Mwichenapen Mwichefen
Arap Ngeni ewe Chon Amanau
October 2022 mwichenap


Arap Ngeni ewe Chon Amanau

Ach kutta ren unusen netipach ach sipwe sinei me tongei ewe Chon Amanau, sia eimukicheno seni ewe fonufan ren pwon mi pin ngeni Kot, ren ach sokkono, ese kon pwapwa, me auchea nupwen sia asamonu I me An afanafan, nge esap ach sipwe eimukicheno seni ekkoch non ewe fonufan mi sokkono ar nuku.

Pwi me fefinei mi achengicheng, ei kunionun ua kapas ngeni ekkewe mi tekison me nukuchar chon tapweno mwirin Jises Kraist. Ren ai kuna ewe murino non manauemi me ami nuku non ewe Samon Jises Kraist ikei non ei fonu me non fonu meinisin non ewe fonufan, a napeno ai tongei kemi.

Arap ngeni nesoponon An angang, noun Jises kewe chon kuno ra eisini I epwe urenir usun ewe “esissinen ewe fansoun [An Oruan] wareto, me ewe fansoun soponon.”1

Jises a urenir usun ekkewe napanap repwe feito me mwen An niwin me osopano ren an apasa pwe, “Nupwen oua kuna ekkei mettoch meinisin, [oupwe] ne sinei pwe ewe [fansoun] a arapeto.”2

Non ewe mwichenap a no, ua auseningoch ngeni ekkewe kapas an Preseten Henry B. Eyring: “Emon me emon kich,” a apasa, “ian chok sia nom ia, mi sinei pwe sia nom non fansoun napenon efeiengaw. … Ion mi wor masan epwe kuna ekkewe esissinen ekkewe fansoun me sening an epwe rongorong kapasen ekkewe soufos mi sinei pwe mi ennet.”3

Ewe Chon Amanau a annuku ngeni noun chon kuno mi pwaracho: “Jises a apasa ussur: “Ifa me feiochumi mesemi mi kuna o seningemi mi rong.”4 Iwe meni ei feioch epwe ngeni kich ren ach auseningoch ngeni ekkewe kapasen ewe Samon me ren Noun kewe soufoos me pwan ekkoch non ei mwichenap.

Wheat me Tare

Ewe Samon a awewei pwe non ei amuchunon fansoun me mwen An niwinsefan, ekkewe “wiit,” ewe A anapanapa pwe ir “ekkewe semiriten ewe muu,”5 repwe mar fengen me ekkewe “ira mi ngaw,” ika ekkewe rese tongei Kot me rese apwonueta An annuk. Repwe “mar fengen”6nomofengen

Iei ach fonufan tori an ewe Chon Amanau niwinsefan, ren watten mettoch mi och me watten mettoch mi ngaw won epek meinisin.7

Mwni epwe wor fansoun kosap mefi ussun ew pochokunen, marinon onen wheat. Nikitu ngeni inisum! Ewe Samon a apasa pwe ekkoch repwe usun ekkewe kukkun fetenin mi keran pwata.8 Kich noun Aramas mi Pin non Fansoun Soponon, nge inamo sise mwo winiti ion sia mochen winiti, kich mi ennet non ach mochen sipwe Noun wesetan noun chon kuno.

Apochokuna Ach Nuku non Jises Kraist

Sia sinei pwe nupwen ngaw a napeno non ewe fonufan, ach manauen ngun, me manauen ngunun ekkewe sia tonger, epwe namot sipwe unusen tumunu, eppeti, me apochokuna waran ach nuku non Jises Kraist. Ewe Aposel Paul a ouroura kich pwe sipwe pochokununo,9 nongonongoch, me nukuchar10 non ach tong ngeni ewe Chon Amanau me ach nikitu ne tapweno mwirin. Ikenai me ekkewe ran mwach a namot epwe nap ach achocho ne anongaochu ekiek, achocho ne nenengenochu, mamasa ekkewe chon u ngeni me tumunungaw.11

