Kev Ua Tub Txib Ua rau Kuv Tau Koob Hmoov Tas Mus Li
Kuv thov kom nej cov tub hluas ntxhais hluas thiab nej niam nej txiv yuav pom thiab paub tias kev mus ua tub txib ntxhais txib yuav foom koob hmoov rau nej lub neej tas mus li.
Ua tsaug, Thawj Tswj Hwm Nelson, vim koj hais lus txog kev ua tub txib ntxhais txib.
Cov kwv tij thiab cov muam, ob peb xyoos tas los thaum kuv hais lus hauv lub tuam rooj sab laj, tam sim ntawd kuv sab qhov muag laug raug ib yam hu ua macular degeneration, uas raug phem zuj zus mus txog thaum kuv tsis txawj pom kev ntawm sab qhov muag ntawd.
Thaum kuv sim kov yeej qhov teeb meem no, kuv yeej ua Vajtswv tsaug rau lwm txoj kev pom kev, xws li kev txawj pom yav dhau los. Thaum kuv xav txog kuv lub neej tas los, kuv txawj pom tias twb muaj tej xwm txheej uas pab kuv ntau heev. Ib qho xwm txheej zoo li ntawd yog qhov uas kuv txoj kev ua ib tug tub txib nyob Askiv Teb thaum kuv yog ib tug tub hluas ua rau kuv tau koob hmoov thiab pab kuv lub neej ntawm sab ntsuj plig.
Kuv tau xav txog tej teeb meem ntawm nyiaj txiag nyob hauv lub Caij Muaj Kev Txom Nyem Ntau hauv tej xyoo 1930 uas ua rau kuv niam kuv txiv thiab kuv tsev neeg raug hmoov phem. Kuv txiv xav xav cawm nws lub koom haum muag tsheb thiab pab nws tsev neeg tau noj tau haus ces nws thiab kuv niam nkawd tsis tau mus rau lub koom txoos thaum lub sij hawm nyuaj no.
Txawm yog peb tsis tau mus rau lub tsev koom txoos ua ke los, muaj tej lub sij hawm uas kuv tseem tau nrog kuv cov phooj ywg mus.
Hauv lub caij ntawd, kuv twb xav txog kev ua tub txib, tiam sis kuv tsis tau nrog kuv niam kuv txiv sib tham txog qhov ntawd.
Thaum kuv mus kawm ntawv qib siab, ob peb tug phooj ywg thiab kuv twb txiav txim siab mus ua tub txib. Nrog kuv tus npisov, kuv tau sau kuv daim ntawv thov mus ua tub txib thaum kuv niam kuv txiv tsis nyob. Thaum kuv niam kuv txiv rov qab los tsev, kuv ua rau nkawd xav tsis thoob thaum kuv qhia nkawd tias tau hu kuv mus ua tub txib nyob hauv Askiv Teb Great Britain. Kuv yeej ua Vajtswv tsaug vim nkawd zoo siab txhawb nqa kuv txoj kev txiav txim thiab vim kuv cov phooj ywg tau pab kuv txiav txim siab mus.
Kuv txoj kev ua tub txib tau npaj kuv ua ib tug txiv tsev zoo dua thiab pab kuv txawj ua lag luam. Qhov no twb tau npaj kuv ua hauj lwm rau tus Tswv nyob hauv Nws lub Koom Txoos.
Nyob rau lub tuam rooj sab laj thaum lub Plaub Hlis Ntuj xyoo 1985, kuv tau hais lus nyob hauv tuas pov thawj hwj. Kuv tau hais lus rau cov tub hluas. Kuv tau hais txog kev npaj ua ib tug tub txib. Kuv tau hais tias, “Los ntawm tag nrho tej kev cob qhia uas kuv tau kawm thaum kuv ua hauj lwm rau lub Koom Txoos, tsis muaj ib yam dab tsi uas tseem ceeb tshaj tej kev qhia uas kuv tau txais thaum kuv yog ib tug txwj laug uas muaj kaum cuaj xyoos thaum kuv ua ib tug tub txib.”1
Tus Tswv paub nej. Thaum nej ua ib tug tub txib ntxhais txib, yuav muaj tej xwm txheej uas pab nej los paub tus Tswv zoo dua. Nej yuav loj hlob tuaj ntawm sab ntsuj plig thaum nej ua hauj lwm rau Nws. Los ntawm Nws lub npe, Nws yuav txib nej mua pab lwm tus. Nws yuav ua kom nej txais kev tshoov siab los ntawm tus Vaj Ntsuj Plig Dawb Huv. Tus Tswv yuav tso cai rau nej qhia los ntawm Nws lub npe. Nej ua tau tej yam kom Nws tso siab rau nej thiab vam khom nej.
