Ahkpwacyeye Nuhnuhnkuh Suwohs

Sel Elder James R. Rasband

Luhn Mwet Itngucul

In ahkpwacyeye sie nuhnuhnkuh suwohs, iwaclah in kihsackuhnlah luhn Mwet Lahngo ac fah sackuhnlah mahmahuh luhn nihkihn ac ma fakfuhk ahkngal ma oreklac sin mwet sahyac.

Puk luhn Mormon uh Luti ke Mwe Luti luhn Kraist.

Ohktohpa tari ah, Prestuhn Russell M. Nelson el srihke kuht in nuhnkuh lah fuhkah eklac luhn moul lasr uh fin etwacack lasr kuht eis ke Puk luhn Mormon ac itucklac liki kuht?¹ Nga nuhnkuh yohk ke kihsensiyuck soko lal inge, suc nga etuh muh puhs suwos oruh oacpacna. Nuhnak se fihlfihl in tume nuh sihk—fin wacngihn Puk luhn Mormon ac kahlwemiyac ke mwe luti luhn Kraist ac iwaclah in kihsackuhnlah Lal, ngwac ngwet nuh oyac in konwacack mihs?

Mwe luti luhn Kraist—suc nwacnwack mwe luti ac akwuck luhn luhlahlfongi ke Kraist, auliyak, pacptais, mwe sang luhn Nguhn Muhtahl, ac muhtweng nuh ke sahflah—lutiyuck pacl puhkantwen ke ma suhmuhslah nuhkwewa luhn Sifil Fohlohkyak tuhsruhk ke kuh ma oasr lun Puk luhn Mormon.² Mwe luti uh muhtwacwacack ke luhlahlfongi kacn Jisus Kraist, ac ma nuhkwewa kac muhngnguhi nuh ke luhlahlfongi ke iwaclah in kihsackuhnlah Lal.

Oacna ke Prestuhn Nelson el luti lah Puk luhn Mormon use fohnlah ac kahlwem na fokoko se emet ke iwaclah luhn Jisus Kraist ma konweyuckyak yen nuhkwewa.³ Ke yohkwaclihk kahlwem lasr ke mwe sang yohk luhn Mwet Lahngo, ac fah yohk pac etwacack tuhkuh nuh sesr in etuh, nuh ke nuhnak lasr ac insiacsr,⁴ pwacyeiyacn ahkkweye lal Prestuhn Nelson uh pa ma pwacye ke Puk luhn Mormon uh oasr kuh se kac in unwelah, ahkwoye, sifil fohlohkohnwack, kahsruh, ahkfokokoye, ahkmihsye, ac ahkenganye nguhnasr.⁵

Iwaclah luhn Mwet Lahngo uh Ahkwoyelah Ma Enenweyuck Nuhkwewa luhn Nuhnuhnkuh.

Sie ma yohk srihpac ac sang mihslac utuckuh ke Puk luhn Mormon nuh ke etwacack lasr ke Iwaclah luhn Mwet Lahngo pa mwe luti kac an lah kihsac pahkotwen luhn Kraist ahkfohnyelah ma enenweyuck nuhkwewa luhn nuhnuhnkuh. Alma el ahkuhtweyac, “God El sifacna iwaclah nuh ke ma koluk luhn facluh, in ahkfahsrye plwacn luhn pahkotwen, in ahkfihsrwacsryelah ma enenweyuck luhn nuhnuhnkuh suwohs, tuh God Elan kuh in sie God suwohs, God wo, ac oacyacpac sie God pahkotwen.”⁶ Plwacn pahkotwen luhn Pahpah⁷—meac ma suhmuhslah uh oacyacpac pahngon muh pa plwacn luhn engan uh⁸ kuh plwacn luhn molwelah⁹—tiac kuh in ahkfahsryeyucklac fin te ma enenweyuck nuhkwewa luhn nuhnuhnkuh ahkfalyeyucklac.