Nge pwan mo ren ewe napenon mwokutukutun fonufan unukuch, mi auchea sisap nuokus. Ewe Samon ese tongeni nikitano Noun aramas pwon. Mi wor ew manamanen aninisin niffangen ngun me emwen seni nang fan iten ekkewe mi tupwen.12 Ei kapachetan feiochun manamanen ngun, inamo, ika esap nom woch pokiten chok kich chon ei tappin aramas. A fis nupwen sia apochokuna ach nuku non ewe Samon Jises Kraist me apwonueta An kewe annuk, nupwen sia sinei I me tongei I. “Iei manau esemuch,” Jises a iotek, “pwe repwe sinei en ewe emon chok God mi ennet o repwe sinei Jises Kraist, ewe ka tinato.”13

Usun sia ennetin sinei, awora ach nuku non Jises Kraist me winiti emon chon kuno a nap seni fan ew chok pekin finata— nap seni fan-ew chok mettoch a fis. Iei ew mi pin, foforun mi soposopoono a mar me wateno non fansoun manauach, a soposopono tori ach fotopukutiw ren Pechen.

Ren ewe wheat mi mar fengen ren ekkewe tare non ewe fonufan, ifa usun sia tongeni awatteno me apechekuna ach pwonen nikitu ngeni ewe Chon Amanau non ekkewe ran mwach?

Ikkei unungat ekiek:

Akokakicheno non ewe Manauen Jises

Aewin, sia tongeni akokaochukicheno non manauen Jises, An afanafan, An tekia, An manaman, me An asoren achasefan. Ewe Chon Amanau a apasa, “Nengeniei non ekiek meinisin.”14 Ewe Aposel John a achema ngenikich, “Sia tongei i, pokiten a akkom tongei kich.”15 Ren ach ennetin mefi An tong, ach tong Ngeni a watteno, nge ren ennetin, a murinno sipwe apiru An minen apiru ren tong me tumun ngeni ekkana mi nom aruch. Fiti meinisin mokutukut mi tupwon ngeni I, sia kunaochu I.16 Sia asamonu me tongei I me achocho non ach tongeni ne appiru I ekis me ekis.17

Fori Ekkewe Pwon mi Pin ren ewe Samon

Mwirin, nupwen sia sineochu me tongei ewe Chon Amanau, sia pwan mochen ne pwon ngeni I ach nikitu me nuku. Sia fori pwon mi pin ren I. Sia poputa ren ach kewe pwon atun papatais, me sia apungano ekkei pwon me ekkoch nupwen sia aier iteiten ran, tingor omusomusen tipis, me chengen ne angei ewe sakrament iteiten wiik. Sia pwon ach sipwe “chechemeni i fansoun meinisin me annesochisi an kewe annuk.”18

Nupwen sia monneta, sia etiwa ekkewe angangepin me pwon mi pin ren ewe tempel. Ach mefi ewe memefin fansoun esemuch non ach kewe mosonosonen fansoun mi pin non imwen ewe Samon, sia pwapwa ne fori pwon mi pin ren Kot me apochokuna ach finata ne aponueta.

Fori me aponueta ekkewe pwon mi pin a mut ngeni ewe tongen ewe Chon Amanau an epwe mwono non anonnonen netipach. Non puken ei maram ren Liahona, Preseten Russell M. Nelson a apasa: “[Ach] pwon mi pin epwe emweni kich ach sipwe arap ngeni I.… Kot esap nikitino nefinan seni ekkewe ra fen fori ena sokkun fofo ngeni I.”19 Me nupwen Preseten Nelson a apasa non murinon an kapas, non ei soran,“Fiti ewe efeiochun ew me ew kewe minefon tempel, manamanen Kot mi kapacheta mi feitto ngeni ewe fonufan an epwe apochokunakicheno me fiu ngeni pochokunonon foforun ewe chon u ngeni.”20

Kich sia tongeni kuna pwata ewe Samon epwe emweni Noun soufos an epwe wato ewe tepmel mi pin ngeni kich me mut ngeni kich sipwe nom non Imwan fan chommong?