Tsib lub hlis tas los, Txwj Laug Jeffrey R. Holland thiab Txwj Laug Quentin L. Cook, ob tug neeg uas tau ua tub txib nyob hauv British Isles, tau koom nrog kuv mus xyuas cov mej zeej thiab cov tub txib ntxhais txib nyob hauv thaj av zoo nkauj ntawd. Thaum kuv nyob ntawd, kuv tau xav txog thaum kuv yog ib tug tub txib. Kuv ua tim khawv tias yog lub sij hawm thaum kuv ua tub txib uas kuv tau los paub tias kuv Leej Txiv Saum Ntuj Ceeb Tsheej thiab kuv tus Cawm Seej, Yexus Khetos, paub thiab hlub kuv.
Kuv tau koob hmoov vim kuv tau muaj ob qhov chaw tshaj tawm txoj moo zoo tus thawj tswj hwm, Selvoy J. Boyer thiab Stayner Richards, nrog rau nkawd ob tug khub Gladys Boyer thiab Jane Richards. Thaum kuv xav txog qhov no, kuv pom meej tias nkawd tso siab rau kuv thiab hlub kuv. Nkawd tau qhia txoj moo zoo rau kuv. Nkawd cia siab tias kuv yuav ua ntau yam. Nkawd tau txib kuv ua tej yam nyuaj thiab cia kuv muaj kev lav ris ua ib tug thawj coj kom pab kuv kawm thiab npaj pab lwm tus tas kuv lub neej.
Kuv kuj tau xav txog qhov uas Thawj Tswj Hwm Spencer W. Kimball tau hu kuv los tswj hwm Qhov Chaw Tshaj Tawm Txoj Moo Zoo Canada Toronto nrog kuv tus poj niam, Barbara, thiab wb cov me nyuam tau los nrog wb nyob thiab. Thawj Tswj Hwm Kimball tau hu wb los ua hauj lwm thaum lub Plaub Hlis Ntuj xyoo 1974, tsis ntev tom qab nws tau hais ib zaj lus hu ua “Thaum lub Ntiaj Teb Yuav Hloov Siab Los Ntseeg.”2 Nyob hauv zaj ntawd Thawj Tswj Hwm Kimball piav txog nws lub tswv yim kom coj txoj moo zoo mus thoob plaws lub ntiaj teb. Nws tau hais kom muaj tub txib ntxhais txib coob ntxiv uas tuaj txhua qhov chaw tuaj. Nws tau qhia kom peb nco txog tus Tswv tej kev xav “kom txhua tus neeg … tsa ib lub suab ceeb toom mus rau tej neeg hauv lub ntiaj teb.”3 Thawj Tswj Hwm Kimball tej lus qhia txog qhov uas cov tub hluas yuav tsum mus ua tub txib los tej tsev neeg nyob txhua qhov chaw tau sib tham txog qhov no. Yeej tsis tau hloov qhov no. Kuv zoo siab uas Thawj Tswj Hwm Russell M. Nelson kuj tau hais txog tej uas tus Tswv xav kom peb ua tag kis no.
Twb yog 10 xyoo dhau los thaum Thawj Tswj Hwm Thomas S. Monson tau tshaj tawm tias yuav pauv hnub nyoog cia cov tub hluas ntxhais hluas mus ua tub txib ntxhais txib.4 Kuv xav tias ib qho uas qhia yog vim li cas tau pauv li no yog kom peb cov tub hluas ntxhais hluas coob ntxiv muaj ib lub cib fim mus ua tub txib ntxhais txib.
Vim kuv yog tus Tswv Yexus Khetos ib tug Thwj Tim, tam sim no kuv hu nej cov tub hluas—thiab cov ntxhais hluas uas xav mus tshaj tawm txoj moo zoo—kom nej pib tam sim no nrog nej niam nej txiv sib tham txog kev mus ua tub txib ntxhais txib. Kuv kuj caw nej nrog nej cov phooj ywg tham txog kev mus tshaj tawm txoj moo zoo, thiab yog nej ib tug phooj ywg tsis paub xyov nws puas xav mus tiag tiag, hais kom nws nrog nws tus npisov tham.
