Oqo na Kena Gauna
Oqo na gauna e rawa ni da vuli kina. Oqo na gauna e rawa ni da veivutuni kina. Oqo na gauna e rawa ni da vakalougatataki ira na tani.
Kemuni na taciqu kei na ganequ, na koniferedi oqo sa vakairogorogo ena vuqa sara na sala. Eda sa vakalougatataki ena masu, na itukutuku, kei na sere ivakatagi. Eda sa vakauqeti mai vei ira na italai ni Turaga.
Eda sa ciqoma na veidusidusi bibi me baleta na veisiga ni mataka. Na noqu masu sai koya ni sa vosa vakadodonu vei kemuni na Yalo me baleta na veika e vinakata na Turaga mo ni cakava.
Ena sega ni dau dei na veika e baleta na siga ni mataka. Dau veisau na draki. Dau veilecayaki na cowiri ni bula vakailavo. Na veileqa vakasauri, na leqa tubu koso, na mate veitauvi, kei na tauvimate e rawa ni veisautaka vakatotolo na bula. Na veika oqo e vakavuqa ni sega ni rawa ni da dau lewai. Ia, e tiko na ka eda rawa ni lewa, oka kina na noda vakayagataka na gauna e veisiga.
Au taleitaka na serekali oqo mai vei Henry Van Dyke, tabaki ena dua na kaloko ni siga e Wells College mai Niu Ioka. E vaqo:
Na iyaloyalo ni noqu iqaqalo
Wasea na siga ni mataka mai na noa:
Moce no kina na auwa se bera mai
Ena butobuto, ka uabaleta na nomu igu:
E dakuna ka na sega ni lesu tale mai,
Na auwa sa tasiri, sa sega ni nomu:
Dua walega na auwa e koto e ligamu,—
Na GAUNA OQO e tu kina na iyaloyalo ni siga.1
Io, e rawa ka dodonu me da vuli mai na veigauna sa oti, ka dodonu me da vakavakarau ki na veigauna sa bera mai. Ia, ena gauna oqo sa rawa ni da cakava kina. Oqo na gauna e rawa ni da vuli kina. Oqo na gauna e rawa ni da veivutuni kina. Oqo na gauna e rawa ni da vakalougatataki ira kina na tani ka “laveta cake na liga sa wadamele.”2 Me vaka na ivakasala ni parofita o Momani vua na luvena o Moronai, “Raica sa tu na itavi me daru vakayacora ena bula oqo, me daru valuta na meca ni valavala dodonu kecega, ka rawata na vakacegu ena matanitu ni Kalou.”3
E sega ni moce na vunica. Ena dau tu ga kina na veisaqasaqa ki na dina. Au tokaruataka na noqu veivakauqeti mai na mataka nikua mo ni cakava na veika ena vakalevutaka cake na nomu toso vakayalo vinaka, na lave cake e tukuna tiko o Elder Dieter F. Uchtdorf, mo toso tikoga ki liu ena bolebole kei na madigi cava ga ena yaco mai.
Na toso vakayalo vinaka ena levu cake ni da sokalou ena valetabu ka tubu ena noda kila na rabailevu kei na titobu vakasakiti ni veivakalougatataki eda ciqoma. Au vakatakekere vei kemuni mo ni vorata na veisalatu vakavuravura ena nomuni vakanamata tikoga ki na veivakalougatataki tawamudu ni valetabu. Na nomu gauna ekea ena kauta mai na veivakalougatataki tawamudu.
Ni tubu tikoga na Lotu, eda sa segata me da toso vata ena noda tara na valetabu. E vasagavulukava na valetabu vovou era sa tara tiko ena gauna oqo. E levu cake e sa vakavoui tiko. Au masulaki ira na tamata e tiko vei ira na kila matai era cakacaka tiko ena itavi oqo e vuravura taucoko.
Ena yalo ni masumasu ni vakavinavinaka, e kani marau meu kacivaka yani na ituvatuva me tarai e dua na valetabu vou ena veivanua oqo: Wellington, New Zealand; Brazzaville, Republic of the Congo; Barcelona, Spain; Birmingham, United Kingdom; Cusco, Peru; Maceió, Brazil; Santos, Brazil; San Luis Potosí, Mexico; Mexico City Benemérito, Mexico; Tampa, Florida; Knoxville, Tennessee; Cleveland, Ohio; Wichita, Kansas; Austin, Texas; Missoula, Montana; Montpelier, Idaho; kei Modesto, California.
Na 17 na valetabu oqori ena vakalougatataka e vuqa sara na bula ena yasa ruarua ni ilati. Au lomani kemuni, na taciqu kei na ganequ. E bibi cake sara, ni lomani kemuni na Turaga. O koya na nomu iVakabula ka Dauveivueti. Sai Koya e liutaka ka dusimaka Nona Lotu. Me da tamata kilikili kaya kei na Turaga, ka a tukuna, “Ia dou na yaco mo dou noqu tamata, ia koi au kau na yaco meu nomudou Kalou.”4
Sa noqu masu kina oqo ena yaca tabu i Jisu Karisito, emeni.