Nupwen sia tonong non ewe tempel, sia ngas seni pochokunen fonufan mi opwosu kich, nupwen sia kaeo usun ach popun non ei manau me ekkewe niffang esemuch mi kawor ngeni kich seni ach Chon Amanau, Jises Kraist.

Tumunu ewe Nifangen ewe Ngun mi Fel

Amwuchunon, ai aunungatin ekiek: non ei sai mi pin, sia aucheani, tumunu, me epeti ewe niffangen ewe Ngun mi Fel ren unusen netipach. Ir me ruemon Preseten M. Russell Ballard iwe a aro pwepweneno me Elter Kevin W. Pearson iwe chok ekiseno a kapas ussun an Preseten Nelson kapasen esinesin mi fiti osini pwe upwe pwan eniwini sefani: “Esap tufich ami oupwe manau non pekin ngun nge ese wor ewe emwen, awena, ekinamwei, me ewe memefin ewe Ngun mi Fel ese kou.”21 Eu niffang esor kamo. Sia fori ukukun ach tongeni ne tumunu met sia fori iteiten ran, pwe pochokunen ewe Ngun mi Fel epwe chon nonnom rech. Kich ew saram ngeni ewe fonufan, me nupwen a namot, sia chengen ne finata ach sipwe sokkono seni ekkoch. Ese mo pweneno an President Dallin H. Oaks eisini ekkewe serafo: “[Ouwa] pwaracho ne sokkono? … [Akkeiwin] auchea … ekkewe mochen ouwa finata non pwisin manauemi. … Oupwe feino mwemi fiu ngeni an ewe fonufan mokutukutun u ngeni?”22

Finata om Kopwe Sokono seni ewe Fonufan

Non ew minafon social media, ua tingorei chiechiach chon kuno ar repwe aporousa met ra finata minne mi namot ngenir ar repwe sokkono seni ewe fonufan. Ua angei fite puku ponuwan.23 Ikkei ekkoch:

Amanda: Ngang emon nurse ua angang non ewe imwen kanapus. Ua achocho ne tumunu ekkewe chon kanapus usun an Kraist epwe fori.

Rachel: Ngang emon chon kon non ewe opera, me napengeni a ew ekiek pwe ua tongeni upwe ufouf met chok uf a kawor ngeniei, inamo ika ese och nikinikin ai upwe ufouf. [Pokiten ngang uwa fen efeiochuno non tempe,] ua ureni [ewe chon for uf] pwe mi auchea ewe forun uf epwe[pwonuno inisi] me non. Rese pwapwa … nge ren ar tiperueru ra fori ekkewe siwin. Usap ekkesiwini ewe kinamwe a fis ren ai uta usun emon chon pwarata usun Kraist fansoun meinisin.

Chriss: Ngang emon mi soun sakaw (non ai ua chikar), nimenimoch-ngeni non tempel, choni ewe Mwichefen. Ngang use fanafaneno usun met mi fis ngeniei ren met ngang mi umwesiti me angei ew kapasen pwarata usun ewe Achasefan [an Jises Kraist].

Lauren: Ua angang ne makkei ew sipai fiti chienei chon sukun non high school. Ra mochen nikiniki we ngang mi chok fanafaneno me mosonoson upwe nounou kapas mi ngaw. Ra chok echimwaei, nge use etiwa me ua chok pochokunono won ai we.

Adam: Chommong aramas rese nuku ei nupwen uwa apasa pwe ngang mi manaueni ewe annukun nimenimoch me use katon sasing ika kachito mi ngaw. Rese weweiti ewe aninnisin pwapwa me kinamwen ekieki a ngeniei.

Ella: Semei we i emon chon ewe mwichen mwan mi sani mwan me fefin mi sani fefin. Ua soun achocho ne asufonu an ekkoch ekiek nupwen ua emon chon pwarata usun Kraist me ua ennet ngeni met ua nuku.

Andrade: Ua finata upwe sopweno ne no fan nupwen ai famini a finata pwe resap chiwen no.

Me saigon, seni Sherry: Aua fiti ew mettoch a fis ren imwen ewe governor we. Ra poputa ne uwou u sampein ren ew “toast.” Ua chok tingor konik, inamo ewe chon angang a apasa pwe mi enetipengaw. Aua un me apwapwai ewe governor, me ua eitieta unumei we kapen konik! Ewe governor ese song.

