Ankorankor Asomdwee wɔ Ɔhaw Mber mu
Onnkehiaa dɛm da dɛ yɛhwehwɛ ankorankor asomdwee.
Ndaansa yi wɔmaa me dwuma dɛ munkotu abakɔsɛm bea Nauvoo n’afã bi nhyɛ Ewuradze nsa. M’edwuma no n’afã bi no, mutumii kɛseraa Liberty Efiadze a ɔwɔ Missouri. Morohwɛ efiadze no, modwendween dza osisii hɔ no a wɔama wɔayɛ Asɔr abakɔsɛm mu ɔfã tsitsir no. Ɔnam ahyɛdze a Missouri ambrado no mae dɛ wonkunkum hɔn no, ohunahunaa Ahotseweefo no hɔn nkwa. Dza ɔkã ho no, nna Nkɔnhyɛnyi Joseph na mfɛfo mu ekunyin kakra no wɔdze hɔn ato Liberty Efiadze a ɔnnsɛ. Siantsir kor a nna wokyir hɛn asɔrmba no yerɛyerɛw nye dɛ nna hɔn mu dodow tsia ndɔnkɔyɛ. 1 Atseetsee yaayaw a wɔdze yɛɛ Joseph Smith na n’akadofo no yɛ nyimpa ne pɛ a ɔdze dzi dwuma bɔn ma ɔkã atseneneefo no, ho mfatoho ankasa. Joseph ne mber wɔ Liberty Efiadze kyerɛ dɛ abɛbrɛsɛ nnyɛ adanse dɛ Ewuradze apa wo anaa Ɔatwe Ne nhyira asan ekyir.
Okitsaa me ara yie ber a mekenkaan dza Nkɔnhyɛnyi Joseph Smith kãa ber a woemua no ahyɛ Liberty Efiadze mu no: “O Nyankopɔn, ewɔ hen? Hen na wo ntamadan a ɔkata wo sumabew do no wɔ?’’ 2 Joseph bisaa dɛ onkodu dabɛn na Ewuradze no nkorɔfo “ wobohu dɛm amandze yi na wɔasɔw dɛm atseetsee a ɔmmfa mbra kwan mu.” 3
Migyinaa Liberty Efiadze mu no, okitsaa me ara yie ber a mekenkaan Ewuradze no mbuae no: “Me ba, asomdwee nkã wo kra; w’akotorka na w’amandzehu na ɔnnkɛkyɛr; na afei, sɛ esɔw no yie a, Nyankopɔn bɛma wo do wɔ sor.’’ 4 Ɔda edzi pefee dɛ dza otsia hɛn no botum atsew hɛnho ama onnyiewiei celestial nkrabea. 5
Agyenkwa no ne nsɛmfua a ɔsom bo no “Me ba, asomdwee nkã wo kra” 6 no gyegye wɔ mo mu ankasa na ohia tsitsir ma hɛn nda yi. Ɔkaa me Ne nkyerɛkyerɛ ma N’esuafo no wɔ No honandua mu somdwuma no.
Ansaana Christ rubohu amandze wɔ Gethsemane Ture no mu na wɔ mbeamudua no do no, Ɔhyɛɛ N’Asomafo no dɛ “hom ndodɔ homho nkorkor, dɛ mbrɛ madɔ hom no” 7 na Ɔtoaa do dze nsɛmfua yinom kyekyee hɔn werɛ: “Asomdwee na medze gya hom; mara m’asomdwee na medze mema hom, nnyɛ dɛ mbrɛ wiadze ma, medze mema hom. Mma hom akoma nntutu, eso mma ɔmmbɔ hu.” 8
Hɛn Ewuradze na Agyenkwa, Jesus Christ ne dzin kor a ɔsom hɛn bo ara yie nye “Asomdwee Hen.” 9 Ewiei no wɔbɛkyekyer N’ahenman no a asomdwee na dɔ kã ho. 10 Yɛhwɛ mfe apem Messiah no n’ahendzi no kwan.
Mfe apem ahendzi ho enyida kwan nyina ekyir no, yenyim dɛ wiadze asomdwee na koryɛ renntahyɛ wɔ hɛn nda yi mu. 11 M’abrabɔ mu no, munnhun enyiannsɔ kɛse dɛm. Ebufuw, wentwiwentwi kasa a ɔhyɛ ebufuw, ɔsɛɛ ndzeyɛɛ a oyi asomdwee na ɔdwe fi hɔ na wɔdze tseetsee hɛn.