Tuh meac na pwacye pa “ma enenweyuck luhn nuhnuhnkuh suwohs?” Nuhnkuh ke ma sikyak nuh sel Alma sifacna. Esam lah, ke el mukul fuhsr ah, Alma el som suk “in kuhnahoslah alu uh.”¹⁰ Pwacye, Alma el fahk nuh sin wen nahtuhl Helaman lah el “kweokkihn ke waek luhn hell” mweyen el “ahkmasye tuhlihk puhs nuhtin [God]” ke el “kohlohloslac nuh ke kuhnahoslah.”¹¹

Alma el ahkuhtweyac nuh sel Helaman lah mihs uh tuhfah tuhkuh nuh sel ke el “nuhnak [lal] sruokyac na” luti luhn pahpah tuhmwacl “ke tuhkuh luhn … Jisus Kraist … in iwaclah ma koluk luhn facluh.”¹² Auliyak, Alma el pruhe siyuck ke pahkotwen luhn Kraist¹³ ac na fah el puhlakihn engan ac mongi ke el etwacack lah Kraist El iwaclah ke ma koluk lal ac molwelah ma nuhkwewa enenweyuck nuh ke nuhnuhnkuh. Sulpacna, nuhnuhnkuh suwohs fuhkah enenweyuck nuh sel Alma uh? Ke Alma el sifacna luti tok, “wacngihn kuhtwena ma fohkfohk kuh in ilyak nuh ke tohkohsrahi luhn God.”¹⁴ Ohinge, ipin pacna mongi lal Alma enenuh in pa ingacn, fuhnuh wacngihn pahkotwen ituckyang, nuhnuhnkuh suwohs fah kohsrwacllah elan tiac fohlohk muhta yurun Pahpah Lucng.¹⁵

Mwet Lahngo El Unwelah Kihnet ma Kuht Tiac Kuh in Unwelah

Tuhsruhk yac engan lal Alma ma na nuh sel muhkwena—ke kahingkihnyacn nuhnuhnkuh lal ac kuh lal in fohlohk nuh yurun Pahpah? Kuht etuh lah Alma el oacyacpac kweok kaclos suc el tuh pwacnlah liki ma pwacye.¹⁶ Tuhsruhk Alma el tiac kuh in unwelah ac sifil fohlohkohnwack elos nuhkwewa suc el tuh pwacnlah ah. El tiac kuh in sifacna ahkpwacyeye lah elos fah ituckyang pacl fal se la in lotwelah mwe luti luhn Kraist ac in ahkinsewowoyeyuck in moulkihn ac engankihn ip yohk la an. El tiac kuh in fohlohkohnma elos suc misac suc srwackna lohsrlah ke luti kikiacp lal.

Oacna Prestuhn Boyd K. Packer el tuh luti: Nuhnak se ma molwellah Alma … pa inge: Sifil fohlohkohnwack ma kom tiac kuh in sifil fohlohkohnwack, unwelah kihnet ma kom tiac kuh in unwelah, ahkwoyelah ma suc kom kuhnahoslah ac tiac kuh in ahkwoyelah pa srihpac na pwacye se ke iwaclah luhn Kraist.¹⁷ Ma pwacye engan oan in nuhnak lal Alma ma el “sruokyac na” tiac ma el sifacna kuh in ahknwacsnwacsyeyucklac kac tuhsruhk oacyacpac elos suc el tuh ahkkolukyelah kuh in unweyucklac ac oreklac in faseni.

Kihsac luhn Mwet Lahngo Ahkpwacyeye Sie Nuhnuhnkuh Suwohs

Yac met liki Alma el tuh moliyucklac ke mwet luti ahkkweyeyucklac se inge, Tohkohsrah Benjamin el luti ke luhpan onweyucklac utuckuh ke iwaclah in kihsackuhnlah luhn Mwet Lahngo. Tohkohsrah Benjamin el fahk lah “pweng wo ke engan yohk” ituckyang nuh sel “sin sie lipufacn luhn God.”¹⁸ Inmahsrlon pweng wo ingacn pa ma pwacye se lah Kraist Elac fah kweokkihn ac misac ke ma koluk ac tahfonglac lasr in ahkkweye lah “sie nuhnuhnkuh suwohs fah tuhkuh nuh sin tuhlihk nuhtin mwet.”¹⁹

