Buntoga ang Kalibotan ug Pangita og Kapahulayan
Pangita og kapahulayan gikan sa gikusgon, walay kasegurohan, ug kasakit niini nga kalibotan pinaagi sa pagbuntog sa kalibotan pinaagi sa inyong mga pakigsaad uban sa Dios.
Akong minahal nga mga kaigsoonan, mapasalamaton ko sa pagtimbaya kaninyo niining mahimayaong buntag sa Igpapahulay. Kamo ania kanunay sa akong hunahuna. Ako nahingangha sa inyong dali nga paglihok kon kamo makakita sa uban nga nanginahanglan. Ako nahingangha sa hugot nga pagtuo ug pagpamatuod nga inyong gibalik-balik sa pagpakita. Ako naghilak sa inyong mga kasakit, mga kahigawad ug mga kabalaka. Ako nahigugma kaninyo. Ako mopaneguro kaninyo nga ang atong Langitnong Amahan ug ang Iyang Anak nga si Jesukristo, nahigugma kaninyo. Sila personal gayod nga nakahibalo sa inyong mga sirkumstansiya, sa inyong kaayo, sa inyong mga panginahanglan, ug sa inyong mga pag-ampo alang sa panabang. Sa makadaghang higayon, ako nag-ampo alang kaninyo nga mobati sa Ilang paghigugma alang kaninyo.
Ang pagsinati sa Ilang gugma importante, samtang kita kada adlaw makadungog og makapadisturbo nga mga balita. Kamo tingali adunay mga adlaw nga kamo nanghinaot nga makasul-ob sa inyong mga pajama, makatikuko, ug mohangyo og usa ka tawo nga mopukaw ninyo kon kining tanan nga kasamok mahuman na.
Apan, akong minahal nga mga kaigsoonan, daghan kaayong talagsaong mga butang anaa sa unahan. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Tali karon ug sa adlaw sa Iyang pagbalik “uban sa gahom ug dakong himaya,”1 Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon.
Bisan pa, kita karon nagpuyo sa unsay segurado nga mao ang labing komplikado nga panahon sa kasaysayan sa kalibotan. Ang mga kakomplikado ug mga hagit nakapahimo sa daghang mga tawo nga mobati nga nabug-atan ug gikapoy. Hinoon, hunahunaa ang bag-o nga kasinatian nga makahatag og kahayag kon unsaon ninyo ug nako nga makakita og kapahulayan.
Atol sa bag-ong open house sa Washington D.C. Temple, usa ka sakop sa komitiba sa open house nakasaksi og makadugang sa panabot nga panagsultihanay samtang siya mieskort sa pipila ka inila nga mga peryodista diha sa templo. Sa wala damha usa ka gamay nga pamilya ang nakakuyog niini nga grupo sa media. Usa ka reporter nagsige og pangutana mahitungod sa “pagsulod” sa usa ka patron sa templo samtang siya mobalhin gikan sa usa ka kwarto ngadto sa lain. Siya gusto nga masayod kon ang pagsulod sa templo usa ba ka simbolo sa mga hagit sa usa ka tawo nga nagpakabuhi.
Ang usa ka gamay nga batang lalaki diha sa pamilya nakadungog sa panagsultihanay. Sa dihang ang tour group misulod sa kwarto sa pagtuga, ang gamay nga bata mitudlo sa altar, diin ang mga tawo moluhod aron mohimo og mga pakigsaad uban sa Dios, ug miingon, “O, nindot kana. Dinhi mao ang lugar alang sa mga tawo nga makapahulay sa ilang pagsulod sa templo.”
Ako nagduha-duha nga ang batang lalaki nasayod kon unsa ka makahuluganon ang iyang obserbasyon. Siya tingali walay ideya mahitungod sa direkta nga koneksyon tali sa paghimo og pakigsaad uban sa Dios diha sa templo ug sa talagsaon nga saad sa Manluluwas:
“Duol kanako, kamong tanan nga nagbudlay ug nabug-atan ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako, … ug makakaplag kamog pahulay alang sa inyong mga kalag.
