Panangikasaba iti Ebanghelio ti Talna
Addaantayo iti sagrado a pagrebbengan a mangibinglay iti bileg ken talna ni Jesucristo iti amin a dumngeg.
Patpatgek a kakabsatko, kablaawankayo iti sapasap a komperensia! Pinadpadaanak daytoy nga aldaw nga addaan dakkel a namnama. Ikarkararagankayo iti inaldaw. Inkararagak pay nga agbalin koma daytoy a komperensia a panawen ti naespirituan a pangparegta iti tunggal maysa kadakayo.
Manipud pay idi kaudian a komperensia, nagtultuloy dagiti rigat iti lubong. Apektuan pay laeng ti sangalubongan a pandemia ti biagtayo. Ket ita nadarup ti lubong iti gubat a pagbutbutngan unay ti minilmilion nga inosente a lallaki, babbai, ken ubbing.
Impadton dagiti propeta ti aldawtayo, nga addanto dagiti gubat ken damdamag ti gubat ken no mariribukanto ti sibubukel a lubong.1 Kas pasurot ni Jesucristo, ipakaasimi kadagiti lider dagiti nasion a mangsarak iti natalna a pangrisut iti dida pagkikinnaawatan. Awaganmi dagiti tao iti amin a lugar nga ikararaganda dagiti agkasapulan, nga aramidenda ti kabaelanda a mangtulong kadagiti agsagsagaba, ken agpatulongda iti Apo a gibusanna dagiti ania man a dadakkel a susik.
Kakabsat a lallaki ken babbai, kasapulan unay ti ebanghelio ni Jesucristo ita nga agdama. Labsingen ti panangsusupanget ti amin a banag nga intakderan ken insuro ti Mangisalakan. Patpatgek ni Apo Jesucristo ken paneknekak a ti ebangheliona laeng ti naandur a pangrisut para iti talna. Ti ebangheliona ti maysa nga ebanghelio ti talna.2
Ti ebangheliona laeng ti sungbat no adu ditoy lubong ti maklaat iti buteng.3 Daytoy ti mangyunay-unay iti panagkasapulantayo unay a suroten ti pammilin ti Apo kadagiti disipulona a “mapan … iti amin a nasion, ket mangikasaba iti ebanghelio iti tunggal parsua.”4 Addaantayo iti sagrado a pagrebbengan a mangibinglay iti bileg ken talna ni Jesucristo iti amin a dumngeg ken mangbay-an iti Dios nga agballigi iti biagda.
Tunggal parsua a nakitulag iti Dios ket nagkari a mangaywan iti dadduma ken pagserbian dagiti agkasapulan. Maipakitatayo ti pammati iti Dios ken kanayon nga agsaganatayo a sungbatan ti amin nga agsaludsod maipapan iti “namnama nga adda [kadatayo].”4 Adda akem ti tunggal maysa kadatayo iti panangummong ti Israel.
Ita sipipigsa nga ipatalgedko nga indawat ti Apo iti tunggal maikari, makabael a barito tapno agsagana ken agserbi iti mision. Para kadagiti babbarito a Santo iti Ud-udina nga Aldaw, pagrebbengan iti priesthood ti serbisio a misionario. Dakayo a babbarito nailatangkayon para itoy a panawen a maar-aramiden ti naikari a panangummong iti Israel. No agserbikayo iti mision, napateg ti akemyo iti daytoy awan kapadana a pagteng!
Para kadakayo agtutubo ken makabael a kakabsat a babbai, nabileg met ti mision, ngem, opsional, a gundaway. Patpatgenmi dagiti sister missionaries ket pasangbayenmi ida a naimpusuan. Nakaskasdaaw ti maitulongyo iti daytoy nga aramid! Agkararagkayo a mangammo no kayat ti Apo nga agserbikayo iti mision, ket sungbatan ti Espiritu Santo iti puso ken panunotyo.
Agtutubo a gagayyem, napateg ti tunggal maysa kadakayo iti Apo. Inlatangnakayo agingga ita a tumulongkayo a mangummong iti Israel. Ti pangngeddengyo nga agserbi iti mision, proselyting man wenno service mission, mangbendisionto kadakayo ken iti adu a dadduma pay. Pasangbayenmi pay dagiti senior couple nga agserbi no ipalugod dagiti kasasaad. Gagangay a di masukatan dagiti panagkagumaanda.
Amin a misionario ket mangisuro ken agpaneknek iti Mangisalakan. Ti naespirituan a sipnget iti lubong ket aramidenna ti silaw ni Jesucristo a kasapulan pay. Maikari ti tunggal maysa iti gundaway a mangammo iti naisubli nga ebanghelio ni Jesucristo. Maikari ti tunggal tao a mangammo no sadino ti pakasarakanda iti namnama ken talna a “[mangdaeg] iti amin a pannakaawat.”6
Agbalin koma daytoy a komperensia a panawen ti talna ken naespirituan a panagbussog kadakayo. Masarakan ken maawatyo koma ti bukod a paltiing kabayatan dagitoy a sesion, ikararagko iti sagrado a nagan ni Jesucristo, amen.