Mithmith ko ba Nifiy nib Mith
Got ma rung’ag urngine pi meybil ni ngad yoeged me fulweg gubin ulan e wo’ nike fal’eg ko machalbog rodad.
Pi walageg, kug fek e ganop nib mo’omaw’ madako fa binem e yay ni kug sakiy’ ura’ ko October 2022. Ko binem e machib: Fa’anra dabi pii’ e milwol nib fel’, dabiyog ni ngam non ulan bochi bin magid e pi mo’olung. Kam guyed ni gube thapeg e muruwel’ rog nifan ko bin summ’on e mo’olung ko biney. Machane dabi sapgad ni gube par ni bay e lock nib moen ni nge bing. Fa’anra dabi fal’rogon e biney e thin e daba’, ma dabguyem ko conference iyan ngaram.
Thothup nikan thamiy ko tang nikan yoen’, e kug fil boch e lesson, ko ayuw rok Somoel, niguba’adag ninggu yoeg boch mornga’agen e daba’. Nira fal’eg e milwol ney ni rib mo’omaw ni fan nigeg.
Ni rib mo’omaw’ ko gubin e binen ni ke buch ngog ni de n’uw napan ir e yim’ ko le’engin nib t’uf rog, ni Pat. Ir eth’abi fel’ u fithik’ e gubin e bpin guba nang—le’engin nge mitin nib fel’, ir ni rib fel’, ni bay e tawa’ath ko ayuw, nge ya’el rok’. Nike pii’ e milwol kafram ma kanoeg “Rrin’ed e Pi’nen nifan e Sunmiy Romed.” Kug lemnag ni ke rrin’ e pi’nen nifan e sunmiy rok’ ni rib mangil nibbaga’ ngak boch a girdii’. Ir e fak Got nib polo’, ni’ir e reb e bpin nima par ni wod wo’en Kristus. Kan tawa’ath nigeg niku paer ulan e yafos rok’ ni 60 e dew rog. Fa’an nube pow e tin nib mataw rok, m’ag rogmew ba yip’ fan rayog ni nggu paer ngak ni gubinechubog.
Reb e pi’nen ni kug fil ke buch 48 pi awa tomuren e gum’eyag rok’ e le’engin. U ngiyal’ nem, thingargu gurgur nggu waen nga aspital bachane m’ar nib kireb rog. Ufithik’ bin magid aningeg e pi wiik kug paer ulan e aspital ulan e singil ni fan e gidii’ nib kireb e m’ar ma’ug mol nib nu’uw yang.
Chuchugur ko gubin e pi’nen ni ke buch ngog ulan fare aspital ufithik e ngiyal’ nem ni dabgu puguran. Machane e pi’nen dabgupagtalin ir e milekag ni kug fek u wuru’fare aspital, ni kug lemang ir e p’eebugul ko yafos nib manimus. Dabgu weliy gubin mornga’agen e pi’nen ni ke buch ara’, machane rayog ni nggu gog e fonow ni nggu sul ko machib rog nibay e papay riy, ni rib ga’ e tawathiy nag, me ga’ nag lemnag ko Tathapeg, nge ga’ nag e mich nifan e thin Rok’.
Dabgu tal’eg e thamiy rog ni kug thapeg e lik’aey rog marnga’agen e thogthog nikey thapeged e ragag nge la’agruw chuchugur 200 duw faram:
“Gamed ra fek e fithingan ngadaken med … [nge] pii’ e thin rog yaeni mada’ nga tungun e fayleng. …
“… Kadkabul ko kadkabul; nge rran ko rran ngam pii’ e lam’ed ko wale’; nge napan ra yib e nep’ dab mu pii’ e mol ngak e gidii’ ko feylang, bachane e thin romed. …
“Sakiy nga lang[,] … fek e kruth rom, [nge] mu lakeg.”
Pi walageg nib t’uf rog, madako pi’ney ni ke buch, kug guy rogon nib gel ni nggu fek e kuruth rog, ni gube guy rogon ni nggu gog ulan e lamag nib apostle nifan e pi’nen nib fel’ nge wale’ ulan e kakadbul, nge misiw’, nge balayal’.