“Kay sayon ang akong yugo, ug gaan ang akong palas-anon.”2
Minahal nga mga kaigsoonan, ako naguol niadtong kinsa mobiya sa Simbahan tungod kay sila mibati nga ang pagkamiyembro nagkinahanglan og daghan gikan nila. Sila wala makadiskobre nga ang paghimo ug pagtuman og mga pakigsaad sa tinuod makahimo sa kinabuhi nga sayon! Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. Palihog palandonga kanang talagsaon nga kamatuoran!
Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on nato sa pagpakigbatok sa atong mga pagsulay, mga tintasyon, ug mga kasakit. Kini nga gahom makapasayon sa atong dalan. Kadtong kinsa nagsunod sa mas taas nga mga balaod ni Jesukristo adunay agianan ngadto sa Iyang mas dako nga gahom. Sa ingon, ang tigtuman sa pakigsaad adunay katungod sa espesyal nga matang sa kapahulayan nga moabot ngadto nila sa ilang tibuok relasyon sa pakigsaad uban sa Dios.
Sa wala pa ang Manluluwas motugyan sa Iyang Kaugalingon ngadto sa panghingutas sa Getsemani ug Kalbaryo, Siya mipahayag ngadto sa Iyang Apostoles, “Paantuson kamo sa kalibotan apan ayaw kahadlok kay nabuntog ko na ang kalibotan.”3 Ang misunod, Siya naghangyo sa matag usa nato sa pagbuhat sa ingon sa dihang Siya miingon, “Ako buot nga kamo kinahanglan mobuntog sa kalibotan.”4
Minahal nga mga kaigsoonan, ang akong mensahe kaninyo karon mao nga tungod kay si Jesukristo mibuntog niining napukan nga kalibotan ug tungod kay Siya miula alang sa matag usa nato, kamo usab makabuntog niining puno sa sala, nakasentro sa kaugalingon, ug sa kasagaran makakapoy nga kalibotan.
Tungod sa Manluluwas, pinaagi sa Iyang walay kinutoban nga Pag-ula, mitubos sa matag usa nato gikan sa kahuyang, mga sayop, ug sala, ug tungod kay Siya nakasinati sa matag sakit, kabalaka, ug palas-anon nga inyong nasinati sukad,5 nan, samtang kamo tinud-anay nga maghinulsol ug mangayo sa Iyang panabang, kamo makabuntog sa mga hagit sa walay kasegurohan nga kalibotan karon.
Kamo makabuntog sa espirituhanon ug emosyonal nga makakapoy nga mga sala sa kalibotan, lakip sa pagkaarogante, garbo, kasuko, imoralidad, kasilag, kahakog, kasina, ug kahadlok. Bisan pa sa mga makalibog dili ensakto nga mga kamatuoran nga anaa sa atong palibot, kamo makakita og tinuod nga kapahulayan—nagpasabot nga kahupayan ug kalinaw—bisan taliwala sa inyong labing makahasol nga mga problema.
Kining importante nga kamatuoran naghisgot sa tulo ka sukaranan nga mga pangutana:
Una, unsa ang gipasabot sa pagbuntog sa kalibotan?
Ikaduha, unsaon nato sa pagbuhat niini?
Ug ikatulo, sa unsa nga paagi nga ang pagbuntog sa kalibotan mopanalangin sa atong mga kinabuhi?
Unsa ang gipasabot sa pagbuntog sa kalibotan? Kini nagpasabot sa pagbuntog sa tintasyon sa labaw nga pag-atiman sa mga butang niini nga kalibotan kay sa mga butang sa Dios. Kini nagpasabot sa pagsalig sa doktrina ni Kristo labaw kay sa mga pilosopiya sa mga tawo. Kini nagpasabot nga mahimuot diha sa kamatuoran, mosalikway sa panglimbong, ug mahimong “mapainubsanon nga mga sumusunod ni Kristo.”6 Kini nagpasabot sa pagpili sa paglikay gikan sa bisan unsa nga makapabugaw sa Espiritu. Kini nagpasabot nga andam nga “mobiya” bisan sa atong paborito nga mga sala.7
Karon, ang pagbuntog sa kalibotan wala gyod magpasabot nga mahimong hingpit niini nga kinabuhi, ni kini nagpasabot nga ang inyong mga problema mawala lang—tungod kay kini dili mawala. Ug kini wala magpasabot nga kamo dili na makahimo og mga sayop. Apan ang pagbuntog sa kalibotan nagpasabot nga ang inyong pagpakigbatok sa sala modako. Ang inyong kasingkasing malukmay samtang ang inyong hugot nga pagtuo diha ni Jesukristo modako.8 Ang pagbuntog sa kalibotan nagpasabot nga molambo sa paghigugma sa Dios ug sa Iyang Hinigugma nga Anak labaw kay sa inyong paghigugma ni bisan kinsa o bisan unsa.
