Soposopono
Ewe angang an ewe Samon mi chok feifeino ne soposopono.
Pwi me fefinei mi achengicheng, ua fokkun pwapwa ren ai fitikemi ren ach poputani ei 190th Mwichenapen Mwichefen a Fis Fan Ru Iteiten Ier ren Ewe Mwichefenin Jises Kraist ren Aramas mi Pin non Fansoun Soponon. Ua pwapwaiti ai upwe fiti kemi non imwemi are ian chok oua nomia pwe oupwe auseningfengen ren ekkewe afanafan an soufos, chon kuno, me chon pwarata me pwan ekkoch souemwenin Mwichefen.
Sia fokkun kinisou ren mechan asapwan a mut ngenikich ach sipwe chufengen non ew waten mwicheichen chon kunon Jises Kraist won unusen fonufan. Mwichenapen mwichefen a fis non ewe April a chammong chon katton nap seni me noom, me sia ekieki pwe epwe pwan fis sefan.
Non ekkewe maram, eu semwenin fonufan, watten kek, me pwan ekkoch tatakisen fonu a fis me a ennetin osukosuka manauach. Ua fitikemi ne chupun ren ekkewe ami achengicheng mi mano non ei fansoun. Me uwa ioteki ren meinisin ion mi nom non weires iei.
Ieimwo, ewe angang an ewe Samon mi chok fefeino ne soposopono. Fansoun ei towau fesen, ekkewe mesemesen mas, me fiti mwich won komputer, sia kaeo pwan ekkoch napanap ach sipwe tongeni pwan fori me ekkoch ra fisioch nap seni me nom. Fansoun mi sokono a tongeni esenipato feioch mi sokono.
Nouch kewe misineri me souemwenin misineri ra fokkun nipwakoch ne fori, achocho, me ra ennetin mwirino. Inamwo napngeni ekkewe misineri ra kutta pwan ew anen repwe fori ar angang, chommong misson ra pwarata pwe afen napeno ar afanafan seni nom.
A namwot ach esipano ekkewe tempel ren ekkis fansoun, me ekkoch angangen aueta imw mi mangeno, nge iei meinisin ra pwan soposopono. Non ei kokkotun ier 2020, sipwe ne aora kattan punun sonun 20 minafon tempel!
Angangen uruon famini a fokkun napono. Wart me steik mi fo mi foruta. Me sia kinisou ne pwarata pwe ewe Mwichefen a fen awora ren ewe semwen mi kuu fonufan ren 895 angangen aninis non 150 fonu.
Ach anapano ach kaeo usun ewe kapas allim non imwach a apochokuna ach kapasen pwarata me ach tongfengen non ach kewe famini. Emon iin a makkei: “Aua mefi am arap ngeni noum kewe me noun noum kewe ren am chufengen won Zoom iteiten Raninfel. Emon me emon a pwarata mefian usun Feito, Tapweno Mwiri. Am iotek fan iten chon am famini a siwin pokiten aua weweiti met mi namwot ngeniir.”
Ua iotek pwe kich chon ei mwchefen sipwe aea ei fansoun ach sipwe mamarita non pekin ngun. Sia nom won ei fonufan pwe sipwe angei ach finata, sipwe kuna ika sipwe tapweno mwirin Jises Kraist, ren aier iteitan, ren kaeo, me ren ach fefeita. Ngunuch a mochenin epwe fefeita. Me sipwe tongeni fori ei ika sia nonnom nukuchar won ewe annen pwon mi piin.
Ren ekkei meinisin, Semach won Nang me Noun we, Jises Kraist, ra tongeikich! Ra tumunukich! Ir me Nour kewe chon nang ra mamasa kich. 1 Ua sinei pwe mi ennet.
Ren ach chufengen ach sipwe ausening ngeni kapasen ewe Samon a pwarata ngeni Noun kewe chon angang ar repwe afanafana, ua tingoreikemi oupwe ekieki eu pwon seni ewe Samon. A pwarata pwe “ion chok a mochen epwe kamwochuno ewe kapasen Kot, minne mi mwitirito me uren pochokun, me epwe kinifeseni me aparasa meinisin ekkewe mettochun nikatupotup … me ekkewe otupotup an ewe tefin, me emmweni ekkewe [chon kaeo] noun Kraist non ew aan mi wenewen me chokisikis.” 2
Ua iotek pwe oupwe finata oupwe kamwochuno ewe kapasen Kot usun mi pwarata non ei mwichenapen Mwichefen. Me ua iotek pwe kopwe mefi an ewe Samon tong mi unusoch fanitom, 3 non ewe it mi piin ren Jises Kraist, amen.