Wiadze mu asomdwee wɔmmbɔɔ ho anohoba anaa wonnsii no tadua kɛpem Jesus Christ Ne Mbae a Otsĩa no. Agyenkwa no kyerɛkyerɛɛ N’Asomafo dɛ N’asaase do dwuma no remmfa wiadze nyina mu asomdwee mmba. Ɔkyerɛkyerɛɛ dɛ, “Mma hom nndwen dɛ mebae mobɔsomaa asomdwee wɔ asaase do.” 12 Nna wiadze nyina mu asomdwee nnkã no honandua mu somdwuma ahyɛse no. Wiadze nyina mu asomdwee nnyi hɔ ndɛ.
Naaso, ankorankor asomdwee wobotum enya no ebufuw, wentwiwentwi, na mpaapaamu a ɔsɛɛ na ɔporow hɛn wiadze ndɛ no nyina ekyir. Onnkehiaa dɛm da dɛ yɛhwehwɛ ankorankor asomdwee. Asɔr ndwom dɛɛdɛw a yɛdɔ a Onuabanyin Nik Day akyerɛw ama ndɛ mbabun no a wɔato no , dzin “Asomdwee wɔ Christ mu,” kã dɛ, “Sɛ asomdwee nnyi asaase do a, asomdwee wɔ Christ mu.” 13 Ɔyɛɛ hɛn adom dɛ yenyaa asɔr ndwom yi ansaana wiadze nsan yarba COVID-19 no reba.
Ndwom yi kyerɛ wɔ su fɛɛfɛw mu mbrɛ asomdwee ahwehwɛdze tse na otsĩ mu yie dɛ wɔatow asomdwee ne sekyɛ wɔ Jesus Christ N’abrabɔ na No ndwuma do. President Joseph F. Smith kãa dɛ, “Asomdwee na ɔdɔ sunsum remmba asaase do dabiarada … kɛpem dɛ adasa bɛgye Nyame no nokwar na Nyame n’asɛm … na wɔagye ato mu dɛ no tum na tumdzi no yɛ krɔnkrɔn.” 14
Yerenngyaa da hɛn mbɔdzembɔ dɛ yɛbenya wiadze nyina mu asomdwee no, yeenya taduasi dɛ yebotum enya ankorankor asomdwee dɛ mbrɛ Christ kyerɛkyerɛ no. Nkyerɛkyerɛ yi wɔdze ato gua wɔ Nkyerɛkyerɛ na Ahyɛmudzi mu: “Mbom hom nhu dɛ nyia ɔyɛ tsenenee ndwuma no benya n’akatua, obenya asomdwee so mpo wɔ wiadze yi mu, nye onnyiewiei nkwa wɔ wiadze a ɔreba no mu.” 15
“Tsenenee ndwuma” binom a ɔbɔboa hɛn ma yesiesie ekyingye na yɛabrɛ wentwiwentwi adze na yɛhwehwɛ asomdwee wɔ wiadze mu nye ebɛn? Christ ne nkyerɛkyerɛ nyina tsen kɔ kwankyerɛ yi do. Mobɔbɔ kumabaa a megye dzi dɛ wohia papanara.
Odzi Kan: Dɔ Nyankopɔn, Sie Ne Mbrasɛm horow, na Fakyɛ Obiara
President George Albert Smith bɛyɛɛ Asɔr no ne President wɔ afe 1945 mu. Nna ɔagye dzin dɛ baanodzinyi a ɔdɔ asomdwee wɔ ne mber a ɔyɛ Ɔsomafo no. Mfe 15 ansaana ɔrebɛyɛ President no, wiadze nyina mu sikasɛm ho ahokyer kɛse ho haw na nsɔhwɛ, Wiadze Ɔsatu II owu na ɔsɛɛ a ɔtoaa do no, annyɛ asomdwee koraa.