Binem be powi’iyeg ngak e bin dalip e riyul’ ni kug thapeg ufithik’ e pi pul nibay e malog, m’ar, nge magawon. Binem e ba m’ag rog nike be’ech nag ni fan ko yibliy—pi meybil romed—nifan ngog nge fal’ngig. Gura og nag e magar ni manemus nifan ko gidii’ ni pire’ nima, ni wod fare bpin ni dariy figirngin, ni ul’ul’ nge ning e ayuw u tharmy nifan ngog. Kug thapeg e meybil ko priesthood mug guy fapi gidii’ ni kug wared nga high school u ta’abang ni kar balay nag e abich nifan ngog, ni ku wod boch e ward nge Galasia. Ma fithingag e sana bay ko gubin e meybil ulan urngin e temple ko Galasia.
Ulan e magar rog nib ga’ nifan pi’ney, gube un G. K. Chesterton, ni ke yoeg, “magar ir thabi’ tolang e ganop; nge … ba’adag ir e falfalaen’ ni ba ga’ nag udakaen e ma’ang’ang.” Ko birog e “falfalaen’ ni ba ga’ nag udakaen e ma’ang’ang,” gube oge e magar ngomed nge pinning e magar ngak e Chitamang ni bay u Tharmiy, ni ke rung’ag e pi meybil romed nge tawa’ath nag e yafos rog.
Pi walageg, gube micheg ni Got ma rung’ag urngin e pi meybil ni ngad yoeged me fulweg gubin ulan e wo’ nike fal’eg ko machalbog rodad. Guma nang ni ta’abrogon e ngiyal’ ni bo’or gad e kar meybilgad nifan e sulweg ko gelngin e doweg, nge bo’or gad—ni tay e bu’un nigeg—kar meybilgad nifan e sulweg ko gelngin e dow ko le’engin rog. Gube micheg ni gali meybil ney ni rung’ag nge ke fulweg e Chitamangiy nu Tharmiy ni bay adag nib thothup, ni fa’anra fapi meybil nifan ko Pat de fulweg rogon ni kug fith. Ir e fan rok Got ni nge nang mangfan e fulweg ko pi meybil nira buch nib thil ko rogon ni gadad ba’adag—machane gube michmicheg ni yeardra ma rung’an, nge ir ma fulweg udakaen e rogon rok nib t’uf ni dani m’ay.
Fa’anrad gadad “dabi fith nib kireb,”dariy’ e m’ay nifan e ngiyal’, tafen, fa fan thingardad meybil gad. Udakaen e pi thogthog, thingard “meybil gubin e ngiyal’.” Thingarda meybil gad, keyog Amuleg, nifan “pi’in ni yaed bay u ta’ab med,” ni bay e mich me “meybil rok [be’] nib mat’aw e bay angin ni ba ga’.” Meybil rodad nira buch udakaen e lam nib ga’ fa’andra rayog. Fa’an ni dabiyog ni ngam rrin’, thigari thapeg e pi’nen nima moeg ulan e gum’ircha’dad. Gadaed be tang ni meybil rodaed e “[pi]mithmith ko ba nifiy nib mith,” ni gubin ngiyal’ ma rayag i pii’, ni wod rogon ni rrin’ Somoel, ngak Got ni’ir e fare Chitmangiy ni manechubog u dakean fithingan ni ma’agirag Rok’.
Pi tafagar rog, meybil rodaed e irreram e awa’ ni rib fel’, ni’ir e “tin nib polo’ ni gadaed ba’adag,” ni polo’ ko liyor rodaed. Thingardad meybil ni kemus dad, ulan e tabinaw, nge ulan e chongin. Thingarda meybil gaed ni nge mamg yiroriy daed ko lumel, ma fa’anra bay e ngiyal’ gadad ra dabug ni ngad meybil gad, rayog gadad ma nanged binem de yib ngak Got, ni’ir ba’adag ni nge non ngak e bitir rok’ demtrug nge gubin e ngiyal’. Riyul’, e rogon ni nge taleg ngodad ni ngad meybil gad nima yib ngak e To’ogor. Nge, napan dabda nanged urogon fa fan ko meybil, thingarda tabab, nge ul’ul’, madako fare Kan ni Thothup nira powi’iy dad ngak e meybil bat’uf ni ngagd pii’ed. Thingarda rrin’ed e rogon ney napan ni gadad ra meybil nifan e to’ogor rodad nge pi’in nib kireb ngodad.
