Katohrehla Ansou ong Kauno
I peki ni ngidingid rehmwail rahnwet en powehdi peren en sampah kan ni amwail kin katohrehla ansou ong Kauno nan amwail mour—nan ehu ehu rahn.
Riei ohl oh lih akan, nan erein rahn riau kitail alehier kasukuhl sang sounpapah kan en Kauno me nantihong rapahki dahme E kupwurki irail en patowan.
Kitail alehier atail kaweid ong erein sounpwong weneu. Met peideko iei, ia mwoamwen atail pahn wekila pwehki dahme kitail rongehr oh kehn?
Soumwahu doar lusuluso kasaledahr uwen mwadang en kieweklahn mour, ekei ansou sang irehkan me kitail sohte kak apwali. Ahpw, ire tohto me kitail kak apwali. Kitail kin pein koasonehdi atail anahn kan oh koasonehdi mwoamwen atail kin doadoahngki atail kehl, ansou, oh ni mwomw kan. Kitail kin koasonehdi ia mwomwen atail pahn ehu ong mehtaikan. Kitail kin pilada irail kan me kitail pahn kamehlele oh ale kaweid sang.
Ngihl oh katoutou kan en sampa me kedirepw oh kouwahlap. Ahpw me inenen dir ngihl kan me likamw, kaweid sohte mwahu, oh kak keseikitaildi sang pohn ahl en inouo. Pwehn perehsang kitail kanasensued me kin wiawi mwuri, I peki ni ngidingid rehmwail rahnwet en powehdi peren en sampa kan ni amwail kin katohrehla ansou ong Kauno nan amwail mour—nan ehu ehu rahn.
Ma pali laud en dahme kumwail kin ale kin alahldi sang nan facebook de wasa teikan, amwail kak en rong kisin ngihl tikitiko sang Ngehno pahn sohrala. Ma kumwail sohte kin rapahki Kauno nan kapakap oh wadek pwuhk sarawi kan, kumwail mweidohngehr kumwail en lohdi pahn lamalam kan me mwoamwen kaselel ahpw sohte mehlel. Pwe mehlel Souleng me keieu pwoson kin kak pwupwidi pahn ngilen koul en Babylon [Sampah] kan.
Riei ohl oh lih akan, I peki ni ngidingid kumwail en katohrehla ansou ong Kauno! Kauwada pwoahson en palingenimwail kehlail pwehn kak en powehdi kasongosong ni amwail kin wia mehkan me kin kahrehdo Ngehn Sarawi rehmwail ansou koaros.
Dehr kasohwe me mehlelo me Ngehno kin koasoia … mehkan me uhdahn wiewiawi, oh mehkan me uhdahn pahn wiawi.1 “E pahn ketin kasalehiong kumwail mehkoaros me kumwail en wia.”2
Sohte mehkoat kin luke Ngehno laud sang amwail kin pein dokehki mehkoaros rehn Sises Krais. Koasoia Krais, popohl rehn Krais, kin pereniki wadek mahsen en Krais, oh wenla mwowe poadidi ong Krais.3 Wiahki rahn en Sabbath rahn kaperen ehu ni amwail kin kaudekiong Ih, ale kamadipw sarawi, oh wauneki Sapwellime rahno.4
Ihme I kosia duen kesempwal pe nimenseng wet, menlau katohrehla ansou ong Kauno nan Tehnpase sarawio. Sohte me kak kakehlaka poahson en palingenamwail duwehte papah oh kaudek nan tehnpas sarawi.
Se kaping kalahngan ong koaros me wie onohne tehnpas sarawi kapw akan. Tehnpas Sarawi wie koukouhda wasa koros nan sampah. Rahn wet I perenkihda ei pahn pakairkihda atail koasondi kan en kauwada pil ekei tehnpas sarawi nan wasa de was me karanih kahnihmw pwukat: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; oh onohnda sapahl en Tehnpas Sarawi en Provo, Utah mwurin kapidolong en Tenpas Sarawi en Orem, Utah.
I poakohng kumwail, riei ohl oh lih akan. Kauno ketin mwahngi oh poakohng kumwail! Iei Ih me atail Sounkomour oh Soundor. E kin ketin kaweid oh kahluwa Sapwellime Mwomwohdiso wet. E pahn ketin kaweid on kahluwa kumwail nan amwail mour kan ma kumwail katohrehla ansou ong Ih nan amwail mour--nan ehu ehu rahn akan.
Koht en ketin ieiang kumwail lao kitail pwurehng tuhpene, iei ahi kapakap ni lengileng sarawi en Sises Krais, amen.