Wiadze Ɔsatu II baa ewiei no, ne wiadze mfɛndzanan ehyiadzi a odzi kan dɛ President no wɔ Ɔbɛsɛ afe 1945 mu no, President Smith kaa Ahotseweefo no wɔ Agyenkwa no ne nsato dɛ wɔndodɔ hɔn anyɛnkofo na atamfo na nkyii ɔkyerɛkyerɛɛ dɛ, “Ɔno nye sunsum a Latter-day Saintfo nyina wɔdɛ wɔhwehwɛ nya sɛ wɔwɔ enyidado bi dɛ dabi wobegyina n’enyim na wɔagye wɔ ne nsa mu enyimnyam etuu aba fie a.” 16
Otsĩa Ebien: Hwehwɛ Sunsum n’Aba no
Ɔsomafo Paul no Nwoma a ɔdze kɛmaa Galatiafo no mu no ɔkyerɛ nkyɛmu a ɔda ndzeyɛtsenenee a ɔma yɛfata dɛ yenya Nyankopɔn ahenman no dzi na ndwuma a, sɛ yennu hɛnho a, ɔbɛma yɛnnkɛfata. Sunsum no aba “ɔdɔ, dɛw, asomdwee, penkyɛr, ayamuyie, papayɛ, gyedzi, ɔdwe [na] ahohyɛdo” 17 kã dza ɔbɛma yɛafata no ho. Paul dze yɛsoasoa dza ɔyɛ durdur mma hɛnho na mma yɛmberɛ wɔ papayɛ mu so kã ho. 18 Ɔtan, ebufuw, na etutuwpɛ kã dɛm ndwuma no a ɔnntsen no ho. 19
Ahyɛmu Dadaw mu adzesũadze kɛse kor nye mber a ɔfa Egya Abraham ho. Abraham na Lot, no nua ne ba, nna wɔyɛ ahonyafo naaso wohun dɛ wonntum mbɔmu ntsena. Ama woeyi aperper akwa no, Abraham maa kwan ma Lot saan mu yii asaase a ɔpɛ. Lot faa Jordan tɛtɛrmu a ɔwɔ nsu papaapa na ɔyɛ fɛw so. Abraham faa Mamrɛ tɛtɛrmu a ɔnnyɛ asaaseber yie. Kyerɛwsɛm mu no, yɛkenkan dɛ Abraham bɔɔ n’asesee na osii “afɔrmbukyia maa Ewuradze.” 20 Lot afamudze, “ɔbɔɔ n’asesee [kyerɛɛ] Sodom [afamu].” 21 Ama yeenya nkitahodzi asomdwee mu no, adzesũadze no da no edzi dɛ: ɔsɛ dɛ yenya pɛ dɛ yebedzi ano na yeeyi aperper akwa wɔ ndzɛmba a ɔmmfa tseneneeyɛ ho. Dɛ mbrɛ Ɔhen Benjamin kyerɛkyerɛɛ no, “Hom rinnya adwen biara dɛ obi bepira ne nyɛnko, mbom hom bɛtsena asomdwee mu.” 22 Mbom dza ɔfa tseneneeyɛ na nkyerɛkyerɛ ehiadze ho no, otwar dɛ yegyina pintsinn na yetsintsim.
Sɛ yɛpɛ dɛ yenya asomdwee a ɔyɛ tsenenee ndwuma n’akatua a, yɛnnkɔbɔ hɛn asesee akyerɛ wiadze afamu. Yɛbɔbɔ hɛn asesee akyerɛ temple afamu.
Otsĩa ebiasa: Fa Wo Pɛ San Mu Yi Tseneneeyɛ
Asomdwee na nyimpa ne pɛ brabra mu dɛ nkwagye ho nhyehyɛɛ n’asɛntsitsir. Dɛ mbrɛ wɔakã ho asɛm wɔ Asɛmpa Ngyinado mu wɔ “Nyimpa ne Pɛ na Nkontaabu,” no Nyimpa ne pɛ nye tum na ndzinoa a Nyankopɔn dze ma hɛn ma yɛdze san mu yi na yedzi dwuma ma hɛnho.” 23 Dɛm ntsi, nyimpa ne pɛ hia kɛse ma ankorankor nyinii na sũahu a ohyira hɛn ber a yɛka Agyenkwa no do. 24
Nna nyimpa ne pɛ yɛ asɛntsitsir wɔ Ɔsor Baguabɔ ansaana yɛreba asaase na ɔkõ a osii wɔ hɔn a wɔsaan mu yii dɛ wɔbɛka Christ do na Satan n’akadofo ntamu. 25 Yeregyaa hɛn ahantan na nhyɛdo mu na yɛresan mu afa Agyenkwa no bɛma kwan ma yenya Ne kan na N’asomdwee. Mbom ankorankor asomdwee bɛyɛ ɔhaw ber a nkorɔfo dze hɔn pɛ dzi dwuma wɔ esian na pira akwan ahorow mu.
