o te Atua. I muri a’e i tōna ’amura’a i te hotu, ’ua ’ite atu Lehi i tāna vahine, Saria, ’e tāna nā tamaiti o Nephi ’e o Samu i te ātea iti a’e.

« Tē ti’a ra ratou mai te mea ra ē, ’aita rātou i ’ite i te vāhi tā rātou e haere ra.

« … ’Ua tārape atu ra vau ia rātou, » ’ua parau a’era Lehi, « ’e ’ua parau ato’a atu ra vau ma te reo pūai ’ia haere mai rātou iā’u ra, ’e ’ia ’amu i te hotu, ’o tei hina’aro-roa-hia a’e i tō te mau hotu ’e’ē ato’a ra.

« ’E […] ’ua haere mai ra rātou iā’u ’e ’ua ’amu ato’a ihora i te hotu ».

E mea au nā’u te hi’ora’a ’o Lehi nō te aupurura’a i te mau tamari’i. ’Ua ora ’o Saria, Nephi ’e ’o Samu i te hō’ē orara’a maita’i ’e te parau-ti’a. Tē vai ra rā tā te Fatu hō’ē mea maita’i a’e, hō’ē mea au a’e nō rātou. ’Aita rātou i ’ite i hea e ’ite ai te reira, o Lehi rā ’oia. Nō reira, ’ua pi’i ’oia ia rātou, « ma te reo pūai », ’ia haere mai rātou iho i te rā’au o te ora ’e ’ia ’amu i te hotu. E mea māramarama tāna arata’ira’a. ’Aita e ta’a-’ore-ra’a.

’O vau te hotu nō te hō’ē ā huru ti’ara’a metua. I tō’u vai-tamari’i-ra’a, 11 ’aore rā 12 paha matahiti, ’ua ani mai tō’u metua vahine iā’u, « Mark, ’ua ’ite ānei ’oe iho, nā roto i te Vārua Maita’i, e parau mau te ’evanelia ? »

’Ua hitimahuta vau i tāna uira’a. ’Ua tāmata noa vau nō te riro ’ei « tamaiti maita’i, » ’e ’ua mana’o vau e ’ua nava’i te reira. ’Ua ’ite rā tō’u metua vahine, mai ia Lehi, e hina’arohiai te hō’ē mea hau atu. ’Ua ti’a iā’u ’ia ha’a ’e ’ia ’ite nō’u iho.

Pāhono atura vau ’aita ā vau i fa’ari’i atura i taua ’itera’a ra. E au ē ’aita roa atu ’oia i māere i tā’u pāhonora’a.

’Ua parau mai ra ’oia i te hō’ē mea ’aita roa atu i mo’ehia iā’u. Tē ha’amana’o nei au i tāna mau parau i teie mahana : « Tē hina’aro nei te Metua i te ao ra ’ia ’ite ’oe nō ’oe iho. E ti’a rā ia ’oe ’ia tūtava. E ti’a ia ’oe ’ia tai’o i te Buka a Moromona ’e ’ia pure nō te ’ite nā roto i te Vārua Maita’i. E pāhono mai te Metua i te Ao ra i tā ’outou mau pure. »

’Aita ho’i au i tai’o a’e nei i te Buka a Moromona. ’Aita vau i mana’o ’ua nava’i tō’u pa’ari nō te rave i te reira. Terā rā, ’ua ’ite maita’i a’e tō’u metua vahine.

’Ua fa’atupu tāna uira’a i te hō’ē hina’aro i roto iā’u ’ia ’ite nō’u iho.

Nō reira, i te mau pō ato’a, i roto i te piha tā’u e fa’a’ohipa e piti o tō’u mau taea’e, e tū’ama vau i te mōrī i ni’a a’e i tō’u ro’i ’e e tai’o vau i te hō’ē pene i roto i te Buka a Moromona. I muri iho, ma te tūpohe i te mōrī, ’ua ne’e au mai ni’a mai i te ro’i i ni’a i tō’u turi ’āvae ’e ’ua pure au. ’Ua pure atu ā vau ma te ’ā’au tae ’e ma te hina’aro rahi hau atu i tā’u i ’ore i rave a’enei. ’Ua ani au i te Metua i te Ao ra ’ia fa’a’ite mai iā’u i te parau mau o te Buka a Moromona.

