Lub Tuam Rooj Sab Laj
Ib tug Yaj Saub uas Muaj Sia Nyob rau Hnub Nyoog Kawg
Plaub Hlis Ntuj xyoo 2023 lub Tuam Rooj Sab Laj

Ib tug Yaj Saub uas Muaj Sia Nyob rau Hnub Nyoog Kawg

Los ntawm Txwj Laug Allen D. Haynie

Ntawm Pawg Xya Caum

Leej Txiv Saum Ntuj Ceeb Tsheej tau xaiv tus txheej txheem muab kev tshwm sim rau Nws cov me nyuam dhau los ntawm ib tug yaj saub.

Thaum kuv yog ib tug me nyuam tub, kuv nyiam Hnub Saturday vim txhua yam kuv ua hnub ntawd zoo li lom zem heev. Tiam sis txawm kuv ua dab tsi los, qhov xub thawj kuv ua qhov tseem ceeb tshaj plaws yog—saib tas lauv hauv TV. Muaj ib hnub Saturday sawv ntxov, thaum kuv sawv ntawm TV thiab nrhiav seb yuav saib tshooj twg, kuv tau pom tias tsis yog tas lauv tiam sis tshooj ntawd yog kev tshaj tawm lub Tuam Rooj Sab Laj ntawm lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Thaum kuv ntsia hauv lub TV thiab yws yws tias tsis muaj tas lauv, kuv ntsia pom ib tug txiv neej uas muaj plaub hau dawb hnav ris tsho xuv thiab zaum hauv ib lub rooj zaum zoo.

Zoo nkaus muaj ib yam txawv ntawm nws, ces kuv nug kuv tus tij laug, “Tus ntawd yog leej twg?”

Nws hais, “Tus ntawd yog Thawj Tswj Hwm David O. McKay; nws yog tus yaj saub.”

Kuv nco qab tias kuv hnov ib yam dab tsi thiab paub tias nws yog ib tug yaj saub. Ces tom qab ntawd, vim kuv yog ib tug me nyuam tub uas nyiam tas lauv heev, kuv tau xaiv lwm tshooj. Tiam sis kuv yeej nco ntsoov tej yam uas kuv tau hnov thaum lub sij hawm uas tau txais kev tshwm sim me me ntawd Tej lub sij hawm, tsuas siv ib nyuag pliag xwb kom paub tias yog ib tug yaj saub.1

Kev paub los ntawm kev tshwm sim tias muaj ib tug yaj saub uas muaj sia nyob hauv lub ntiaj teb hloov tau txhua yam.2 Ua rau peb tsis xav sib cav hais tias thaum twg ib tug yaj saub hais lus ua tus yaj saub los sis thaum twg ib tug muaj cai tsis ua li tus yaj saub tej lus ntuas.3 Tej kev paub li no ua rau peb los ntseeg cov yaj saub uas muaj sia nyob tej lus qhuab qhia, txawm peb tsis tshua to taub los xij.4 Vim hais tias, Leej Txiv Saum Ntuj Ceeb Tsheej tau xaiv qhia qhov tseeb rau nws cov me nyuam los ntawm ib tus yaj saub, ib twg uas tsis tau xav ua txoj hauj lwm dawb huv ntawd thiab ib twg uas paub hais tias nws tsis yog ib tug zoo tag nrho.5 Ib tug yaj saub yog ib tug neeg uas Vajtswv tau npaj, hu, qhuab ntuas, tshoov siab, cheem, ua dawb huv, thiab tau pom zoo.6 Vim li no peb yuav tsis mus yuam kev hauv sab ntsuj plig yog peb mloog cov yaj saub tej lus ntuas.

Txawm peb xav li cas los, peb sawv daws tau raug xaiv thaum nyob hauv lub neej ua ntej peb yug los kom los yug rau lub caij nyoog kawg no. Muaj ob yam tseeb tiag uas yuav muaj nyob rau hauv hnub nyoog kawg. Yam tseeb tiag thib ib yog yuav rov qab txhim tsa Khetos lub Koom Txoos rau hauv ntiaj teb. Yam tseeb tiag thib ob yog txhua yam yuav pib nyuaj heev. Cov vaj lug kub tau hais tias hauv hnub nyoog kawg yuav muaj “ib kob lawg loj uas raug xa los ntaus tej qoob loo hauv lub ntiaj teb puas tsuaj,”7 phaum mob,8 “kev ua tsov rog thiab hnov lus paj lus cua txog kev ua tsov rog, thiab lub ntiaj teb yuav ntxhov hnyo, … thiab kev ua phem yuav muaj ntau ntau.”9