Megye dzi dɛ asomdwee awerɛhyɛmu ho atsenkã a yɛtsee wɔ hɛn akoma mu no, hɛn nyimdzee wɔ dza wiadze Agyenkwa bɛyɛ ama hɛn no na ɔhyɛɛ no dzen. Wɔakã iyi fɛfɛɛfɛw wɔ Preach My Gospel mu: “Ber a yɛtwer Jesus Christ No Werdambɔ no, Obotum aboa hɛn ma yɛasɔw hɛn nsɔhwɛ, yarba, na yaw horow. Enyigye, asomdwee, na awerɛkyekye botum ahyɛ hɛn mã. Dza ɔyɛ nsisi nyina wɔ abrabɔ mu no ɔnam Jesus Christ no Werdambɔ no do obotum atsen.’’ 26
Otsĩa Anan: Kyekyer Zion wɔ Hɛn Akoma na Efiefi mu
Yɛyɛ Nyankopɔn ne mba na yɛka n’ebusua ho. Yɛka ebusua so a wɔwoo hɛn too mu no ho. Ebusua nhyehyɛɛ no nye enyigye na asomdwee ne fapem. President Russell M. Nelson akyerɛkyerɛ hɛn—na wiadze nsan yarba mu no yesũa—dɛ Asɔr-fapem fie a onya nyamesom nyɛe ho-abamba, botum “ama ebusua ebusua tum ma wɔdze edzi dwuma mbordo … dze asesa [hɛn] efiefi ma wɔayɛ gyedzi guandɔbea.” 27 Sɛ yɛyɛ nyamesom ho nyɛe yi wɔ hɛn efiefi mu a, yebenya Agyenkwa n’asomdwee no so. 28 Yenyim dɛ hom mu pii nnyi tsenenee efiefi na hom taa nye hɔn a wɔyɛ ndzeyɛɛ bɔn no fenfɛn. Agyenkwa no botum ama hom bambɔ na asomdwee kwankyerɛ ma ewiei no, hom enya bambɔ na guandɔbea efi wiadze n’ehum mu.
Mehyɛ hom nkuran dɛ enyigye, ɔdɔ, mãhyɛ a wonya no wɔ ebusua ebusua tsenenee adɔyɛ mu no dze asomdwee na enyigye nyina ba. Ɔdɔ na ayamuyie yɛ Zion a yebenya no wɔ hɛn akoma na efiefi mu no ne fapem. 29
Otsĩa Enum: Dzi Afotu a Hɛn Nkɔnhyɛnyi dze Ma Ndɛ no Do
Hɛn asomdwee yɛ kɛse ara yie sɛ yedzi Ewuradze no nkɔnhyɛnyi, President Russell M. Nelson do a. Ɔnnkɛkyɛr na yeenya kwan etsie no. Woesiesie no fitsi wiadze ne fapem ama ɔfrɛ yi. Nankasa n’ahosiesie ayɛ nwanwa dodow. 30
Ɔakyerɛkyerɛ hɛn dɛ yebotum “atse asomdwee na enyigye a ɔtahye nkã, begyabegyayɛ mber mpo mu” ber a yɛbɔ mbɔdzen dɛ yɛbɛyɛ tse dɛ hɛn Agyenkwa, Jesus Christ ara yie. 31 Oetu hɛn fo dɛ “yenu hɛnho daa daa”, yɛnfa ngye Agyenkwa no “Ne ntsewho, ayarsa, na tum mu ahoɔdzen.” 32 Meyɛ enyido dasefo dɛ hɛn nkɔnhyɛnyi dɔfo no enya nyikyerɛ fi sor na ɔkɔ do nya.
Ber a yedzi hɛn nkɔnhyɛnyi nyi na yɛma no tsipia no, yɛsom hɛn Ɔsor Egya na hɛn Agyenkwa, Jesus Christ. Sunsum Krɔnkrɔn no som hɛn.
Megye dase na mema me ɔsomafo dasegye dɛ Jesus Christ, wiadze Agyenkwa na Pomfo no, dzi N’Asɔr a wɔdze asan ananmu aba no ne kan na Ɔma kwankyerɛ. N’abrabɔ na werdam somdwuma no nye nokwar asomdwee ne farbaa no. Ɔyɛ Asomdwee Hen no. Megye me dasee a otsim awɔse mu dɛ Ɔtse ase. Jesus Christ ne dzin mu, amen.