Xjayalinkil qib’ rik’in li santil ochoch

Xb’aan li Awa’b’ej Russell M. Nelson

Awaʼbʼej re Lix Iglees li Jesukristo rehebʼ laj Santil Paabʼanel saʼ Rosoʼjikebʼ li Kutan

Xk’eeb’al xkomon chik lee hoonal sa’ li santil ochoch tixk’e xkomon chik lee rosob’tesinkil jo’ ink’a’ naru nekek’ul b’araq chik.

Ex raarookil was wiitz’in, chiruheb’ li oob’ ch’utam a’in re li jolomil ch’utub’aj-ib’, naqak’e wi’chik reetal naq teeto li choxa! Nawoyb’eni naq xetz’iib’a li na’leb’ xek’ul ut naq teek’anjela. Li qaChoxahil Yuwa’ ut li Jesukristo, lix Raarookil Alal, yo’on wankeb’ re eetenq’ankil. Nintz’aama cheru naq teeyal eeq’e chixsik’b’al li tenq’ neke’xk’e.

Toje’, li Hermana Nelson ut laa’in xooru chirilb’al li xkaa ch’uut chi video chirix lix Hu laj Mormon.¹ Xoohe’xmusiq’a! Ma naru tink’ut cheru xcha’al li video b’ar wi’ naxk’ut rib’ li Kolonel chiruheb’ laj Nefita?

Naqak’e reetal naq li Kolonel kixsik’ ru xk’utb’esinkil rib’ chiru li santil ochoch. A’an li rochoch a’an. Nujenaq rik’in lix wankil. Misach sa’ qach’ool li yoo chixb’aanunkil li Qaawa’ choq’ qe anajwan. A’an yoo chixk’ihob’resinkileb’ li santil ochoch. Yoo chixseeb’ankil rib’ a’ yaal li qaseeb’ankil qib’ chixkab’lankileb’ li santil ochoch. Yoo chiqatenq’ankil chixch’utub’ankil Israel. Yoo ajwi’ chiqatenq’ankil re toochaab’ilo’q sa’ musiq’ej. Xk’eeb’al xkomon chik lee hoonal sa’ li santil ochoch tixk’e xkomon chik lee rosob’tesinkil jo’ ink’a’ naru nekek’ul b’araq chik.

Wankeb’ anajwan 168 chi santil ochoch li yookeb’ chi k’anjelak, 53 li yookeb’ chi yiib’aak, ut 54 chik li yookeb’ chi kawresiik re te’yiib’aaq.² Nawaj xyeeb’al resil naq te’kab’lamanq li santil ochoch sa’eb’ li na’ajej a’in: Busán, Corea; Naga, Filipinas; Santiago, Filipinas; Eket, Nigeria; Chiclayo, Perú; Centro de la Ciudad de Buenos Aires, Argentina; Londrina, Brasil; Ribeirão Prêto, Brasil; Huehuetenango, Guatemala; Jacksonville, Florida; Grand Rapids, Míchigan; Prosperar, Texas; Montaña Solitaria, Nevada; ut Tacoma, Washington.

Naqaj ajwi’ xyiib’ankil xkomoneb’ chik li santil ochoch sa’ junjunqeb’ li tenamit jwal ninqeb’ b’ar wi’ mas hoonal naraj li wulak sa’ li santil ochoch ak wan aran. Jo’kan ut, chi sa inch’ool ninye resil kaahib’ chi na’ajej sa’ xsutam Ciudad de Mexico b’ar wi’ te’yiib’amanq li ak’ santil ochoch sa’ Cuernavaca, Pachuca, Toluca, ut Tula.

Ex raarookil was wiitz’in, chejayali eerib’ rik’in li santil ochoch jo’ maajun wa eeb’aanuhom. Nekexwosob’tesi re texnach’oq rik’in li Dios ut li Jesukristo wulaj wulaj. Nekexinra. Chiwanq taxaq li Dios eerik’in toj reetal naq taqach’utub’ wi’chik qib’, sa’ lix loq’laj k’ab’a’ li Jesukristo, amen.