Preseten Nelson a apasa, “Ewer, en ka nom won ewe fonufan, nge a fokkun sokkofesin nonnomum seni ewe fonufan an epwe anisuk om kopwe omonungaw seni tikitikipunun ewe fonufan.”24

Anastasia, emon kukkun inenap seni Ukraine, a nom non pioing mwirin chok a nounatiw noun ewe at atun ekkewe pakutang ra poputa non Kyiv ei February a no. Emon nurse a suki ewe asamen ewe rumwen ewe pioing me apasa ren mengungu mi weiweita, “Angei noum we monukon, tukumano non echo pananget, me feino non ewe hall—iei!”

Mwirin, Anastasia a makkei:

“Usefen mo nge pwan ekieki pwe ekkewe aewin ranin ai emon in inenap repwe weires, … nge … ua chok anonga ai ekiek won … ekkewe feioch me manaman ua kuna. …

“Iei, … meni epwe nikinikin weires an emon epwe omusano ekana rafen efisata watten osukosuk me feiengaw … , nge ussun emon noun Kraist chon kaeo, a wor ai nuku pwe upwe tufichin [omusano]. …

“Use sinei mettoch meinisin epwe fis non ranin mwach, nge nagng mi sinei pwe ach amwochu ach pwon mi pin epwe mut ngeni ewe Ngun epwe soposopono ne nom rech, … epwe mut ngeni kich sipwe mefi pwapwa me apinukunuk, pwan fansoun weires.”25

Ewe Pwonen Manau Esemuch me Ningen Celestial

Pwi me fefinei, Ua fen feioch ne angei ewe tong ese wor ne kaukun an ach achengicheng Chon Amanau, Jises Kraist. Ua sinei pwe I mi manau me a emweni An angang mi pin. Ese wor unusochun ai kapas ai upwe pwarano ai tong ngeni I.

Kich meinisi kich “semeretin ewe pwon” a chouno unusen ewe fonufan non muun me einaing won meinisin ekkewe fonu, tori fite million, nupwen sia awitiwiti ewe amwararen niwinsefaniton ach Samon me Chon Amanau. Saramaram ussun ew saram ngeni ekkewe mi nom unukuch, sia sinei ne anapanapa ach kewe mochen, ekiek, pekin finata, me foffor. Kutta ren unusen netipach ach sipwe sinei me tongei ewe Chon Amanau, sia eimukicheno seni ewe fonufan ren pwon mi pin ngeni Kot, ren ach sokkono, amarar, me auchea nupwen sia asamonu I me An afanafan, nge esap ach sipwe eimukicheno seni ekkoch non ewe fonufan mi sokkono ar nuku.

A eu sai mi amwarar ach sipwe wiit me nein ekkewe tare, fan ekkoch a weires ngeni netipach, nge fansoun meinisin akinamwe sefan ren ewe aninnisin nuku. Ren om mut ngeni om tong fan iten ewe Chon Amanau me An tong fan itom epwe kokona netipom, ua pwon ngonuk kapachetan apinukunuk, kinamwe, me pwapwa non om weri weiresin manauom. Me ewe Chon Amanau a pwon ngeni kich: “Ngang [upwe] ionfengeni nei aramas, anongonong won ewe kapas mwonomwon ussun ewe wiit me ekkewe tare, pwe ewe wiit epwe tumun me non ewe imwen iseis nupwen repwe ionirenong non pwe epwe ani manau ese much, me mwarini ewe mwarin king fiti ningen selestial.26 Non iten Jises Kraist, amen.

Esinesin

  1. Matthew 24:3.

  2. Matthew 24:33.

  3. Henry B. Eyring, “Steady in the Storms,” Liahona, May 2022, 27.

  4. Matthew 13:16; auchean mi pachenong.

  5. Matthew 13:38.

  6. Matthew 13:30.

  7. Elter Neal A. Maxwell a apasa: “Chon ewe Mwichefen repwe nom non nonnomun ei wiit me foun iran mi ngaw tori fansoun Millenium. Ekkoch wesewesen ira mi ngaw ra tipen fori pwe ita ir wiit” (“Becometh as a Child,” Ensign, May 1996, 68).