Unsaon, man, nato sa pagbuntog sa kalibotan? Si Hari Benjamin mitudlo nato unsaon. Siya miingon nga “ang kinaiyanhon nga tawo mao ang usa ka kaaway sa Dios” ug magpabilin sa kahangtoran “gawas kon siya motugyan ngadto sa mga pagdani sa Balaang Espiritu, ug isalikway ang iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo.”9 Matag higayon nga kamo magtinguha ug mosunod sa mga pag-aghat sa Espiritu, matag higayon nga kamo mobuhat og bisan unsa nga maayong—mga butang nga dili buhaton “sa kinaiyanhon nga tawo”—kamo nagbuntog sa kalibotan.
Ang pagbuntog sa kalibotan dili usa ka kalihokan nga mahitabo sa usa ka adlaw o duha. Kini mahitabo sa tibuok kinabuhi samtang kita balik-balik nga modawat sa doktrina ni Kristo. Kita mougmad og hugot nga pagtuo diha ni Jesukristo pinaagi sa paghinulsol kada adlaw ug pagtuman sa mga pakigsad nga motuga nato sa gahom. Kita magpabilin diha sa dalan sa pakigsaad ug mapanalanginan sa espirituhanong kalig-on, personal nga pagpadayag, paglig-on sa hugot nga pagtuo, ug sa pagpangalagad sa mga anghel. Ang pagsunod sa doktrina ni Kristo makahatag sa labing gamhanan, balik-balik nga pagkamahiyason, paghimo og espirituhanong paglambo diha sa atong mga kinabuhi.10
Samtang kita maningkamot sa pagsunod sa mas taas nga mga balaod ni Jesukristo, ang atong mga kasingkasing ug ang atong pagkatawo magsugod sa pagkausab. Ang Manluluwas motabang nato sa pagbuntog sa mga tintasyon niini nga kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.
Karon, kamo tingali naghunahuna nga kini morag mas lisod nga espirituhanon nga trabaho kay sa kapahulayan. Apan ania ang dakong kamatuoran: Samtang ang kalibotan moinsister nga ang gahom, kabtangan, kainila, ug kagana sa unod makahatag og kalipay, kini dili mohatag og kalipay! Kini dili makahatag og kalipay! Kini walay ikahatag gawas sa haw-ang nga puli alang sa “bulahan ug sa malipayon nga kahimtang” niadtong [kinsa] “naghupot sa mga sugo sa Dios.”11
Ang kamatuoran mao nga mas labaw nga makakapoy ang pagpangita og kalipay diin kamo dili gayod makakita niini! Hinoon, kon kamo makigtambayayong ni Kristo ug sa pagbuhat sa espirituhanong buhat nga gikinahanglan sa pagbuntog sa kalibotan, Siya, ug Siya lamang, ang adunay gahom sa pagtabang ninyo sa pagbuntog sa mga tintasyon niini nga kalibotan.
Karon, sa unsa nga paagi nga ang pagbuntog sa kalibotan mopanalangin sa atong mga kinabuhi? Ang tubag klaro: Ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon. Palihog ayaw ako saypa sa pagsabot: Ako wala moingon nga ang paghimo og mga pakigsaad makapahimo sa kinabuhi nga sayon. Gani, paabot og oposisyon, tungod kay ang kaaway dili gusto ninyo nga makadiskobre sa gahom ni Jesukristo. Apan ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.