Thaum kuv yog ib tug me nyuam yaus, tej lus qhia txog tej uas yuav muaj los yav tom ntej hauv hnub nyoog kawg ua rau kuv ntshai thiab ua rau kuv thov Vajtswv kom kuv yuav tsis nyob pom Kev Los Zaum Ob—thiab zoo nkaus yuav zoo li kuv thov ntawd. Tiam sis tam sim no, kuv tsis thov Vajtswv li ntawd lawm, txawm tej lus qhia txog tej uas yuav muaj los yav tom ntej tseem yuav nyuaj10 vim tias thaum Khetos rov qab los tswj kav, tag nrho tej yam uas Nws tau tsim yuav “nyob kaj siab lug thiab muaj kev thaj yeeb.”11

Muaj ib txhia tau pib txhawj vim yog tej xwm txheej tsis zoo hauv lub ntiaj teb niaj hnub no. Vim peb yog Vajtswv cov me nyuam khi lus, peb tsis tas tshawb nrhiav qhov no los qhov tod kom paub seb peb yuav ua li cas thaum lub caij nyoog nyuaj no. Peb tsis tas ntshai.12 Cov lus qhuab qhia thiab cov ntsiab cai uas peb yuav tsum raws kom peb sab ntsuj plig tiv taus thiab nyiaj mus dhau ntawm sab cev nqaij daim tawv yeej nyob hauv tus yaj saub uas muaj sia nyob cov lus.13 Vim li ntawd Thawj Tswj Hwm M. Russell Ballard tshaj tawm tias “yeej tsis yog ib yam me me … uas peb muaj Vajtswv tus yaj saub nyob nrog nraim peb.”14

Thawj Tswj Hwm Russell M. Nelson tau ua tim khawv tias “Vajtswv txoj kev qhia Nws cov me nyuam los ntawm cov yaj saub tau qhia peb hais tias Nws yuav foom koob hmoov rau txhua tus yaj saub thiab Nws yuav foom koob hmoov rau cov uas mloog cov yaj saub tej lus ntuas.”15 Ces qhov tseem ceeb yog coj raws li tus yaj saub uas muaj sia nyob hais.16 Cov kwv tij thiab cov muam, tus yaj saub tej lus qhia tsis ua zoo li ib feem ntawm cov phau ntawv thiab cov tsheb uas haj yam muaj nqis thaum lawv qub heev. Vim li ntawd, peb yuav tsum tsis txhob siv cov lus ntawm cov yaj saub puag thaum ub coj los xyeej cov yaj saub uas muaj sia nyob cov lus.17

Kuv nyiam Yexus tej zaj lus piv txwv uas qhia txog txoj moo zoo cov ntsiab cai. Kuv xav qhia ib zaj lus piv txwv hauv kuv lub neej rau nej tag kis no.

Muaj ib hnub kuv mus noj su hauv lub Koom Txoos lub tsev hauv paus qhov chaw noj mov. Tom qab kuv tau kuv cov zaub mov, kuv mus hauv qhov chaw noj mov thiab pom tias tag nrho peb tug mej zeej ntawm Thawj Pawg Thawj Tswj Hwm zaum ua ke ntawm ib lub rooj, nrog ib lub rooj zaum uas tsis muaj leej twg zaum ntawd. Kuv tej kev txhawj xeeb ua rau kuv tsis taug kev mus ze lawv lub rooj, tiam sis kuv hnov peb tus yaj saub, Thawj Tswj Hwm Russell M. Nelson, hais rau kuv, “Allen, muaj ib lub rooj zaum puab peb uas tsis muaj neeg zaum. Los thiab zaum nrog peb.” Ces kuv txawm ua li ntawd.

Thaum yuav noj su tas, kuv tau hnov dab tsi nplij nplej, thiab kuv ntsia saib pom tias Thawj Tswj Hwm Nelson tau muab nws lub poom dej yas sawv tshuj thiab muab pluas kom me ces mam rov muab lub hau tso rau.

Ces Thawj Tswj Hwm Dallin H. Oaks nug nws ib yam li kuv xav nug nws tias, “Thawj Tswj Hwj Nelson, vim li cas koj muab koj lub poom dej yas ua pluas?”

Nws teb tias, “Yuav tsis nyuaj rau cov neeg uas saib xyuas tej yam khib nyiab uas ua dua tshiab recycle ntawd vim yuav tsis puv lub thoob khib nyiab recycle.”