  8. Nengeni Doctrine and Covenants 86:4, 6.

  9. Nengeni Colossians 2:7.

  10. Nengeni Colossians 1:23; pwan nengeni Ephesians 3:17; Neal A. Maxwell, “Grounded, Rooted, Established, and Settled” (Brigham Young University devotional, Sept. 15, 1981), speeches.byu.edu.

  11. Non Matthew 13:22Jises a fonou Noun kewe chon kuno pwe resap mut ngeni aurekin ewe fonufan me tikatuputupen pisekisek epwe “nieno ewe kapas” me akounoi an fefeitan pekin ngun. Ua sani ai upwe ri ewe sengen kapas “choke the wor” to the first chapter of John, where John declares the word to be Jesus: “In the beginning was the Word, and the Word was with God. … Mettoch meinisin ra for seni i; wewen pwe Kot ese mo fori och mettoch me nukun i” (John 1:1, 3). Ach nuku non Jises Kraist, ach nikitu ne tapweno mwirin, ach tongei ewe Chon Amanau mi tongeni mwoch, ika eppet seni an epwe mar nupwen esap naf saramen ngun me tumun (nengeni Alma 32:37–41

  12. Nengeni Neil L. Andersen, “A Compensatory Spiritual Power for the RighteousBrigham Young University devotional, Aug. 18, 2015), speeches.byu.edu.

  13. John 17:3

  14. Doctrine and Covenants 6:36

  15. 1 John 4:19

  16. Elter David B. Haight a apasa:

    Elter David B. Haight a apasa: “A ennet pwe ekkoch ra ennetin kuna ach Chon Amanau, nge nupwen emon a anneani ewe puken wewen kapas, a kaeo pwe a tepetep wewen ewe kapas kunausun ach kaeo usun I, tufich mefi nonnomun I, esinna I me An angang, weweiti auchean I, ika poputa ne weweiti I.

    Ekkei sokkun saramen nang me feioch a tufich ngenikich meinisin” (“Temples and Work Therein,” Ensign, Nov. 1990, 61).

  17. Nengeni Mosaia 5:13.

  18. Doctrine and Covenants 20:77.

  19. Russell M. Nelson, “The Everlasting Covenant,” Liahona, Oct. 2022, 5.

  20. Russell M. Nelson, “What Is True?,” Liahona, Nov. 2022, 29.

  21. Russell M. Nelson, “Pwarata fan iten ewe Mwichefen, Pwarata fan iten ManauachLiahonaMay 2018, 96.

  22. Dallin H. Oaks, “Going Forward in the Second CenturyBrigham Young University devotional, Sept. 13, 2022), speeches.byu.edu. Preseten Oaks a era pwe nepoputan ekkewe kapas “fori pwe kepwe sokkono” a feitto seni eu makken kapas non ewe Deseret Magazine me ren Elder Clark G. Gilbert, ewe Church Educational System’s commissioner, ren auchean apechekuna napanapen namanam non sukkun college (nengeni “Dare to Be Different,” Deseret Magazine, Sept. 2022, deseret.com).

  23. Ika oua mochen kaeo seni ekkoch ekkewe ra porous won ifa ussun ra fen sokono seni ewe fonufan, ouwa tongeni anneani ar kana porous won facebook (nengeni Neil L. Andersen, Facebook, Aug. 18, 2022, facebook.com/neill.andersen) or Instagram (see Neil L. Andersen, Instagram, Aug. 18, 2022, instagram.com/neillandersen).

  24. Russell M. Nelson, “Hope of Israelworldwide youth devotional, June 3, 2018), HopeofIsrael.ChurchofJesusChrist.org.

  25. Anastasia Kocheva, “Facing the Conflict in Ukraine, Healing the Conflict in My Heart,” YA Weekly, May 2022.

  26. Doctrine and Covenants 101:65