Pagsangyaw sa Ebanghelyo sa Kalinaw
Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw.
Akong minahal nga mga kaigsoonan, welcome sa kinatibuk-ang komperensiya! Ako naglantaw niining adlawa uban sa hilabihan nga kahinam. Ako nag-ampo alang kaninyo matag adlaw. Nag-ampo usab ako nga kini nga komperensiya mahimong panahon sa espirituhanon nga pagpalagsik alang sa matag usa kaninyo.
Sukad sa kataposang komperensiya, ang mga kalisod sa kalibotan nagpadayon. Ang tibuok kalibotan nga pandemya nakaapekto lang gihapon sa atong kinabuhi. Ug karon ang kalibotan gitay-og sa usa ka panagbangi nga nagdala og kalisang sa minilyon ka inosente nga kalalakin-an, kababayen-an, ug kabataan.
Ang mga propeta nakakita nang daan sa atong panahon, sa dihang adunay mga gubat ug mga hungihong sa mga gubat, [ug] nga ang tibuok yuta magkaguliyang .1 Isip sumusunod ni Jesukristo, nangamuyo kami sa mga lider sa mga nasod sa pagpangita og malinawon nga kasulbaran sa ilang mga panagsungi. Kami nanawagan sa katawhan sa tanang dapit sa pag-ampo alang niadtong nanginahanglan, sa pagbuhat sa ilang mahimo aron sa pagtabang sa nag-antos, ug sa pagtinguha sa panabang sa Ginoo sa pagtapos sa bisan unsa nga dagkong mga panagbingkil.
Mga kaigsoonan, ang ebanghelyo ni Jesukristo wala pa sukad mas gikinahanglan kaysa karon. Ang panagbingkil milapas sa tanang gibarogan ug gitudlo sa Manluluwas. Gihigugma nako si Ginoong Jesukristo ug nagpamatuod nga ang Iyang ebanghelyo mao lamang ang malahutayong kasulbaran alang sa kalinaw. Ang Iyang ebanghelyo mao ang ebanghelyo sa kalinaw.2
Ang Iyang ebanghelyo mao lamang ang tubag sa dihang daghan sa kalibotan ang panguyapan sa kalisang.3 Kini naghatag og gibug-aton sa dinalian nga panginahanglan alang kanato sa pagsunod sa instruksiyon sa Ginoo ngadto sa Iyang mga disipulo nga “panglakaw … sa tibuok kalibotan, ug isangyaw kining maayong balita ngadto sa tanang mga tawo.”4 Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw ug kinsa mopatigbabaw sa Dios diha sa ilang kinabuhi.
Ang matag tawo nga mihimo og pakigsaad sa Dios misaad sa pag-amuma sa uban ug pagserbisyo niadtong nanginahanglan. Kita makapakita sa hugot nga pagtuo diha sa Dios ug kanunay nga andam nga motubag niadtong mangutana kanato bahin sa “paglaom nga anaa [kanato].”5 Ang matag usa kanato adunay papel sa pagpundok sa Israel.
Karong adlawa ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa batan-ong kalalakin-an nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari. Kamong mga batan-ong lalaki gitagana alang niini nga panahon diin ang gisaad nga pagpundok sa Israel mahitabo. Samtang kamo nagserbisyo og mga misyon, kamo adunay importante kaayo nga papel niining wala pa sukad mabuhat nga panghitabo!
Alang kaninyo batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad. Among gihigugma ang sister nga mga misyonaryo ug tibuok kasingkasing namo silang gihangop. Ang inyong matampo niini nga buhat nindot kaayo! Pag-ampo aron masayod kon ang Ginoo buot ba nga moserbisyo kamo og misyon, ug ang Espiritu Santo motubag sa inyong kasingkasing ug hunahuna.
Minahal nga batan-ong mga higala, ang matag usa kaninyo importante ngadto sa Ginoo. Siya migahin kaninyo hangtod niining higayona aron sa pagtabang sa pagpundok sa Israel. Ang inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban. Amo usab nga gihangop ang senior nga mga magtiayon sa pagserbisyo kon ang ilang mga sirkumstansiya magtugot. Ang ilang mga paningkamot dili gayod mahulipan.
Ang tanang misyonaryo nagtudlo ug nagpamatuod sa Manluluwas. Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga “dili matugkad sa tawo.”6
Hinaot nga kini nga komperensiya mahimong panahon sa kalinaw ug espirituhanon nga pagbusog alang kaninyo. Hinaot nga kamo magtinguha ug makadawat og personal nga pagpadayag atol niini nga mga sesyon, ako nag-ampo sa sagrado nga ngalan ni Jesukristo, amen.