Meac na pwacye “nuhnuhnkuh suwohs” uh enenuh? Ke fuhs se tohkoh an, Tohkohsrah Benjamin el ahkuhtweyac lah, in ahkkweye nuhnuhnkuh suwohs se, srahn iwaclah luhn Mwet Lahngo “nuh ke ma koluk luhn elos suc puhtatlac ke tahfonglac lal Adam” ac nuh selos “suc misac tiac etuh ma luhngse luhn God nuh selos, kuh suc lihkkeke lac na in oruh ma koluk.”²⁰ El luti lah nuhnuhnkuh suwohs uh oacyacpac enenuh “srahn Kraist iwaclah nuh ke” ma koluk luhn tuhlihk srihsrihk.²¹

Ma suhmuhslah inge luti mwe luti wolacna—srahn iwaclah in kihsackuhnlah luhn Kraist onwelah, sie mwe sang tiac moul, elos suc lihkkeke in oruh ma koluk, elos nuh sin suc, oacna ke Jacob el fahk, “wacngihn masap ituckyang.”²² Aholyacn ma koluk uh orek fal nuh ke kahlwem utuckuh nuh sesr ac sang kuhiyacsr nuh kac in oruh sukohsohk in sulaclah lasr uh.²³ Kuht etuh mwe unweyuck ac ma pwacye in ahkwoye se inge muhkwena ke srihpen Puk luhn Mormon ac ma suhmuhslah sahyac ke Sifil Fohlohkyak.²⁴

Ahok, fin oasr masap ituckyang, fin kuht tiac lusrong ma luhngse luhn God uh, kuht ac oruh ma kunacsr. Oacna ke Tohkohsrah Benjamin el ahkuhtweyac: “We nuh sin el suc ma etuh tuh el lain God! Tuh molwelah tuhkuh nuh sin tiac sie mwet sahyacn ke auliyak ac luhlahlfongi ke Leum Jisus Kraist.”²⁵

Ma se inge pac pa pweng wo ke mwe luti luhn Kraist. Mwet Lahngo El tiac unwelah muhkwena ac sifil fohlohkohnma elos suc lihkkeke in oruh ma koluk tuhsruhk oacyacpac, nuh selos suc oruh ma koluk lain kahlwem, Mwet Lahngo El sang ahkkweyelah fal nuh ke ohiyacn auliyak ac luhlahlfongi Kacl.²⁶

Alma el enenuh in “sruok yacna” kwewana ma pwacye inge. Kuh Alma el puhlakihn na pwacye ma el ahkuhtweyac muh pa “engan suwohswohs”²⁷ fin el nuhnkuh muh Kraist El molwellah tuhsruhk fuhlwelah ma pahtpaht elos suc el ahkkolukye suc ma el tuh pwacnlah liki ma pwacye ah? Moh na moh. Nuh sel Alma in puhlakihn mihslac yohk, elos suc el ahkkolukyelah oacyacpac enenuh pacl wo se la in oreklac in fas.

Tuhsruhk ac orek fuhkah elos—kuh elos kuht sahp ahkkolukyelah—in oreklac in fas? Ohinge kuht tiac kuh in arlac kahlwem ke orekma muhtahl suc iwaclah in kihsackuhnlah luhn Mwet Lahngo unwelah ac sifil fohlohkohnwack, kuht etuh na in ahkkweye sie nuhnuhnkuh suwohs, Mwet Lahngo El fah ahkmwesahsyelah mwe ahkikustwen luhn lusrohngtwen ac mwe ahkngal kohsroh oreklac sin mwet sahyac.²⁸ Ke ma inge El ahkkweye lah tuhlihk nuhkwewa nuhtin God fah ituckyang pacl wo se la, wi kahlwem wo, in sulaclah in fahsr Tohkohl ac eis plwacn in engan yohk.²⁹

