Ang Tanan nga Butang para sa Aton Kaayohan
Sa kabuhi kag sa wala katapusan, ang tuyo sang Pagtuga kag ang kinaiya sang Dios Mismo amo nga ang tanan nga butang magaresulta para sa aton kaayohan.
Subong Abril 6—anibersaryo sang pagpanumbalik ni Jesucristo sang Iya Simbahan sa ulihing mga adlaw—kag bahin sang tiyempo sang Easter nga malipayon naton nga ginapamatud-an ang perpekto nga kabuhi, nagabayad-sala nga sakripisyo, kag mahimayaon nga Pagkabanhaw ni Jesucristo.
May istorya nga Chino parte sa bata sang isa ka tawo nga nakakita sang matahum nga kabayo.
“Kaswerte,” siling sang mga kaingod.
“Tan-awon ta,” siling sang tawo.
Dayon ang bata nahulog sa kabayo kag permanente nga nabalda.
“Kamalas,” siling sang mga kaingod.
“Tan-awon ta,” siling sang tawo.
Nag-abot ang nagpangtawag sa pagkasoldado pero wala ginpilit ang baldado nga bata.
“Kaswerte,” siling sang mga kaingod.
“Tan-awon ta,” siling sang tawo.
Ining pabag-obag-o nga kalibutan masami dawsa ginalabugay, wala kasigurohan, kon kis-a swerte, kag—kalabanan—malas. Pero, sa sining kalibutan sang pag-antos, “nakahibalo kita nga ang tanan nga butang ginahimo sang Dios para sa kaayohan sang mga nagahigugma sa Iya.” Matuod gid, kon nagahimo kita sing matarong kag ginadumdum ang aton mga kasugtanan, “ang tanan nga butang magaresulta sa inyo kaayohan.”
Ang tanan nga butang para sa aton kaayohan.
Dalayawon nga promisa! Makapaumpaw nga pasalig halin sa Dios Mismo! Sa milagroso nga paagi, ang tuyo sang Pagtuga kag ang kinaugali sang Dios nga Amay kag Iya Anak, nga si Jesucristo, amo ang paghibalo sang katapusan halin sa ginsuguran, agud ipahanabo ang tanan nga magaresulta sa aton kaayohan, kag buligan kita nga mangin matinlo kag balaan paagi sa grasya kag Pagbayad-sala ni Jesucristo.
Ang Pagbayad-sala ni Jesucristo makahilway kag makatubos sa aton sa sala. Pero si Jesucristo personal man nga nakahangop sang tagsa naton ka kasakit, pag-antos, balatian, kalisod, kag pagkahamulag. Sa sining kabuhi kag sa wala katapusan, ang Iya kadalag-an sa kamatayon kag impiyerno magahusto sang tanan. Nagabulig Sia nga mag-ayo ang nalisdan kag ginatamay, maghangpanay ang akig kag nagailinaway, maumpawan ang nagakasubo kag nagaisahanon, paisogon ang mga nagaduhaduha kag di-perpekto, kag maghimo sang mga milagro nga posible lamang sa Dios.
Nagakanta kita sang aleluya kag nagasinggit sang hosana! Upod ang wala katapusan nga gahum kag wala dulonan nga kaayo, sa plano sang kalipay sang Dios, ang tanan nga butang magaresulta sa aton kaayohan. Sarang naton nga atubangon ang kabuhi nga may kompiansa kag indi kahadlok.
Kon kita lang, indi naton mahibal-an ang aton kaayohan. Kon “pilion ko ako,” ginapili ko man ang akon kaugalingon nga mga limitasyon, kahuyang, kag kakulangan. Sa katapusan, agud makahimo sang pinakamaayo, dapat kita mangin maayo. Tungod wala bisan sin-o nga maayo kundi ang Dios lamang, nagatinguha kita nga maperpekto kay Jesucristo. Mangin pinakatunay, pinakamaayo naton kita nga kaugalingon lamang kon ipahigad naton ang kinaandan nga tawo kag mangin pareho sang bata sa atubang sang Dios.
