Emaron̄ Kōmour Eō!
Kōmour eo an Rilo̧mo̧o̧r im kajoor in pinmuur eo ej jerbal n̄an likjab ko jaar jab kōtmeni, kāālet ko rebōd, idajon̄jon̄ ko, apan̄ ko an aolep kain—barāinwōt jerawiwi ko ad.
Moronai ej kallim̧ur bwe n̄e jej riiti Bok in Mormon im kajjitōk ippān Anij Jemān Indeeo, kōn lukkuun kōttōpar, im ewōr tōmak ilo Kraist, Anij enaaj kwaļo̧k m̧ool in jān kajoor eo an Jetōb Kwojarjar.1 Milien armej em̧ōj aer bōk kallim̧ur in im kar bōk juon kam̧ool kōn Jepļaaktok eo an tarlep in gospel eo an Jisōs Kraist.
Moronai ej kōketak kōj, ilo ad riiti Bok in Mormon, n̄an “keememej ekōjkan an Irooj kar tūriam̧okake ro nejin armej, jān ejaake an Adam em̧ool laļtak m̧ae iien [in]… im [n̄an] kelmenļo̧kjeņ [ilo] būruōd.”2 Bwebwenato ko im katak ko ilo Bok in Mormon rej kakeememej kōj im kam̧ool kōn iakwe eo an Rilo̧mo̧o̧r, tiriam̧o, im jouj.
Jema ekar jako ilo Eprōļ 2013 eo. Ke iaar pojak in kōnono ilo ilomej eo an, iaar kile ewi jon̄an aō kar jeraam̧m̧an n̄an jeļā im iakwe eoon ko rem̧m̧an ippān. Eaar kwaļo̧ki ilo iien ippān doon ko an baam̧le, im ej riiti tok n̄an eō n̄e ij aikuj kapilōk, tōl, ak kōkajoorļo̧k tōmak eo aō. Iaar ron̄ an kwaļo̧ki ilo kōnono ko im ijjitōn̄ ko an. Iaar jab jeļā wōt kaki, ak iaar maron̄ keememeji wōt ainikien im jetōbin en̄jake ko ij būki n̄e ej kwaļo̧ki. Ilo iien jeer eoon ko im en̄jake ko, jema ekar jipan̄ eō n̄an ejaake juon pedped in tōmak eo epen ilo Irooj Jisōs Kraist.
Jema eaar lukkuun iakwe bwebwenato in loļo̧k eo an Rilo̧mo̧o̧r n̄an armej in Nipai ro.3 Bwebwenato in ekwojarjar ej kōn kar jerkakpeje im aiboojoj an Irooj Jisōs Kraist. E ekar idaak kap eo emeo̧ im en̄taan kōn men kein n̄an aolep bwe ren maron̄ jab en̄taan eļan̄n̄e renaaj ukweļo̧k.4 E ekar loļo̧k laļ eo an jetōb im kar karōke n̄an kwaļo̧k gospel eo ijeņ.5 E ekar jerkak jān mej, im E ekar pād ippān im bōk kien ko jān Jemān n̄an jeere eoon ko ippān riNipai ro me renaaj kōjeraam̧m̧an epepen ko ilju im jekļaj.6 E ekar aiboojoj im ewōr aolep An kajoor indeeo im maron̄. Jemaron̄ katak jān aolep katak ko An.
Ilo 3 Nephi 11, jej riit elmen an Rilo̧mo̧o̧r kar wanlaļtak jen lan̄ n̄an katakin riNipai ro bwe E Jisōs Kraist, eo rikanaan ro raar kam̧ool ke enaaj itok n̄an laļin. E ekar kwaļo̧k bwe E ej Meram eo an Laļ im bwe Ej kaiboojoj Jemān n̄an bōk jerawiwi ko an laļ. E eaar kūrtok armej ro n̄an itok n̄an karum̧ļo̧k peier ilo Katin n̄an en̄jake kōnjāņ dila ko ilo Pein im Neen. E eaar kōņaan bwe ren jeļā bwe E ekar Anij in Israel, eo ekar mej kōn jerawiwi ko an laļ. Armej ro raar m̧ōņōņō, raar etal juon ilo̧k juon m̧ae iien raar aolep loe im en̄jake ke E ej lukkuun m̧ool eo eaar jeje jen rikanaan ro ke enaaj itok.7
Jisōs eaar katakin riNipai ro kōn aorōkin ukweļo̧k, n̄an erom̧ āinwōt ajri edik, im kōn aikuj eo n̄an peptaij jen juon eo ej kabwijer mālim eo An. Innām E eaar kwaļo̧k katak eo me jej katak kake iiō in ilo Kallim̧ur Ekāāl.