Riyul’, rayog ni ngad sapgad ngak e susun rok Tathapeg ni ke meybil bo’or, ni bo’or yay. Machane ni bay e l’agaen’ rog ni Yesus nike thamey thingari t’uf ni nge meybil. Ir e machalbog fa? Mang e pii fan ba t’uf ni ngan meybil nag? Kug fil ni kumus Ir, nib mu’un ngodaed, e ba’adag ni nge “guy [owchen e Chitamangin, michuwaen’ ko thin rok’, me michuwean’ ko t’ufeg rok’.” Tomuren, me chuweg ir ko gidii’ u mm’on ni meybil nga tharmiy ko tin nibay ko tafney rok’. U bochi reb e ngiyal’, ni ke meybil ufithik’ e ulungi ko fagar rok’. Make gaaweeg e tharmiy nifan ngak fapi gidii’ ni pire’ ni kar upnguyed e burey. Ma bochingiyal’ ma meybil e ma gael’ rama’en e mad rok’. Ma bochingiyal’ ma kuma gael’ rama’en owchen. Bochi yay ni ke sakiy nga lang napan ni ke meybil, bochi yay ni ke ragbug nga but’, nge ta’areb e yay ni ke yan i paraw nga but’.
Me weliy Luke marunga’agen e bayul rok’ Yesus ni thingari meybil ni “tay ir riy.” Machane urogon rogon bee’ nib machalbog nibe meybil ni ta’riy? Gadad be lemnag gubin e pi meybil rok’ ir tay ir riy, machane napan nike mugu’ul e bayul ni maligach nge ufithik’ e amith nike yib ngak, ni ke meybil nib gel, nibay tomal ko maligach rok’ e fek e racha’ e ra yib u gubin e mt’uft’uf ko yalach u doew.
Ufithik’ e ya’an ney nifan e gel nag rok’ Kristus ko yam’ nge tawa’ath ni ke pii’ ngog ni nggu fos ko bochi e pi wiik fa pi pul, gube pii’ e m’ag rog marunga’agen e tin riyul’ nifan e yafos nib manimus nge thingarda t’uf dad ni ngad taanam gad nifan em.
Gube micheg ni napan nira yib Kristus, mara tu’uf ni nge poydaed—ni gathi kemus ni bugi members ni bay fithingan raed ulan fare record machane bugi members ni yaed be micheg, nib michuwean’raed, ni yaed pi gachalpen ni yaed be ayuweg fapi m’ag roraed. Biney e rib ga’fan ni fan ngodaed ni gubin, ya fa’anra dangay ma gadaedra rung’ag e bin ba’aray e thin: “dan gu nangem,” fa, wod rogon ni pilyeg Joseph Smith e thin riy, “[Gur] e dan mu nangeg.”
Biney, e muruwel e rib tu’uf e ayuw riy rodaed—btu’uf e ayuw riy ni bo’or. Ba tu’uf ni nge michuwaen’daed ngak e pi angel nge fapi michmicheg ko priesthood nib thothup. Ba tu’uf ni nge michuwean’ daed ko fare tawa’ath ko fare Kan ni Thothup, pi tafagar nge tabinaew nib fel’, nge fare gelngin e t’ufeg rok’ Kristus. Rib t’uf ninge michan’dad ngak fapi profet rodad, nge seers, nge revelators nge President Russell M. Nelson. Thingarda mich u wan’ dad ni meybil nge wenig rodad nge tin nib mangil rodad, e riyul’ nrayag ni powi’iydad nga “Mount Zion, … fare binaw rok’ Got nima fos, fare tafen nib thothup, ni rib thabi ga ko thothup.”
Pi walageg, napan ni gadaedra kalngan’ ko pi denen rodaed ma gadaed sul ko fare “toffen e pilung ko murnguy,” ni gadaed be tay e tin nibay u gum’ircha’endaed, ma rayag ni ngad pire’eged e runguy nge man’agfan nibe yib ko Chitamangiy nib manechubog, nge fare fak nib ta fol. Ma arram, ni gadaed ngak Job nge pi’in nib yul’yul’, e gadaedra par ulan fare fayleng ni “rib fel’” ni momaw’ ni ngan nangfan. U dakean fithngan Yesus Kristus, amen.