Upod ang aton salig kag pagtuo sa Dios, ang mga pagtilaw kag mga pag-antos sarang makonsagrar para sa aton kaayohan. Si Jose, nga ginbaligya sa pagkaulipon sa Egipto, sang ulihi nagluwas sang iya pamilya kag katawhan. Ang pagkapriso ni Propetang si Joseph Smith sa Liberty Jail nagtudlo sa iya nga “ining mga butang magahatag sa imo sang eksperiyensya, kag mangin para sa imo kaayohan.” Ang pagkabuhi nga may pagtuo samtang nagaagi sa mga pagtilaw kag mga sakripisyo nga wala naton ginpili makabugay sa aton kag sa iban sa mga paagi nga indi gid naton mahunahuna.
Nagadugang ang aton pagtuo kag pagsalig sa Ginuo nga ang tanan nga butang magaresulta sa aton kaayohan kon mag-angkon kita sang wala katapusan nga panan-aw; hangpon nga ang aton mga pagtilaw mangin “sa malip-ot lamang nga tion”; kilalahon nga ang pag-antos makonsagrar para sa aton kaayohan; batonon nga ang mga aksidente, hinali nga kamatayon, malala nga mga balatian bahin sang kabuhi; kag magsalig nga ang aton mahigugmaon nga Amay nga Langitnon wala nagahatag sang mga pagtilaw sa pagsilot ukon paghukom. Indi Sia maghatag sang bato sa nagapangayo sang tinapay ukon man-og sa nagapangayo sang isda.
Kon mag-abot ang mga pagtilaw, kasami gusto gid naton nga may mamati kag mag-upod sa aton. Sa sina nga tion, ang kinaandan nga mga sabat indi makabulig, bisan ano pa kamakapaumpaw ang ila tuyo. Kon kis-a gusto naton nga may magkalisod, magbatyag, kag maghibi upod sa aton; tugotan kita nga ipabutyag ang kasakit, kapaslawan, bisan pa gani kaakig; kag kilalahon upod naton nga may mga butang nga indi naton mahibal-an.
Kon nagasalig kita sa Dios kag sa Iya gugma sa aton, bisan ang aton pinakadaku nga mga pagtilaw, sa ulihi, magaresulta sa aton kaayohan.
Madumduman ko ang adlaw nga nakabaton ako sang balita parte sa grabe nga aksidente nga naglakip sang akon mga pinalangga. Sa sinang tinion, sa kalisod kag pagtuo, makaugyon kita kay Job sa pagsiling, “ang Ginoo naghatag, kag ang Ginoo nagkuha; pakamaayohon ang ngalan sang Ginoo.”
Sa bilog nga Simbahan sa bug-os nga kalibutan, mga 3,500 ka stake kag district kag 30,000 ka ward kag branch ang nagaserbe nga dalangpan kag palasilongan. Pero sa aton mga stake kag ward, ginaatubang sang madamo nga matinuohon nga mga pamilya kag mga indibidwal ang mabudlay nga mga hangkat, nga nakahibalo nga (bisan wala pa nahibal-an kon paano) ang tanan magaresulta sa ila kaayohan.
Sa Huddersfield, England, Si Brother Samuel Bridgstock na-diagnose nga may stage-four cancer antes sa pagtawag sang bag-o nga stake president. Tungod sang iya malala nga diagnosis, namangkot sia sa iya asawa, nga si Anna, kon ngaa makadto pa sia para sa interbyu.
“Tungod,” siling ni Sister Bridgstock, “tawgon ka nga mangin stake president.”
Sang primero nga ginhatagan lang sing isa ukon duha ka tuig nga mabuhi, si Pangulong Bridgstock (nga ari diri subong) ara na sa ika-apat nga tuig sang iya pagserbisyo. May maayo kag mabudlay sia nga mga adlaw. Ang iya stake nagauswag sa dugang nga pagtuo, pag-alagad kag kaayo. Indi mahapos, pero ang iya asawa kag pamilya nagapangabuhi nga may pagtuo, pagpasalamat, kag mahangpan nga kasubo nga ginasaligan nila mangin wala katapusan nga kalipay paagi sa nagapanumbalik nga Pagbayad-sala ni Jesucristo.