Mwet Lahngo El Fah Ahkwoyelah Ma Nuhkwewa Ma Kuht Kuhnahoslah

Ma pwacye inge pa ac fah sang mihslac nuh sel Alma uh. Ac ma pwacye inge pa enenuh in use mihslac yohk nuh sesr uh pac. Ekihn mukul ac muhtwacn facluh, kuht nuhkwewa tihkuclkucl, kuh kuhtuh pacl uh kasihkuh, nuh sin sie sin sie ac ahkkolukye sie sin sie. Oacna sie ninac ac pahpah kuh in fahkwack, ngal se ma weacng ma tahfonglac lasr uh tiac pa sahngwengkihnyuck nuhnuhnkuh lasr sifacna tuhsruhk sahngweng lah sahp ac oasr kihtin pacl lasr nuh ke engan luhn tuhlihk nahtuhsr kuh nuh ke ohiyac ma ac kohsrwacltahloslac in liye ac kahlwem ke ma pwacye uh. Olwelah wolacna ke iwaclah in kihsackuhnlah luhn Mwet Lahngo pa lah, pacna fin ma tahfonglac lasr ninac ac pahpah uh elyah, El ac sruokyac tuhlihk nahtuhsr uh wacngihn nuhnuhnkweyuck nuh selos ac olwelah in ahkkweyaclos.³⁰ Ac finne ke elos oruh ma koluk lain kahlwem—oacna ke kuht nohfohn oruh—paho pahkotwen Lal ahsroeyucklac,³¹ ac El fah molweloslac fin elos fah ngwet nuh Sel ac moul.³²

Ohinge oasr kuh luhn Mwet Lahngo in ahkwoyelah ma kuht tiac kuh in ahkwoye, El sapkihn nuh sesr in oruh ma nuhkwewa kuht kuh in oraclah eklac wo se ke ipin pacna auliyak lasr.³³ Ma koluk ac tahfonglac lasr uh sriyucklac tiac ke kuhpahsr lasr nuh sin God muhkwena tuhsruhk oacyacpac kuhpahsr lasr nuh sin mwet sahyac. Kuhtuh pacl uh kampare lasr in onwelah ac sifil fohlohkohnwack uh sahp ac fihsrwacsr oacna sie taltal koluk, tuhsruhk kuhtuh pacl sahyac uh ahkwoyelah uh sahp enenuh in yac pa in sang kuhiyac ke mongfihsrwacsr uh.³⁴ Ahok, nuh ke ma koluk ac tahfonglac puhs lasr uh, fihsrwacsr kuht in tiac kuh in ahkkweyelah kwewa elos suc kuht ahkngalye. Olwelah usrnguck, mihs utuckuh ke Puk luhn Mormon ac wosasuc sifil fohlohkihnyuckyak pa Mwet Lahngo El fah ahollah ma nuhkwewa ma kuht kuhnahoslah.³⁵ Ac El fah oacyacpac ikihlkuhtlac fin kuht forlah nuh Sel ac auliyak liki ma koluk kuht oraclah.³⁶ El use kwewana mwe sang inge mweyen El luhngse kuht nohfohn ke luhngse suwohswohs³⁷ac mweyen El kihsackuhnlah in ahkkweye nuhnuhnkuh suwohs ma ahkfuhlwactye kwewana nuhnuhnkuh ac pahkotwen. Nga fahkwack ma inge pwacye ke inen Jisus Kraist, amen.

Mwe Kahsruh

1. Russell M. Nelson, “Closing Remarks,” Liahona, Nohfohmpuh 2019, 122.

2. Liye 2 Nephi 31; 3 Nephi 11:28, 32, 35, 39–40; Doctrine and Covenants 10:62–63, 67–70; 68:25; Moses 6:52–54; 8:24; Articles of Faith 1:4.

3. Russell M. Nelson, “The Book of Mormon: What Would Your Life Be Like without It?” Liahona, Nofuhmpuh 2017, 62.

4. Liye Doctrine and Covenants 8:2–3.

5. Russell M. Nelson, “The Book of Mormon: What Would Your Life Be Like without It?” 62.

6. Alma 42:15.

7. Liye Alma 42:15.

8. Liye Alma 42:8.

9. Liye Alma 24:14; Moses 6:62.

10. Liye Mosiah 27:8–10.

11. Alma 36:13, 14.

12. Alma 36:17, 18.

13. Liye Alma 36:18.

14. Alma 40:26; liye pac 1 Nephi 15:34; Alma 7:21; 11:37; Helaman 8:25.

15. Liye 3 Nephi 27:19; liye pac Moses 6:57.

16. Liye Alma 36:14–17.

17. Liye Boyd K. Packer, “The Brilliant Morning of Forgiveness,” Ensign, Nofuhmpuh 1995, 19–20.

18. Mosiah 3:2, 3.

19. Moroni 3:10; ahkuhtweyac wo ituckyang.

20. Mosiah 3:11; liye pac 2 Nephi 9:26.

21. Mosiah 3:16; liye pac Mosiah 15:25; Moroni 8:11–12, 22.

22. 2 Nephi 9:25.