Tom qab kuv xav txog nws tej lus hais, kuv rov qab hnov dab tsi nplij nplej dua. Kuv saib rau ntawm kuv sab xiv thiab pom Thawj Tswj Hwm Oaks tau muab nws lub poom dej yas pluas ib yam li Thawj Tswj Hwm Nelson. Ces kuv hnov dab tsi ntawm kuv sab lauj, thiab pom Thawj Tswj Hwm Henry B. Eyring pluas nws lub poom dej yas thiab tiam sis, nws muab pluas txawv me ntsis vim nws tsis muab sawv tshuj ua ntej nws mam pluas, ces nyuaj rau nws me ntsis. Thawm Tswj Hwm Nelson pom li no thiab pab nws muab lub poom dej yas sawv tshuj ua ntej mam li yooj yim muab pluas.

Thaum lub sij hawm ntawd, kuv ntxhi lus rau Thawj Tswj Hwm Oaks thiab nug tias, “Txoj kev muab koj lub poom dej yas pluas yog ib qhov kev cai es yuav tsum ua hauv chaw noj mov los?”

Thawj Tswj Hwm Oaks luag ntxi, thiab hais, “Es, Allen, koj yuav tsum coj raws li tus yaj saub.”

Kuv paub tseeb tias Thawj Tswj Hwm Nelson tsis hais txog ib txoj lus qhuab qhia tshiab kom muab khib nyiab recycle pov tseg hauv chaw noj mov. Tiam sis peb kawm tau los ntawm18 Thawj Tswj Hwm Oaks thiab Thawj Tswj Hwm Eyring tej kev coj raws li Thawj Tswj Hwm Nelson tus yam ntxwv thiab thaum Thawj Tswj Hwm Nelson’s pab qhia ib txoj kev zoo dua.19

Ntau xyoo tas los, Txwj Laug Neal A. Maxwell tau qhia tej lus ntuas uas qhia tias nws twb pom peb lub caij nyoog niaj hnub no.

“Tej hlis thiab xyoo tom ntej no, yuav muaj tej xwm txheej uas tej tus mej zeej yuav tsum txiav txim siab seb lawv yuav raws Thawj Pawg Thawj Tswj Hwm los tsis raws. Cov mej zeej yuav pom tias yuav nyuaj rau lawv nres thiab xaiv yuav ua yam ib los ob. …

“… Cia peb ceev xwm txheej xwv kom tej yam peb tau xaiv yuav meej, thiab cia lwm cov neeg ua raws li lawv lub siab nyiam txog tus yaj saub tej lus ntuas. …

“Yexus hais tias thaum tsob ntoo txiv ncuav pias pib hlav nplooj tuaj, ‘twb yuav txog lub caij ntuj sov lawm.’ … Peb paub tias lub caij ntuj sov lawm, cia peb tsis txhob yws yws vim kub heev!”20

Tiam neeg uas tab tom loj hlob tuaj tab tom loj hlob thaum lub caij uas muaj nplooj tsob ntoo txiv ncuav pias ntau heev thiab sov dhau. Qhov no ua rau tiam neeg uas twb loj hlob lawm lav ris hnyav heev, thiab qhov tseem ceeb heev hais txog mloog tus yaj saub tej lus ntuas. Thaum niam txiv tsis mloog tus yaj saub uas muaj sia tej lus ntuas, lawv tsis txais tej koob hmoov uas tau cog thiab qhov uas tu siab kawg nkaus yog lawv qhia lawv cov me nyuam hais tias tej yam tus yaj suab tau hais tsis muaj nqis los sis qhia tias peb xaiv tau tus yaj saub tej lus ntuas twg peb xav yuav zoo ib yam li thaum peb xaiv mov tom taj laj tsis xav txog mov yuav pab peb tus ntsuj plig noj qab noj zoo.