Kon kalmado kita, bukas, kag matinahuron, mahimo naton mabatyagan ang katahum, katuyuan, kag katawhay sang ginatanyag sang Ginuo nga koneksyon paagi sa kasugtanan. Sa sagrado nga tinion, mahimo tugotan Niya nga masiplatan naton ang mas daku nga wala katapusan nga realidad nga nagalakip sang aton adlaw-adlaw nga pangabuhi, sa diin ang magagmay kag simple nga mga butang nagaresulta sa kaayohan sang mga taghatag kag tagbaton.
Si Rebekah, ang bata nga babayi sang akon una nga mission president, nagpaambit kon paano ang Ginuo nagsabat sang iya pangamuyo para sa kaumpawan upod ang wala ginapaabot nga oportunidad nga sabton ang pangamuyo sang iban.
Isa ka gab-i, si Rebekah, nga nagapangasubo sa pagkapatay sang iya iloy bag-o lang, klaro nga ginpabatyag nga magbakal sang gasolina para sa iya awto. Pag-abot niya sa gasolinahan, nakita niya ang isa ka tigulang nga babayi nga nagatinguha nga magginhawa sa bulig sang daku nga tangke sang oxygen. Sang ulihi, ginhatag ni Rebekah sa babayi ang gamay nga oxygen machine sang iya iloy. Ini nga sister mapasalamaton nga nagsiling, “Ginbalik mo sa akon ang akon kahilwayan.” Ang tanan nga butang nagaresulta sa kaayohan kon magminister kita pareho kay Cristo.
Isa ka amay nga ginpares sa iya 14-15 anyos nga bata nga lalaki sa ministering nagpaathag, “Ang ministering amo ang pagbaylo naton halin sa kaingod nga nagahatag sang cookies pakadto sa masaligan nga mga abyan, espiritwal nga una nga mga manugtabang.” Ang koneksyon paagi sa kasugtanan kay Jesucristo nagapaumpaw, nagaangot, kag nagakonsagrar.
Bisan sa trahedya, ang espirituhanon nga paghanda nagapadumdum sa aton nga ang aton Amay nga Langitnon nakahibalo kon san-o pinakamaluya kita kag nagaisahanon. Halimbawa, isa ka pamilya nga ang bata gindala sa ospital naumpawan sang madumduman nila nga ang Balaan nga Espiritu naghutik na ngadaan kon ano ang paabuton.
Kon kis-a ang mas daku nga wala katapusan nga realidad nga ginatugot sang Ginuo nga mabatyagan naton nagalakip sang pamilya nga napatay na. Isa ka sister ang nakakita sang kalipay sa pagbaton sang ginpanumbalik nga ebanghelyo ni Jesucristo. Pero duha ka mapait nga inagihan ang may daku nga epekto sa iya kabuhi—ang pagkasaksi sang isa ka aksidente sa barko kag ang masubo nga pagkadula sang iya iloy, nga nag-utas sang iya kaugalingon nga kabuhi.
Pero gindaug sining sister ang iya kahadlok sa tubig agud magpabunyag paagi sa pagtugmaw. Kag sa isa ka nangin malipayon kaayo nga adlaw, nasaksihan niya ang isa ka tawo, nga nag-proxy sa iya napatay nga iloy nga mabunyagan sa templo. “Ang bunyag sa templo nag-ayo sa akon iloy, kag naghilway sa akon,” siling sang sister. “Amo ato ang una nga tion nga nakabatyag ako sang kalinong humalin sang napatay ang akon iloy.”
Ang sagrado naton nga mga musika nagasulit sang Iya pasalig nga ang tanan nga butang makaresulta sa aton kaayohan.