23. Liye 2 Nephi 2:26–27; Helaman 14:29–30.

24. Liye Ip Yohk ke Luhlahlfongi 1:2; liye pac Doctrine and Covenants 45:54. Ahkuhtweyac ke mwe luti ke pacptais ahol mwet misac, Mwet Pahluh Joseph el fahk: Ke sie ipin ohiyac luhn mwet uh pa nuhnuhnkuh ac wacngihn pahkotwen la in ahkkolukye mwet sahyac, Pahpah ac Ninac Wolacna luhn facluh ngweti liye fwacn sucu luhn muhtuhnfacl uh wi karihngihnyuck luhn sie pahpah ac ip luhn pahpah enenweyuck; El liyacltahl oacna tuhlihk Nahtuhl. … El Mwet Sang Masap lahlmwetmwet se, ac fah nuhnuhnkuh mwet nuhkwewa, tiac nuh ke nuhnak ohsrihksrihk, ahkfohs luhn mwet uh. … El fah nuhnuhnkwaclos, tiac nuh ke ma wacngihn selos, tuh nuh ke ma oasr selos; elos suc ma tiac moulkihn masap, fah wacngihn masap nuhnuhnkwaclos, ac elos suc ma oasr masap la, fah nuhnuhnkweyuck ke masap. Enenuh in tiac tahfuh luo ke lahlmwetmwet ac etwacack luhn Jehovah Wolacna; El fah sang nuhnuhnkuh kuh pahkotwen nuh sin muhtuhnfacl nuhkwewa fal nuh ke yen mwesis lalos, ohiyac in eis etwacack, masap suc ma elos karihngihn, lohm ituckyang nuh selos in eis mwe fahkwack pwacye, ac … kuht nuhkwewa fah sahflahiyac ah enenuh in fahkwack lah Nuhnuhnkuh luhn facluh oraclah suwohs (Teachings of Presidents of the Church: Joseph Smith [2007], 404).

25. Mosiah 3:12; liye pac 2 Nephi 9:27.

26. Liye Mosiah 3:12; Helaman 14:30; Moroni 8:10; Doctrine and Covenants 101:78. Kais sie mwet sahp lusrong masap ac wuhlweacng kuh tiacna kuh in oruh sukohsohk in sulaclah lalos ke kuhtuh ohiyac sikyak tuhsruhk srwackna orekma nuh ke ohiyac sikyak sahyac mweyen Kahlwem luhn Kraist ma oasr selos (liye 2 Nephi 9:25; Moroni 7:16–19). Mwet Lahngo, suc pa mwet in nuhnuhnkuh se lasr ac suc ahkkweyelah sie nuhnuhnkuh suwohs, fah srwelah ohiyac sikyak inge (liye Mormon 3:20; Moses 6:53–57). Ac El molwelah kwewana luhpah—upac in moliyucklac met ac luhpah fal se tok ke auliyak.

27. Alma 36:21.

28. Liye Mosiah 3:11; liye pac D. Todd Christofferson, “Redemption,” Liahona, Mei 2013, 110; Alma 7:11–12 (“El fah eis nuh facl kweok ac mas luhn mwet Lal. … Ac el fah eis nuh facl muhnahs lalos”); Isaiah 53:3–5 (“A el mutangla keok su fal in orek nu sesr, Ac waiok su ac ma lasr”); 61:1–3 (“[Leum] El mosrweyula in … akkeyela insien mwet su munasla finsrak la, … in akwoyalos nukewa su asor, in oru tuh elos su mwemelil in Zion, in engan ac insewowo, ac tia asor”). Mwe lutiyuck se lah Mwet Lahngo El fahk oacna ke fuhs ke Isaiah ke El sulkackihn lah El pa Messiah: “Misenge Ma Simusla se inge akpwayeiyuk ke pacl se kowos lohng ke nga riti ah.” (liye Luke 4:16–21).