Ako modason sa makahuloganon nga pagtulon-an ni Presidente Ezra Taft Benson: “Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, … makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu-bu og kalinaw.”12
Kining dili ikatandi nga mga pribilehiyo moabot niadtong kinsa magtinguha og suporta sa langit sa pagtabang kanila sa pagbuntog niini nga kalibotan. Hangtod niining puntoha, ako mopaabot ngadto sa mga miyembro sa tibuok Simbahan sa samang sugo nga akong gihatag sa atong mga young adult sa miaging Mayo. Ako miawhag kanila—ug ako mangamuyo kaninyo karon—sa pag-ako sa responsibilidad sa inyong pagpamatuod ni Jesukristo ug sa Iyang ebanghelyo. Trabahoa kini. Atimana kini. Palamboa kini gamit ang kamatuoran. Ayaw kini hugawi sa sayop nga mga pilosopiya sa dili matuohon nga mga lalaki ug mga babaye. Samtang inyong himoon ang inyong pagpamatuod ni Jesukristo nga inyong kinatas-an nga prayoridad, bantayi ang mga milagro nga mahitabo sa inyong kinabuhi.13
Ang akong pangamuyo kaninyo karong buntaga mao ang pagpangita og kapahulayan gikan sa gikusgon, walay kasegurohan, ug kasakit niini nga kalibotan pinaagi sa pagbuntog sa kalibotan pinaagi sa inyong mga pakigsaad uban sa Dios. Pahibalo Kaniya pinaagi sa inyong mga pag-ampo ug sa inyong mga lihok nga kamo seryoso mahitungod sa pagbuntog sa kalibotan. Panghangyo Kaniya sa paglamdag sa inyong hunahuna ug mopadala sa tabang nga inyong gikinahanglan. Matag adlaw, isulat ang mga hunahuna nga moabot kaninyo samtang kamo nag-ampo; dayon pagkugi sa pagsunod niini. Paggahin og daghang panahon sa templo ug pagtinguha nga makasabot sa unsa nga paagi ang templo nagtudlo kaninyo sa pagbuntog sa mga hagit sa walay kasegurohan nga kalibotan.14
Sama sa akong gipahayag kaniadto, ang pagpundok sa Israel mao ang labing importante nga buhat nga nahitabo karon sa yuta. Usa sa importante nga elemento niini nga pagpundok mao ang pag-andam og katawhan kinsa makahimo, andam, ug takos sa pagdawat sa Ginoo kon siya moabot pag-usab; usa ka katawhan kinsa mipili na ni Jesukristo kay sa niining napukan nga kalibotan; usa ka katawhan kinsa nagmaya sa ilang kabubut-on sa pagsunod sa mas taas, mas balaan nga mga balaod ni Jesukristo.
Ako naghangyo kaninyo, akong minahal nga mga kaigsoonan, nga mahimong matarong nga katawhan. Bahandia ug tahora ang inyong mga pakigsaad labaw sa tanan nga ubang mga pasalig. Samtang inyong ipatigbabaw ang Dios sa inyong kinabuhi, ako mosaad kaninyo og mas dako nga kalinaw, pagsalig, hingpit nga kalipay, ug oo, kapahulayan.
Uban sa gahom sa balaan nga pagkaapostol nga gitugyan kanako, ako mopanalangin kaninyo sa inyong panimpalad sa pagbuntog niini nga kalibotan. Ako mopanalangin kaninyo nga madugangan ang inyong hugot nga pagtuo diha ni Jesukristo ug makat-on og mas maayo unsaon sa pagdapit sa Iyang gahom. Ako mopanalangin kaninyo nga makahimo sa pag-ila sa kamatuoran gikan sa sayop. Ako mopanalangin kaninyo nga mas moatiman sa mga butang sa Dios kay sa mga butang sa kalibotan. Ako mopanalangin kaninyo nga makakita sa mga panginahanglan niadtong anaa sa palibot ug molig-on niadtong inyong gihigugma. Tungod kay si Jesukristo mibuntog niini nga kalibotan, kamo usab makabuntog. Ako sa ingon mopamatuod pinaagi sa sagradong ngalan ni Jesukristo, amen.