Txwj Lauj Richard L. Evans tau hais tias: “Ib feem niam thiab txiv xav yuam kev hais tias lawv so me ntsis thiab tsis yuav ncaj thiab mloog lus … lawv tsis tas ua tej hauv paus ntawm txoj hmoov zoo thiab qhov no yuav tsis ua li cas rau lawv tsev neeg thiab lawv tsev neeg yav tom ntej. Tiam sis, yog niam los txiv ua yuam kev me ntsis, ntau zaus, cov me nyuam yuav ua yuam kev ntau dua cov niam txiv.”21

Vim peb yog tiam neeg uas yuav tsum npaj tiam neeg uas tab tom loj hlob ua lawv tej hauj lwm hauv hnub nyoog kawg, 22 tej hauj lwm uas yuav tsum ua thaum lub sij hawm uas tus yeeb ncuab lub hwj huam muaj zog ntxias heev,23 peb yuav tsum tsis txhob ua xyem xyav thaum peb ua raws li cov yaj saub tej lus. Tej lus ntawd yuav pab tiam neeg uas tab tom loj hlob pom “tus yeeb ncuab thaum tus yeeb ncuab tseem nyob deb heev; ces [nej thiaj li] muaj sij hawm npaj tau” kom tiv taus tus yeeb ncuab tej kev tawm tsam.24 Peb tej kev txhaum me, tsis mloog lus, los kev yws ntxhi thaum peb hnov tus yaj saub tej lus ntuas tej zaum yuav coj peb mus zeb ntug ntawm txoj kev khi lus; tiam sis thaum tus yeeb ncuab ua rau tej yam no loj heev hauv lub neej ntawm tiam neeg uas loj hlob, tej yam no tej zaum ua rau lawv tawm txoj kev khi lus tag nrho. Qhov no yeej yog nqi loj dhau rau tiam neeg uas loj hlob.25

Tej zaum nej ib txhia xav tias nej tau ua yuam kev lawm thaum nej coj raws li Thawj Tswj Hwm Russell M. Nelson tej lus ntuas. Yog li ntawd, cia li hloov siab lees txim, thiab rov qab pib ua raws Vajtswv tus yaj saub tej lus ntuas. Cia li muab tej me nyuam cov tas lauv tso tseg thiab cia siab rau tus uas tus Tswv tsa los. Cia li zoo siab vim tias “nyob hauv teb chaws Ixayees no muaj ib tug [yaj saub]” ib zaug ntxiv.26

Txawm koj tsis paub tiag tiag los, kuv ua ua tim khawv tias peb yeej muaj peev xwm tiv taus lub hnub nyoog kawg txoj kev kub ntxhov thiab yeej yuav ua lub neej zoo. Peb yog Haiv Neeg Ntseeg hauv hnub nyoog kawg, thiab yeej yog ib lub caij nyoog zoo kawg. Peb yeej xav xav tuaj rau lub ntiaj teb no thaum lub sij hawm no, peb yeej siab loj xav hais tias peb tsis poob thaum tus yeeb ncuab haj yam ua rau lub neej tsaus ntuj thiab tsis meej27 tiam sis peb xav hais tias peb yuav mloog rau tus uas muaj cai hais rau peb thiab lub ntiaj teb tag nrho, “Tus Tswv Vajtswv hais li no.”28 Los ntawm tus yaj saub lub npe uas Vajtswv tau tsa, tus Dawb Huv ntawm Ixayees,29 tus uas yog Yexus Khetos, amees.

Lus Cim

  1. Tsis ntev tas los Thawj Tswj Hwm Russell M. Nelson tau caw cov tub ntxhais kawm ntawv nyob hauv Brigham Young University kom sim txais kev tshwm sim rau tus kheej ua ke: “Thov koj Leej Txiv Saum Ntuj Ceeb Tsheej seb peb puas yog Vajtswv cov thwj tim thiab cov yaj saub. Thov seb peb puas tau txais kev tshwm sim rau tej yam no thiab lwm yam” (“The Love and Laws of God” [Brigham Young University kev sib ntsib hawm Vajtswv, Cuaj Hlis Ntuj 17, 2019], speeches.byu.edu). Kuj saib Neil L. Andersen, “Vajtswv tus Yaj Saub,” Liahona, Tsib Hlis Ntuj 2018, 26: “Peb uas yog Haiv Neeg Ntseeg hauv Hnub Nyoog Kawg muaj cib fim txais tau kev pom zoo hais tias Vajtswv yog tus uas tau hu Thawj Tswj Hwm Nelson.” Zaj dab neeg txog Amas txoj kev hloov siab los ntseeg vim nws tau mloog tus yaj saub Anpinadais qhia peb tias peb sawv daws muaj peev xwm tau kev tshwm sim txog ib tug yaj saub (saib Mauxiyas 13:5; 17:2).

  2. “Peb muaj ib tug yaj saub los si tsis muaj ib tug li; thiab thaum muaj ib tug yaj saub, peb muaj txhua yam” (Gordon B. Hinckley, “We Thank Thee, O God, for a Prophet,” Ensign, Ib Hlis Ntuj. 1974, 122).