Ilo 3 Nephi 17, jej riit bwe Jisōs ekar jiron̄ armej ro bwe etōrein An ilo̧k n̄an Jemān im bar kwaļo̧k E make n̄an bwij ko an Israel rejako.8 Ke Eaar bōk mejān jān jarlepju eo, Eaar lo ke raar jan̄, raar mejōk wōt E āinwōt n̄e raar kajjitōk Ippān n̄an pād wōt aetokļo̧k ippāer.9
Uwaak eo an Rilo̧mo̧o̧r n̄an riNipai ro ekar im̧we er im lukkuun kōmeleleik er. Eaar ba, “Lo, en̄jake ko Aō robrak kōn tūriam̧okake kom̧.”10
Ij tōmak bwe An tūriam̧okake ekar ļapļo̧k jān juon uwaak n̄an dānnin kōmjaaḷaḷ ko an armej ro. Ilo kalimjōk ļo̧k E emaron̄ kar lo er kōn mejen en̄taan in pinmuur eo An. E eaar lo aolep aer metak, en̄taan, im kapo. E eaar lo nan̄inmej ko aer. E eaar lo m̧ōjņo ko aer, im E eaar jeļā jān An kar en̄taan ilo Getsemane im ioon Golgotah elmen jipan̄ er ekkar n̄an m̧ōjņo ko aer.11
Ejjeļo̧k oktak, n̄e ad Rilo̧mo̧o̧r, Jisōs Kraist, ej lo kōj, Ej loe im meļeļe metak im eddodo ko ad kōn jerawiwi. Ej lo men ko jej an̄n̄ūr i im apan̄ ko ad. Ej lo apan̄ im m̧ōjņo̧ ko ad ilo jabdewōt wāween—im Ej obrak kōn tūriam̧o kōn kōj.
An kūr n̄an riNipai ro: “Ewōr ke jabdewōt ilubwiljimi ej nan̄inmej? Kom̧in bōktok er. Ewōr ke jabdewōt iami ej akā, ak pilo, ak jipikpik, ak kinejnej, ak lōba, ak ro re mej ānbwinnier, ak ro rejarron̄ron̄, ak ro rej m̧ōjņo̧ ilo jabdewōt wāween otemjeļo̧k? Kom̧in bōktok er im Inaaj kōmour er, bwe ewōr Aō tūriam̧okake kom̧; en̄jake ko Aō reobrak kōn tūriam̧o.”12
Im armej ro raar wōnm̧aanļo̧k “kōn aolep er ro raar m̧ōjņo̧ ilo jabdewōt wāween otemjeļo̧k.”13
Ilo 1990 eo kōm kar jokwe ilo juon pukwon jidikdik ilo Sale, ilo Victoria, Australia. Kōm kar lukkuun poub ippān baam̧le, Kabun̄ in, im jerbal. Juon jam̧ar Jadede eaiboojoj m̧okta jān Kūrijm̧ōj, kōm kar pepe n̄an loļo̧k jet baak ko im parijet ko rem̧m̧an. Ālkin m̧ōņōņō kōn juon iien ikkure em̧m̧an an baam̧le, kōm kar aiin doon im kanne wa eo im jepļaak. Ke kōmij ettōr, iaar jino emejkiki im kōm̧m̧an bwe en itaak wa eo. Ālkin jidik iien ke ij mour tak iaar reito-reitak ilo wa eo. Kōrā eo pāleeō, Maxine, ekar jorrāān neen im kar pen an menono. Eaar jorrāān diin. Leddik ro jilu nejum̧ raar bwilōn̄ ak kam̧m̧oolol bwe EM̧M̧AN aer pād. Ekar wōr jidik ikinejnej ippa. Ak ļaddik eo nejum̧ ļalem an iiō eaar jab m̧akūtkūt.