29. Ke facl luhn nguhn uh, wosasuc uh lutiyuck nuh sin mwet suc nihkihn, mwet soenna auliyak, ac mwet lihkkeke tuh elos in kuh in sukohsohklah liki kapihr lalos ac som nuh ke mwe insewowo ma oasr yurun Pahpah Lucng pahkotwen nuh selos (Dallin H. Oaks, “Trust in the Lord,” Liahona, Nohfohmpuh 2019, 27). Liye 1 Peter 4:6; 2 Nephi 2:11–16; Doctrine and Covenants 128:19; 137:7–9; 138:31–35.

30. Liye Moses 6:54. Prestuhn M. Russell Ballard el luti mwe luti se inge ke sifacna eislah moul la uh: Leum muhkwena etuh ma srihsrihk nuhkwewa, ac El pa suc fah nuhnuhnkuh mukwikwi lasr fin facluh. Ke El nuhnuhnkwe kuht, nga puhla muh El fah eis ma nuhkwewa in nuhnkwaclah: oreklac lasr ac ohiyacsr, ohiyacn nuhnak lasr, kuhiyacn etwacack lasr, mwe luti kuht eis, facsin luhn pahpah tuhmwacsr, ohiyacn kuh in mahno lasr, ac kuhtuh sahyac. Kuht lotwelah ke ma suhmuhslah lah srahn Kraist fah iwaclah ma koluk luhn mwet ‘suc misac tiac etuh ke kena luhn God kaclos, kuh suc ma sikalweni in koluk na.’ (Mosiah 3:11)” (“Suicide: Some Things We Know, and Some We Do Not,” Ensign, Ohktopa 1987, 8; Tambuli, Mahs 1988, 18).

31. Liye Jacob 6:5; Mosiah 29:20; 3 Nephi 9:14; Doctrine and Covenants 29:1.

32. Liye Helaman 8:15.

33. Liye Leviticus 6:4–5; Ezekiel 33:15–16; Helaman 5:17; Doctrine and Covenants 58:42–43.

34. Pa inge kain orekma ma Alma el sifacna wi oruh (liye Alma 36:24).

35. Prestuhn Boyd K. Packer el luti ma inge ke ohiyac kuh:

    Oasr pacl ma kom tiac kuh in ahollah ma kom kuhnahoslah. Sahp tahfonglac uh ma na eke pacl somlah ah, kuh elos suc kihnetuh sruhnga auliyak lom. Sahp ma muhsahllah uh arlac upac oruh kom tiac kuh in ahkwoyelah finne yohk nuhnkom in oraclah.

    Auliyak lom tiac kuh in eisyuck ne kena oasr moliyac. Fin kom tiac kuh in ahollah ma kom oraclah, kom kapihri. Fihsrwacsr in kahlwem luhpan suhkahsrweacng ac wacngihnlac finsrak ke kom puhla ac lah efuh oacna in luhman kom ke fuhlweack finsrak, oacna ke Alma el oruh ah. …

    Ma nuhkwewa ac ahkwoyeyucklac fuhkah, kuht tiac etuh. Sahp ac tiac ahksahfyeyucklac nohfohn ke moul se inge. Kuht etuh ke aruhruhma ac muhtwacta lah mwet kuhlwacnsap luhn Leum tahfwelah orekma luhn molwelah ke acn lihsrlihsr.

    Etwacack se inge fah oacna mwe ahkwoye se nuh sin mwet wo oacpacna nuh sin mwet koluk. Nga nuhnkuh nuh ke ninac ac pahpah ma kweok upaclac ke tahfonglac luhn tuhihk lohsrlah nahtuhlos ac wacngihlac finsrak la (“The Brilliant Morning of Forgiveness,” 19–20).

36. Liye 3 Nephi 12:19; liye pac Matthew 6:12; 3 Nephi 13:11.

37. Liye John 15:12–13; 1 John 4:18; Dieter F. Uchtdorf, “Perfect Love Casteth Out Fear,” Liahona, Mei 2017, 107.