  3. “Lawv pib tsis ntseeg lub txiaj ntsim qhia tau tej yuav muaj los yav tom ntej thiab lub txiaj ntsim txais tau kev tshwm sim; thiab Vajtswv tej kev txiav txim ntsia lawv lub ntsej muag nruj nrees” (Hilamas 4:23; kuj saib Lus Qhuab Qhia thiab Kev Khi Lus 11:25). “Peb pheej hu txhua zaus, ‘Ua Vajtswv Tsaug Vim Peb Muaj Ib tug Yaj Saub uas coj peb kev hauv hnub nyoog kawg.’ Yeej muaj ntau tus uas tej zaum yuav tsum sau lus ntxiv thiab hais: ‘Tsuas yog nws coj peb raws li peb lub siab nyiam thiab lub siab xav xwb’” (Teachings of Presidents of the Church: Heber J. Grant [2002], 80).

  4. “Tej lub sij hawm peb yuav txais lus ntuas uas peb tsis to taub los sis zoo nkaus tsis yog rau peb, txawm peb tau thov Vajtswv thiab xav txog cov lus ntuas. Tsis txhob muab cov lus ntuas ntawd pov tseg, tiam sis cia nyob ze nej. Yog ib tug tib neeg uas koj tso siab rau muab dab tsis rau koj tuav es zoo nkaus li yog xuab ze xwb tiam sis hais rau koj tias yog kub no, tej zaum koj yuav txawj ntse thiab cia nyob hauv koj ob txhais teb, tej zaum co me ntsis. Txhua lub sij hawm uas kuv tau ua li ntawd thiab mloog cov yaj saub tej lus ntuas, tom qab kuv tau pom cov kub pib tawm tuaj thiab kuv tau zoo siab ua tsaug” (Henry B. Eyring, “Finding Safety in Counsel,” Ensign, Tsib Hlis Ntuj 1997, 26; kuj saib 3 Nifais 1:13; Lus Qhuab Qhia thiab Kev Khi Lus 1:14).

  5. Saib 2 Nifais 4:17–18. “Tsis txhob yws kuv vim yog kuv tsis zoo tag nrho, thiab tsis txhob yws kuv txiv, vim yog nws tsis zoo tag nrho, … tiam sis cia li ua tsaug rau Vajtswv uas nws tau qhia rau nej paub tias peb tsis zoo tag nrho, xwv kom nej yuav kawm tau muaj tswv yim dua peb” (Maumoos 9:31).

  6. Saib Lus Qhuab Qhia thiab Kev Khi Lus 3:6–8; kuj saib Lus Qhuab Qhia thiab Kev Khi Lus 93:47.

  7. Lus Qhuab Qhia thiab Kev Khi Lus 29:16.

  8. Saib Lus Qhuab Qhia thiab Kev Khi Lus 84:97; kuj saib Lus Qhuab Qhia thiab Kev Khi Lus 87:6.

  9. Lus Qhuab Qhia thiab Kev Khi Lus 45:26, 27.

  10. Saib Lus Qhuab Qhia thiab Kev Khi Lus 1:38.

  11. Hauxeyas 2:18. “Vim kuv yuav ua kuv tus kheej tshwm sim saum ntuj ceeb tsheej los nrog lub hwj chim thiab yeeb koob loj, nrog tag nrho ib tsoom tib neeg qaum ntuj, thiab los nyob nrog kev ncaj ncees nrog tib neeg rau hauv ntiaj teb ib txhiab xyoo, thiab cov phem yuav tiv tsis taus” (Lus Qhuab Qhia thiab Kev Khi Lus 29:11).

  12. Saib 1 Nifais 22:16–17; kuj saib Lus Qhuab Qhia thiab Kev Khi Lus 59:23.

  13. “Vim saib seb, lawv tau xyeej cov yaj saub tej lus. Yog li ntawd, yog hais tias kuv txiv tseem nyob hauv thaj av tom qab tus Tswv tau txib kom nws khiav tawm ntawm thaj av mus, saib seb, nws yuav piam sij tib yam” (1 Nifais 3:18; kuj saib 2 Nifais 26:3; Lus Qhuab Qhia thiab Kev Khi Lus 90:5).

  14. M. Russell Ballard, “His Word Ye Shall Receive,” Liahona, Xya Hli Ntuj 2001, 65.

  15. Russell M. Nelson, “Ask, Seek, Knock,” Liahona, Kaum Ib Hlis Ntuj 2009, 82. “Tsis muaj leej twg yuav zoo siab tshaj tus uas ua raws li tus yaj saub tej lus ntuas” (The Teachings of Lorenzo Snow, ed. Clyde J. Williams [1996], 86).