Inepata im pok kōn itaak eo, leddik eo nejum̧ erūttotata 11 an iiō, Kate, eaar m̧ōkaj in ba, “Baba, kwoj aikuj leļo̧k juon kōjeraam̧m̧an n̄an Jarom.” Ālkin jidik apan̄, leddik ro nejū im n̄a kar diwōj jān wa eo. Maxine eaar jab maron̄ m̧akūtkūt. Iaar kōm̧anm̧an aō kotak Jarom, ke ij babu laļ kōn likū, iaar m̧ōkaj in likūt e ioon ubō im leļo̧k n̄an e juon kōjeraam̧m̧an an priesthood. Ilo iien eo waan aujpitōl ej tōkeāktok ālkin 40 minit, Jarom ekar m̧akūtkūt.
Bon̄en eo iaar likūt jilu uwaan baam̧le eo ilo aujpitōl im kōmjeļ ruo iaan leddik ro nejū kar iuwe ilo juon tākji n̄an m̧weeo. Ilo aolepen bon̄en eo, iaar akweļap n̄an Jemedwōj Ilan̄ bwe baam̧le eo aō im ro raar jorrāān ilo wa eo juon ren mour. Kōn tiriam̧o, jar ko aō raar uwaak im emakijkij jar ko an ro jet raar uwaak. Aolep raar mour, juon kōjeraam̧m̧an eļap kōn jouj ko rem̧m̧an.
Aaet iaar en̄jake bōd eļap im ajļo̧k kōn kar jorrāān in itaak eo. Ikijon̄ ruj in bon̄ im kajjieon̄ meļo̧kļo̧k men eo eaar waļo̧k. Iaar en̄taan iumwin elōn̄ iiō ko n̄an joļo̧k make bōd im n̄an kappukot aeņōm̧m̧an. Innām, āinwōt juon ritōl an priesthood, ke ij jipan̄ ro jet n̄an ukweļo̧k im jipan̄ er en̄jake tūriam̧okake, jouj, im iakwe eo an Rilo̧mo̧o̧r, Iaar kile bwe Emaron̄ kōmour eō.
Kōmour eo an Rilo̧mo̧o̧r im kajoor in pinmuur eo ej jerbal n̄an likjab ko jar jab kōtmeni, kāālet ko rebōd, idajon̄jon̄ ko, apan̄ ko an aolep kain—barāinwōt jerawiwi ko ad. Ke iaar oktakļo̧k n̄an E, en̄jake in likjab ko aō im jorrāān ko raar jino jakoļo̧k jidik ļo̧k jidik kōn aenōm̧m̧an im kakkije.
Būreejtōn Russell M. Nelson ekar kwaļo̧k: “Ke Rilo̧mo̧o̧r ekar mej kin aolep armej, Ekar kōppeļļo̧k juon iaļ bwe ro otemjej rej ļoor E Emaron̄ mour kōn E, kōkajoorļo̧k, im kajoor in pinmuur eo. Jeraam̧m̧an kein rej pād n̄an aolep ro rej kappukot n̄an ron̄jake E im ļoor E.”14
Ro jeiū im jatū, men̄e kwoj ineek eddodo ko kōn jerawiwi, en̄taan wōt kōn juon bōd ņae eok etto, ak apan̄ n̄an jeorlo̧k am̧ make bōd kōn likjab eo, kwoj maron̄ bōk kōmour kōn pinmuur eo ekajoor an Rilo̧mo̧o̧r Jisōs Kraist.
Ij kam̧ool bwe E emour. E ej ad Rilo̧mo̧o̧r im Ripinmuur. E ej iakwe kōj. E ej tūriam̧okake kōj, im E ej obrak kōn tūriam̧o, im E emaron̄ kōmour eok. Ilo etan Jisōs Kraist, amen.