I tō’u ihoa ha’amatara’a i te tai’o i te Buka a Moromona, ’ua ’ite au e ’ua ’ite te Metua i te Ao ra i tā’u mau tauto’ora’a. ’E ’ua ’ite au e mea faufa’a vau nōna. ’A tai’o ’e ’a pure ai au, ’ua tae mai te mau mana’o tāmāhanahana ’e te hau i ni’a iā’u. I terā ’e terā pene, ’ua rahi atu ā te māramarama o te fa’aro’o i roto i tō’u vārua. I roto i te roara’a o te tau, ’ua ’ite a’era vau ’ua riro teie mau mana’o ’ei ha’apāpūra’a o te parau mau nā te Vārua Maita’i. ’Ua ha’api’i au nō’u iho e parau mau te Buka a Moromona ’e o Iesu Mesia te Fa’aora o te ao nei. ’Auē tō’u māuruuru rahi nō te anira’a fa’auru a tō’u metua vahine.

’Ua tāpa’o teie ’itera’a nō te tai’ora’a Buka a Moromona i tō’u tamari’ira’a i te ha’amatara’a te fa’anahora’a tai’ora’a pāpa’ira’a mo’a ē tāmau noa nei i te ha’amaita’i iā’u i teie mahana. Tē tāmau noa nei ā vau i te tai’o i te Buka a Moromona ’e i te tūturi nō te pure. ’E tē ha’apāpū tāmau noa nei te Vārua Maita’i i tāna mau parau mau.

’Ua tano te parau a Nephi. E pa’ari i roto i te Fatu ’ia ta’ita’i tātou i te mau pāpa’ira’a mo’a nā muri ia tātou i te roara’a o tō tātou orara’a. ’Ua fa’ariro te Buka a Moromona te « ’ōfa’i tua tāpe’a » i teie tau tu’ura’a ’ei mea ta’a ’ē i te mau tau tuura’a ato’a nā mua atu. ’Ia tuatāpapa tātou i te Buka a Moromona ’e ’ia pe’e tātou i te peropheta ora, ’aita ïa e tāivara’a i roto i tō tātou orara’a.

E ’ere te anira’a manihini ’ia haere i te rā’au o te ora ma te mau māite i te parau a te Atua i te hō’ē noa anira’a nā Lehi i tōna ’utuāfare, ’aore rā nā tō’u metua vahine iā’u ’ia tai’o ’e ’ia pure nō ni’a i te Buka a Moromona. E anira’a manihini ato’a rā teie nā tō tātou peropheta, te Peresideni Russell M. Nelson, ia tātou tāta’itahi.

’Ua parau ’oia, « Tē fafau atu nei au ē, ’ia tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a fa’ahiahia roa—i te mau mahana ato’a Tē parau fafau atu nei au ē ’ia feruri māite ’outou i tā ’outou i tuatāpapa, e matara te mau ha’amāramarama o te ra’i, ’e e fa’ari’i ’outou i te mau pāhonora’a i tā ’outou iho mau uira’a ’e te arata’ira’a nō tō ’outou iho orara’a. »

Tē ora nei te Metua i te Ao ra. ’O Iesu Mesia tō tātou Fa’aora ’e Tāra’ehara. Tei roto tāna mau parau i te Buka a Moromona ’e tē fa’a’ite nei te reira i tōna here. ’O te Peresideni Russell M. Nelson te peropheta ora a te Fatu i ni’a i te fenua i teie mahana. ’Ua ’ite au e parau mau teie mau mea nā roto i te fa’a’itera’a pāpu a te Varua Maitai, ’itera’a pāpū tā’u i fa’ari’i i te taime mātāmua i tō’u tai’ora’a i te Buka a Moromona i tō’u tamari’ira’a. I te i’oa o Iesu Mesia, ’āmene.