  16. “Muab koj qhov muag ntsia cov uas tswj hwm lub Koom Txoos hnub no, los sis tag kis, thiab ua koj lub neej kom zoo li lawv es tsis txhob xav seb cov yaj saub puag thaum ub yuav zoo li cas los sis xav li cas los sis haiv lus li cas” (The Teachings of Harold B. Lee, [1996], 525).

  17. Thawj Tswj Hwm Spencer W. Kimball tau hais ib zaug tias “cov uas mloog cov yaj saub uas tau xiam lawm, zoo li lawv muab pob zeb txawb cov yaj saub uas tseem muaj sia nyob” (The Teachings of Spencer W. Kimball, ed. Edward L. Kimball [1982], 462). “Tej lus tseem ceeb uas peb yuav mloog, xav txog, thiab ua yog tej lus uas tau tshwm sim rau peb dhau los ntawm tus yaj saub” (Ronald A. Rasband, “Tej Yam ntawm Kuv tus Ntsuj Plig,” Liahona, Kaum Ib Hlis Ntuj 2021, 40).

  18. “Thaum peb hnov Vajtswv cov lus ntuas uas los ntawm tus Thawj Tswj Hwm ntawm lub Koom Txoos, peb yuav tsum zoo siab ua thiab ua sai” (M. Russell Ballard, “His Word Ye Shall Receive,” Liahona, Xya Hli Ntuj 2001, 65).

  19. “Yexus Khetos lub Koom Txoos yeej los tau muaj cov yaj saub thiab cov thwj tim coj kav nws. Txawm hais tias cov thawj coj no yeej yuam kev qee zaum, los tus Tswv cov tub qhe txais tau kev tshoov siab kom pab peb zam tej kev cov nyom uas yuav ua tau rau peb sab ntsuj plig puas tsuaj mus thiab kom pab peb mus kom dhau lub neej no raws li qhov nyab xeeb kom mus txog peb lub neej nyob saum ntuj ceeb tsheej thaum kawg” (M. Russell Ballard, “God Is at the Helm,” Liahona, Kaum Ib Hlis Ntuj 2015, 24).

  20. Neal A. Maxwell, “A More Determined Discipleship,” Ensign, Ob Hlis Ntuj 1979, 69, 70.

  21. Richard L. Evans, “Foundations of a Happy Home,” nyob hauv Conference Report, Kaum Hli Ntuj 1964, 135–36.

  22. Saib Lus Qhuab Qhia thiab Kev Khi Lus 123:11; kuj saib Robert D. Hales, “Our Duty to God: The Mission of Parents and Leaders to the Rising Generation,” Liahona, Tsib Hlis Ntuj 2010, 95–98.

  23. Saib Lus Qhuab Qhia thiab Kev Khi Lus 52:14.

  24. Lus Qhuab Qhia thiab Kev Khi Lus 101:54.

  25. Saib Mauxiyas 26:1–4.

  26. 2 Vaj Ntxwv 5:8.

  27. “Nej yuav tsum mloog tag nrho Joseph Smith tej lus thiab tej lus txib uas nws yuav muab rau nej thaum nws txais tau tej ntawd, … vim los ntawm kev ua tej yam no ces … tus Tswv tus uas yog Vajtswv yuav ua kom tej hwj chim ntawm txoj kev tsaus ntuj yaj ploj ntawm nej mus, thiab ua kom lub ntuj co nto kom zoo rau nej, thiab nws lub npe lub yeeb koob” (Lus Qhuab Qhia thiab Kev Khi Lus 21:4, 6). “Tus uas ua raws li tej lus qhia los sis txais tej lus ntuas los ntawm tus uas sawv cev rau tus Tswv los tus ntawd yeej tsis tau ua yuam kev ib zaug li” (Doctrines of Salvation: Sermons and Writings of Joseph Fielding Smith, tus kho ntawv yog Bruce R. McConkie [1998], 243).

  28. Exekhees 3:27. “Vim nej yuav tau txais nws txoj lus, zoo ib yam li los kiag ntawm kuv lub qhov ncauj los, nrog tag nrho txoj kev ua siab ntev thiab kev ntseeg” (Lus Qhuab Qhia thiab Kev Khi Lus 21:5).

  29. Saib 1 Nifais 22:20–21; kuj saib 3 Nifais 20:23.