Cog lus rau nej tus kheej thiab nej Leej Txiv Saum Ntuj Ceeb Tsheej tias nej yuav mus ua tub txib ntxhais txib thiab txij no mus rau yav tom ntej nej yuav ua kom nej lub siab thiab nej txhais tes huv thiab tsim nyog. Kuv caw nej kom txais tau ib zaj lus tim khawv txog Yexus Khetos txoj moo zoo uas Nws muab txum tim rov qab los.
Cov niam tsev txiv tsev ntawm cov tub hluas ntxhais hluas zoo kawg no, nej muaj ib lub luag hauj lwm tseem ceeb hauv tus txheej txheem npaj no. Pib hnub no nrog nej cov me nyuam tham txog kev ua tub txib ntxhais txib. Peb paub tias ib tsev neeg yog cov uas muaj hwj huam zoo tshaj plaws kom pab peb cov tub hluas ntxhais hluas npaj siab.
Yog nej tseem muaj hnub nyoog uas cia cov tub hluas ntxhais hluas mus tshaj tawm txoj moo zoo tiam sis nej tsis tau mus vim muaj phaum mob los sis nyob ntawm lwm yam, kuv caw nej mus tam sim no. Nrog nej tus npisov tham, thiab npaj mus ua hauj lwm rau tus Tswv.
Kuv hais kom nej cov npisov pab tag nrho cov tub hluas ntxhais hluas thiab cov uas tsis ntev yuav muaj hnub nyoog txaus mus ua tub txib ntxhais txib kom npaj mus, thiab kuv kuj xav yaum nej cov npisov nrhiav cov uas muaj hnub nyoog txaus tiam sis tseem tsis tau mus. Caw txhua tus tub hluas los ua tub txib, thiab txhua tus ntxhais hluas uas xav mus.
Rau nej cov uas yog tub txib ntxhais txib tam sim no, peb ua nej tsaug. Nej tau mus ua tub txib thaum muaj phaum mob thoob lub ntiaj teb. Yog li ntawd, nej txoj kev ua tub txib yeej tsis zoo ib yam li lwm lub sij hawm thaum lwm tus ua tub txib ua ntej xyoo 2020. Kuv paub tias yeej tsis yooj yim. Tiam sis txawm yog ib lub sij hawm nyuaj heev los, tus Tswv muaj ib txoj hauj lwm rau nej ua, thiab nej yeej tau ua zoo kawg. Piv txwv hais tias, nej tau siv tej txuj ci technology kom muaj tej kev tshiab nrhiav cov uas npaj siab kawm txog Yexus Khetos txoj moo zoo. Thaum nej rau siab ua hauj lwm thiab ua raws li nej muaj peev xwm ua, kuv paub tias tus Tswv zoo siab rau nej txoj kev siv zog ua hauj lwm. Kuv paub tias nej txoj kev ua hauj lwm yuav ua rau nej tau koob hmoov.
Thaum tso nej tawm hauv nej qhov chaw tshaj tawm txoj moo zoo mus lawm, thov kom nej nco ntsoov tias yeej tsis tso nej tawm hauv lub Koom Txoos mus. Siv tej cwj pwm zoo uas nej kawm thaum nej ua tub txib ntxhais txib, txhawb nej zaj lus tim khawv kom muaj zog, khwv ua hauj lwm, thov Vajtswv, thiab mloog tus Tswv lus. Ua raws nraim li nej tej kev khi lus. Foom koob hmoov thiab pab lwm tus.
Kuv thov kom nej cov tub hluas ntxhais hluas thiab nej niam nej txiv yuav pom thiab paub tias kev mus ua tub txib ntxhais txib yuav foom koob hmoov rau nej lub neej tas mus li. Thov kom nej yuav paub kawg siab kawg ntsws txog lub hwj chim ntawm tus Tswv txoj kev caw Mauxiyas cov tub. Nws tau hais tias, “Cia li mus … thiab txhim tsa kuv txoj lus; tiam sis nej yuav tsum ua siab ntev nyiaj thaum raug kev txom nyem, xwv kom nej yuav ua tau yam ntxwv zoo … thiab kuv yuav muab nej los ua ib rab cuab yeej nyob hauv kuv txhais tes kom coob leej txais tau txoj kev cawm seej.”5
Thov Vajtswv foom koob hmoov rau cov tub hluas ntxhais hluas ntawm lub Koom Txoos kom lawv xav mus npaj thiab ua hauj lwm rau Nws, kuv hais tag kis no los ntawm tus Tswv Yexus Khetos lub npe dawb ceev, amees.