Ang Libro ni Mormon ebidensya nga makaptan naton sa aton mga kamot nga si Jesus amo ang Cristo kag ang Dios nagatuman sang Iya mga propesiya. Ginsulat sang inspirado nga mga propeta nga nakakita sang aton panahon, ang Libro ni Mormon nagasugod sa matuod-tuod nga drama—isa ka pamilya nga nagapangatubang sang madalom nga mga di-paghangpanay. Pero, kon tun-an kag binagbinagon naton ang 1 Nefi 1 hasta Moroni 10, nagalapit kita kay Jesucristo paagi sa malig-on nga testimonya nga ang natabo didto kag sadto makabugay sa aton diri kag subong.
Samtang mas ginapapalapit sang Ginuo ang mga balay sang Ginuo sa mas madamo nga lugar, paagi sa Iya buhi nga propeta, ang mga bugay sang templo nagaresulta sa aton kaayohan. Nagapalapit kita paagi sa kasugtanan kag ordinansa sa Dios nga aton Amay kag kay Jesucristo kag nagaangkon sang wala katapusan nga panan-aw sa mortalidad. Nga ginahikot sing tinag-isaisa kag sa personal nga paagi, ginatanyag naton sa pinalangga naton nga mga miyembro sang pamilya—mga katigulangan—ang sagrado nga mga ordinansa kag mga bugay sang kasugtanan sa sulundan sang Ginuo nga mangin mga manluluwas sa bukid nga Sion.
Sa mas paglapit sang mga templo sa aton sa madamo nga lugar, isa ka sakripisyo sa templo nga mahalad naton amo ang pagpangita sang pagkabalaan sa balay sang Ginuo sing mas pirme. Sa madamo nga tinuig, nagsupot kita, nagplano kag nagsakripisyo agud makakadto sa templo. Karon, sa itugot sang mga sirkumstansya, palihog magkadto sing mas masunson sa Ginuo sa Iya balaan nga balay. Tugoti nga ang tayuyon nga pagsimba kag pag-alagad sa templo magbugay, mag-amlig, kag mag-inspirar sa imo kag sa imo pamilya—ang pamilya nga imo subong kag ang pamilya nga mangin imo sa pila ka adlaw.
Amo man, kon itugot sang inyo sirkumstansya, palihog hunahunaa ang pagbakal sang inyo kaugalingon nga panapton para sa templo. Isa ka lola sa imol nga pamilya ang nagsiling nga sa tanan sa bilog nga kalibutan, ang gusto gid niya amo ang mag-angkon sang iya kaugalingon nga bayo para sa templo. Ang iya apo nagsugid, “Naghutik si lola, ‘Maalagad ako gamit ang akon kaugalingon nga bayo sa templo, kag kon mapatay ako, ilubong ako nga suksok ang mga ini.’” Kag pag-abot sang tion, ginlubong sia suksok ang mga ini.
Pareho sa ginatudlo ni Pangulong Russell M. Nelson, “Tanan nga aton ginapatihan kag tagsa ka promisa nga ginhimo sang Dios sa Iya katawhan sa kasugtanan nagaangot sa templo.”
Sa kabuhi kag sa wala katapusan, ang tuyo sang Pagtuga kag ang kinaiya sang Dios Mismo amo nga ang tanan nga butang magaresulta para sa aton kaayohan.
Ini ang wala katapusan nga katuyoan sang Ginuo. Ini ang Iya wala katapusan nga panan-aw. Ini ang Iya wala katapusan nga promisa.
Kon ang kabuhi magamo kag ang katuyoan indi klaro, kon gusto ninyo sang mas maayo nga pangabuhi pero indi kamo makahibalo kon paano, magpalapit palihog sa Dios nga aton Amay kag kay Jesucristo. Magsalig nga buhi Sila, nagapalangga sa inyo, kag luyag nga ang tanan nga butang magaresulta sa inyo kaayohan. Nagasaksi ako nga ginahimo Nila, nga wala sing dulonan, wala sing katapusan, sa sagrado kag balaan nga ngalan ni Jesucristo, amen.